Ennaan an Ritōl an Eria
Jeļā wōn kōj ej kōkajoorļo̧k kōj ilo aolepen iien ad mour
Āinwōt ajiri ro, ļaddik eo jatū ediktata Luke im n̄a kom̧ro kar lukkun m̧ōņōņō aolep iien jemām ej ro̧o̧ltok n̄an m̧weo jān jerbal. Kōm kōn kattar ilo nuknuk in kiki ko am im kair laļļo̧k n̄an jikin wa eo n̄an karuwaineneik e n̄e ej itaktok. Aolep iien jemām ej kwaļok an m̧ōņōņō in lo kōm. Ekōn ān̄inn̄in kōm āinwōt “keiien m̧ōm̧m̧aan ro” nejin. Ekōn kajjitōk ippām ejet kar raan eo am im ejet kar jinem.
Jet iien jemām ekōn jab jepļaaktok n̄an m̧weo m̧ae ālkin an jinem kakwoņ kōm ilo jikin kiki. Ilo iien rot kein ekōn lotok kōm ilo ruum̧ ko am. Aolep iien kōmij kajjitōk ippān n̄an kwaļok juon bwebwenato in kakiki n̄an kōm. Ekar em̧m̧an ippem bwebwenato ko an. Aolepeer rej kōn kom̧ro, “Jared im Luke.” Men eo eaorōk tata, ino̧n̄ ko rekōn aolep iien jem̧ļo̧k ilo juon wōt wāween. Jared im Luke renaaj rūttoļo̧k n̄an erom̧ “em̧m̧aan ro rekarbōb” im n̄an “etal im mijen”.
Ino̧n̄ kein ekar ļap kilaaer n̄an kōm āinwōt jet ļaddik ro rej rūttoļo̧k. Jān ino̧n̄ kein jemām ekar kapenļo̧k ilo kōm bwe kadkad ko am rekar jumemej ilo gospel eo an Jisōs Kraist, n̄an erom̧ em̧m̧aan ro rej karbōb ilo m̧wil, im kekemo̧o̧j n̄an kōm̧m̧ane jabdewōt men kōmij jōk ilo ļōmņak ko am n̄an kōm̧m̧ane. Ilo am ito itak ippān doon āinwōt juon baam̧le, ro jinem im jemam ekkā aer kōmejajaik ke kōm kar ajri ro nejin Anij im bwe kōm maron̄ in jeraam̧m̧an ilo jabdewōt men eo kōmij pedpede mour ko am ion.
Ijeļā bwe ino̧n̄ kein raar jipan̄ kalōk lōke ilo kōm make im kijin̄en̄e ilo en̄jake. Jān an katakin kōm wōn kōm im jibadbad eo kwojarjar am, ro jinem im jemām raar kōpooj kōm n̄an bōk kōjeraam̧m̧an im n̄an anjo̧ ioon apan̄ im idajon̄jon̄ ko an mour.
Jej aolep ajri ro nejin Anij. N̄e jej meļeļe kadkad eo ad ekwojarjar, ej jipan̄ kōj anjo̧ ioon idajon̄jon̄ ko im kōm̧m̧ani kāālet ko rem̧m̧anļo̧k. Ej jipan̄ kōj “ļōmņake selestial” kōnke jejjab meļeļe wōt wōn kōj, ak barāinwōt etke jej pād ijin im jibadbad eo an apan̄ ko.
Būreejtōn Russell M. Nelson ekar katakin bwe jilu m̧ool ko raorōk rej jipan̄ kōj m̧aanjapopo n̄an mour indeeo:
-
M̧oktata, jeļā m̧ool eo kōn wōn kwe.
-
Karuo, jeļā m̧ool eo kōn ta eo Jemādwōj Ilan̄ im Nejin raar lewaj n̄an kwe.
Āinwōt an Būreejtōn Nelson kar ba “. . . wāween eo kwōj ļōmņak kōn wōn lukkuun kwe ejelet enan̄in aolep jokāālet ko kwonaaj kōm̧m̧ani.” Būreejtōn Nelson ekar kwaļo̧k jilu kadkad ko raorōk tata: m̧oktata, jej ajri ro nejin Anij, karuo, āinwōt ro uwaan Kabun̄ in, jej ajri in bujen ro, im kajilu, jej rikaļoor ro an Kraist. Kadkad kein rej kōm̧m̧an bwe jen jebar ilo jetōb ijello̧kin ad “jabjen menwan ilo jetōb”.
Ke ikar juon lawyer edik, ekōn emakijkij aō kile eō make āinwōt juon “lawyer”. Ijoke, kien ej ta eo ij kōm̧m̧ane, ejjab kadkadū. Ij lo bwe ilo aō kile eō āinwōt juon “rikaļoor an Kraist”, ejako aō ajije mour eo aō n̄an m̧akūtkūt ko an m̧ōn jar, jerbal, m̧weo, ak iiaio ko bōtaab ijello̧kin ij kōm̧m̧ani aolep jokāālet ko aō pedped ioon mejān kajjik eo aō indeeo. Ij tōmak ij juon ļeo pālele, baba, m̧ōttan ro jet, im lawyer.
Elōn̄ iiō ko remootļo̧k, āinwōt juon Stake Būreejtōn eo edik, juon iaan bisop ro am ekar wōr juon im̧ōn ilo Christchurch eo ekar jorrāān jān m̧akūtkūt in laļ ko im rōm̧ļo̧k im kar aikuj em̧m̧akūt ilo jejjo iien ko. Ikar kajjitōk ippān em̧m̧aan in em̧m̧an ekōjkan an kijenmej kōn kain jorāān rot in. Ilo iien eo, ekar kakeememej eō bwe e im baam̧le eo an raar jeļā wōn er āinwōt ajri ro nejin Anij, im ekar wōr aer lōke bwe Anij enaaj kar kakke n̄an er im lale er.
Katakin ajri ro nejid kōn wōn er ej jipan̄ kōpooj er n̄an indeeo. Jabōn Kōnnaan Ko 22:6 ej ba: “Kwōn katakin ajri ilo iaļ eo en etal ie, im n̄e e rūtto e jāmin ilo̧k jān e.”
N̄e jej katakin ajri ro karōk eo an Jemādwōj Ilan̄ kobaļo̧k ippān kadkad i er im jibadbad eo aer ekwojarjar, jej katakin er bwe jej iakwe er bwe ewōr aorōk i er, im bwe jibadbad eo ekwojarjar aer ej n̄an erom̧ āinwōt Jemāer Ilan̄. N̄e jej mour ekkar n̄an m̧ool kein jej kwaļo̧k n̄an ajri ro nejid, jodikdik ro, im rūm̧m̧an ded ro bwe remaron̄ anjo̧ ioon idajon̄jon̄ ko an mour in im maron̄ jeraam̧m̧an im m̧ōņōņō ilo aer mour kōn gospel eo an Jisōs Kraist.
Mormon ekar kean̄, “Lo, n̄aij rikaļooran Jisōs Kraist, eo Nejin Anij. Iaar bōk kūr jān E n̄an kwaļo̧k naan eo An ilubwiljin armej ro An, bwe remaron̄ bōk mour indeeo” Ilo ennaan in Mormon eaar kajoor ilo an kwaļo̧k kadkadin, naan in kam̧ool, im jibadbad eo an. Ilo an jodikdik ro ad kautiej naan ko an Mormon iiō in, rejjamin naaj wōt kobaļo̧k ippān Jemādwōj Ilan̄ im Jisōs Kraist ilo jerbal eo ekwojarjar aer ak renaaj ļapļo̧k aer pojak ņae idajon̄jon̄ im apan̄ ko an mour in.
Mekarta jedik ak rūtto, jen aolep iien keememej kapilōk eo eļap an Elder Dieter F. Uchtdorf:
“. . . mejān kajjik eo ad ejjab kōmlet kōn oran iien ko jej bun̄lo̧k ak kōn oran iien ko jej jerkak, pikirļo̧k kōj make, im bun̄ m̧aanļo̧k.”