Tā’u parau poro’i nō ’ō mai i te Atua ra

Nā Don Osaheni Agbon-ogieva, Edo, Nigeria

’Aita tō’u e ’itera’a pāpū nō ni’a i te Buka a Moromona tae roa i te taime ’a paraparau mai te Fatu iā’u nā roto mai i te buka a Helamana.

I te anira’a mai te hō’ē hoa iā’u ’ia haere i te fare purera’a a Te ’Ekālēsia a Iesu Mesia i te Feiā Mo’a i te mau Mahana Hopea nei i te matahiti 2020 ra, ’ua fāri’i au ma te au ’ore. I te ha’amatara’a, ’aita vau i mana’o ’o te vāhi mau te reira, ’ua tāmau noa rā vau i te haere i te purera’a ’ōro’a. I te hope’a, ’ua bāpetizohia vau.

Teie rā, ’aita vau i ta’a maita’i te aura’a ’ia roa’a i te hō’ē ’itera’a pāpū, mai tei parauhia e te tahi atu mau melo o te ’Ēkālesia. ’Ua tai’o ’āmui au ’e te mau tuahine misiōnare i te tahi mau ’īrava pāpa’ira’a mo’a, ’aita rā vau i ’īriti noa a’e i te Buka a Moromona. Noa atu te mau tauto’ora’a rahi a te mau melo o te ’Ēkālesia nō te fa’ari’i poupou iā’u ’e ’ia vai itoito noa vau, ’ua ha’amata ’oi’oi au i te tāpae i te purera’a nā muri a’e i te hora, i te ma’iri i te mau purera’a ’e i te ho’i fa’ahou i tō’u orara’a tahito.

Tae a’era i te hō’ē mahana, ’a ’ite ai au i te tauira’a o te huru ’e te horuhoru o tō’u ’ā’au. ’Ua ’ite au ē ’ua nevaneva rahi roa vau, ’ua rahi i te mau mea o teie nei ao ’e ’ua hōtaratara i mua te mau mea a te Atua. ’Ite a’era vau ’aita vau i ni’a i te ’ē’a ti’a. ’A vai noa ai au i roto i teie huru, hi’o ihora vau i te mau pāpa’ira’a mo’a i ni’a i tō’u ro’i.

’Ua pi’i atu vau i te Atua ’ia parau mai iā’u i te hō’ē mea. ’Ua fa’ahiti au i te hō’ē pure iti ’e ’ua tīa’i ihora ’ia fa’aro’o i te hō’ē noa a’e mea. ’Ua hina’aro vau i te tāmāhanahanara’a ’e i te māramarama.

I muri iho, ’ua fa’aro’o vau i te hō’ē mea. ’Aita vau i ’ite nō roto mai ānei te ta’i i tō’u ferurira’a ’aore rā i tō’u tari’a, ’ua fa’aro’o rā vau i te mau parau « Helamana 3:27 ». ’Ua ’ite au tei roto te buka a Helamana i te Buka a Moromona, nō reira ’ua rave mai au i te mau pāpa’ira’a mo’a ’e ’ua haere i te ’api ’ōmuara’a nō te ’imi mai i taua buka ra.

Te mea tā’u i tai’o i muri iho ’o te hō’ē ïa poro’i nō ’ō mai i te Atua ta’a ’ē mau nō taua taime ra o tō’u orara’a : « Nō reira tē ’ite nei tātou ē, tē vai nei tō te Fatu aroha i te mau ta’ata ato’a, ’o tē ti’aoro atu i tōna ra i’oa mo’a ma te ’ā’au hina’aro mau ».

’Ua taui roa teie ’īrava i tō’u hi’ora’a i tā’u mau ’ohipa ’e nō te Buka a Moromona. ’Ua ’ite a’era vau ē tā’u mau ’ohipa ’e tō’u pāpū ’ore i mua i te Atua e mea hape ïa, ’e ’ua tītauhia iā’u ’ia ti’aoro atu iāna ’e ’ia tātarahapa. ’Ua ’ite au e’ita te Atua e ’ōpani iā’u i tōna aroha ’e i tāna mau ha’amaita’ira’a, ’a vai ha’avare ’ore ai au nō te ti’aoro atu iāna ’e nō te pe’e iāna.

Mai te reira tō’u ’itera’a pāpū i te taera’a mai nō te Buka a Moromona—hō’ē buka ’o tā’u i ’ore i ’ana’anatae i te tai’o. ’Ua ’ite au tē ora nei te Atua, tē paraparau mai nei ’oia ia tātou i teie mahana, ’e e parau mau te Buka a Moromona.