Bwebwenato ko an Ijo Jokwe Ie
Juon Iakwe eo n̄an Tampeļ ilo Aolepen Am̧ Mour
Betty Mcllwaine ej keememej wōt lan̄lōn̄ eo ekar en̄jake ke erro kar ļeo pāleen, Bill, kar katak bwe baam̧le ko remaron̄ in n̄an indeeo kōn kain̄i ko kōm̧m̧ani ilo tampeļ ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ālkin elōn̄ļo̧k jān jiljinon̄oul iiō ko āinwōt membōr in Kabun̄ in, kōrā in ej wōnm̧aanļo̧k wōt ilo lem̧ōņōņō in kabun̄jar wiik otemjeļo̧k im jerbal in jipan̄ ilo Adelaide Australia Tampeļ eo.
Kajjojo wiik, Betty ej deļo̧n̄e FamilySearch app eo an Kabun̄ in n̄an pukōt juon nukun eo emej im emaron̄ jipan̄ leļo̧k kōjeraam̧m̧an ko an tampel. Kōrā in ej ba, “Ej juon en̄jake aorōk n̄an bōk juon kaat in āt an baam̧le n̄an tampeļ, n̄an ļōmņak kōn armej eo im mour eo an, im n̄an jar im kōjatdikdik bwe enaaj bōk gospel eo im kain̄i ko.”
Emeļo̧ke ļo̧k mour eo an make, Betty ej ba “Jemādwōj Ilan̄ ekar em̧m̧an n̄an n̄a aolep iien im baam̧le eo aō.”
Ekar ļotak ilo 4 Jānwōde 1932 eo ilo Kadina, ilo Yorke Peninsual Iturōk in Australia. Ekar ilo iien Great Depression eo im jemān, juon iaan ro rellōn̄ me rekar kappok aer jebral, kar kōm̧akūt baam̧le eo an n̄an Whyalla n̄an jerbal ilo juon jikin tim̧a ekāāl ej kab peļļo̧k.
Raar jokwe ilo juon em̧ nuknuk ioon parijet m̧ae iien eo jemān Betty emaron̄ kar kalōk juon em̧ aļaļ n̄an er. Ej keememej, “To̧o̧n wōt an mejen maron̄ loe, parijet eo ekar ļain kōn baam̧le ko rej jokwe ilo em̧ nuknuk.” Ajri ro raar iakwe mour ijo im kar etal in tutu jabdewōt iien raar kōņaan.
Ilo 1950 eo Betty ekar iioon ļeo pāleen Bill, eo ekar em̧m̧akūttok jān Belast, Northern Ireland n̄an barāinwōt kappok jerbal ilo meļan eo an tim̧a ko. Raar m̧are juon iiō tokālik im ekar wōr jilu nejier ļaddik im juon leddik, bōtaab ilo an kabūrom̧ōjm̧ōj, juon itaak ilo iaļ eo ekar bōk ļaddik eo nejier kein karuo, Donal, 21 iiō dettan. Betty kiiō ewōr 11 jibūn im 26 jibūn-jibūn ajri ro im ej ba, “Kajjojo aolepāer rem̧m̧an.”
Ļaddik eo erūtto tata nejier, Michael, ekar iioon mijenede ro jān Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo primary school. Ilo iien ko, jikuuļ ko raar katakin kōn kabun̄ ko im rej oktak jān doon im Michael ekkā an ro̧o̧l n̄an m̧weo ilo an itok limo n̄an jiron̄ baam̧le eo an ewi jon̄an an lem̧ōņōņō kōn kūlaaj kein.
Mijenede ro rekkar jino loļo̧k McIlwaine ro im kar katakin er kōn gospel eo an Jisōs Kraist n̄an aolepān baam̧le eo. Betty ej keememej en̄jake eo ekajoor an Jetōb Kwojarjar ilo kobaļo̧k eo an kein kajuon ippān Whyalla Branch eo, eļap tata ilo iien kwojkwoj eo.
McIlwaine baam̧le rekar peptaij ilo lo̧jet eo Whyall ilo 29 Tijemba 1962 eo. Ilo Raan in Kūrijm̧ōj eo ilo 1967 eo, aolepān baam̧ļe eo rekar kelo̧k n̄an New Zealand n̄an kar liāp n̄an aolep iien im n̄an indeeo ilo Hamilton New Zealand Tampeļ. Ālkin iien loļo̧k in kein kajuon Betty im Bill rekkar “iakwe tampeļ eo” im kar bar ro̧o̧l n̄ane “emakijkij in wōt jon̄an aer maron̄ .”
Elōn̄ iiō tokālik, ilo 2000 eo, Adelaide Australia Tampeļ eo ekar aje, im aolep allōn̄, Bill im Betty rekōn etal emen awa ko jān Whyalla n̄an jerbal im kabun̄ jar ijo. Innām ilo 2003, “raar jin̄aik juon doulul in 30 minit radius n̄an tampeļ eo ” im raar jeraam̧m̧an n̄an lo juon em̧ eo me ekar jon̄o̧ul wōt minit ettōrļo̧k ilo wa n̄an e. Raar jino jerbal ruo allen juon wiik ilo tampeļ eo im kar kōm̧m̧ane ium̧win 10 iiō ko, m̧ae iien Bill ekar jino nan̄inmej.
Betty ekar bar ro̧o̧lļo̧k n̄an loļo̧k ko an n̄an tampeļ ilo iien ko ālkin jako eo an Bill ilo 2015 eo im kiiō, ilo an 91 iiō dettan, “Ij kōjatdikdik n̄an kōm̧m̧ane men in m̧ae raan eo inej mej”.
Ilo M̧aaj in 2023 eo, ļaddik eo nejin Michael kar kūr n̄an erom̧ būreejtōn eo an Adelaide Australia Tampeļ, ippān lio pāleen, Caroline, āinwōt temple matron. Betty ekar “lo̧udin̄din̄” ke ekar jeļā im ekar tōmak, “Bill ej ettōn̄ dikdik ilo lan̄”.
Jako eo an ļaddik eo nejin Donal im, eo kiiō epaak tata, ļeo pāleen Bill ekar kōm̧m̧an bwe Betty en ļapļo̧k an jeļā kōn kōjeraam̧m̧an eo bwe Karōk in M̧ōņōņō eo an Anij ej bar kakobaik baam̧le ko n̄an indeeo.
Ej iakwe m̧ool eo an gospel in bwe baam̧le ko remaron̄ koba ippān doon n̄an indeeo. “Ej juon kōllowetak n̄an dāpij wōt kōj ioon iaļ eo eaidik im eaidin̄ bwe ren maron̄ bar koba ilo mour eo tok juon.”