Mai te pōiri atu i te ’oa’oa

Nā Helen Hughes, Durham, Peretāne

’A fa’ahiti noa ai au i te mau parau o te mau ’ōro’a o te hiero i roto i tō’u ferurira’a, ’ua tupu mai te hō’ē ’ohipa māere mau.

I te matahiti 1988, ’ua haere au ’e te tahi atu mau ’orometua ha’api’i nō te fenua Peretāne e ha’api’i i roto i te hō’ē fare ha’api’ira’a i te fenua Tūtani. E mea maita’i roa te mau tamari’i ’e ’ua ’oi’oi roa mātou i te mātau i te mau huru orara’a i roto i te hō’ē fenua i roto i te fa’ahotura’a. ’Āre’a tō mātou fatu ’ohipa, e au ra e ta’ata fa’atere ’eta’eta ’o tē hāmani ’ino i te ta’ata ato’a, ’o tāna e mana’o nei e pāto’i nei i tāna fa’aterera’a. ’Ua au ’ore roa ’oia iā’u, mai te mahana ’a pāruru ai au i te hō’ē ta’ata ’o tāna i hāmani ’ino.

I te hō’ē mahana ’ua tītau mai ’oia iā’u i roto i tāna piha tōro’a. ’Ua hau i te ’āfa hora, tōna fa’atina-noa-ra’a iā’u nā roto e rave rahi huru parau fa’a’inora’a ’e te mau ha’amata’ura’a. ’Ua haere atu vau i rāpae i tāna piha ma te ’ete’ete [choc] rahi. ’Aita vau e ha’amana’o nei i te mea tā’u i ora i te toe’a o te reira mahana ha’api’ira’a. I te pō tā’āto’a, ’ua vai noa mai tāna mau parau ri’ari’a i roto i tō’u ferurira’a.

I te taime o te ta’otora’a, ’ua pārahi au i ni’a i tō’u ro’i ’e ’ua tai’o i te mau pāpa’ira’a mo’a. I muri iho ’ua tūturi au ’e ’ua pure ma te itoito nō te fāri’i i te tāmahanahana ’e te mamara’a, ’aita rā te reira i tupu noa a’e. ’Ua haere atu vau i ni’a i tō’u ro’i ’aita rā i nehenehe iā’u e ta’oto. E piti fa’ahou taime tō’u ti’ara’a mai, ’ua tai’o, ’ua tūturi, ’e ’ua pure, ’aita rā i manuia.

Mana’o ihora vau, « ’oia ïa, e’ita tō tātou Metua i te ao ra e pāhono noa mai i tā tātou mau pure, mai te au ’e i te taime tā tātou e hina’aro ». ’Ua fa’aoti au iho e ara noa i te hō’ē pō ahoaho ’e te taoto ’ore.

I tō’u rā tārava-fa’ahou-ra’a, ’ua feruri au, « tē vai ra fa’ahou hō’ē mea tā’u e nehenehe e rave ». ’Ua ha’amata vau i te fa’ahiti i te mau parau o te mau ’ōro’a o te hiero i roto i tō’u ferurira’a. ’A nā reira ai au, ’ua tupu mai te hō’ē temeio fa’ahiahia. Te mau ’ino ato’a ’e te mau pōiri ’ua haere i rāpae iā’u, ’e ’ua tae mai te hau ’e te ’oa’oa ’umere roa a’e ’e ’ua fa’a’ī i tō’u tino tā’āto’a.

’Ua ti’a mai au i ni’a ’e ’ua pure, ma te ta’i ’ua ha’amāuruuru vau i tō tātou Metua i te ao ra. I muri iho ’ua ho’i tau vau i ni’a i te ro’i ’e ’ua ta’oto. Te mahana i muri iho, ’o tei ’ī i te ri’ari’a ’e te ’ino, ’ua riro ïa ’ei mahana ’oa’oa roa a’e ’o tā’u i ora na ’e te mau tamari’i o te piha ha’api’ira’a.

’Ua ’ite a’era vau ē, ’ua hina’aro te Fatu ’ia feruri hōhonu vau i ni’a i te mau ’ōro’a o te hiero. I te feiā mo’a tei rātere nā roto i te mau peho i muri a’e i te fāri’ira’a i tō rātou mau ha’amaita’ira’a i roto i te hiero nō Nauvoo, ’ua parau te peresideni Brigham Young (1801–1877) ē, « tē ura nei te auahi o te fafaura’a ’o tā ’outou i rave i roto i te Fare o te Fatu i roto i tō ’outou ’ā’au, mai te ura e ’ore roa e pohe ». Mai te mea e ura tā tātou mau fafaura’a o te hiero i roto i tō tātou ’ā’au ’e i tō tātou ferurira’a, e ’ite ato’a mai tātou te pūai, te hau ’e te tāmāhanahana.