Bwebwenato ko an Ijo Jokwe Ie
Kar Jeraam̧m̧an jān Ennaan ko an Rijjilōk ro Raan Kein
“O, ewi jon̄an ad aikuji kweilo̧k eo eļap!” kar naan in kam̧ool eo an Elder Robert D. Hales ilo 2013 eo. “ Jān kweilo̧k ko tōmak eo ad ej kajoorļo̧k im naan in kam̧ool ko ad rej mwilal ļo̧k.” Ilo ejja ennaan in wōt, Elder Hales ekar kallim̧ur:
“. . . eļan̄n̄e kom̧ naaj ron̄jake, kom̧ naaj en̄jake Jetōb eo ekajoor ilo kom̧. Irooj enaaj jiron̄ kom̧ ta eo Ekōņaan bwe kom̧in kōm̧m̧ane ilo mour ko ami.
“Ilo kweilo̧k ko jemaron̄ bōk meļeļe in naan eo an Irooj n̄an kōj make.”
Ilo m̧ōttan in ejenolo̧k, jejjo ro jān uwaan būreejtōnji ro an Doulul eo an Kōrā ro ad jān ipeļaakin Pacific in rej kwaļo̧k aer kam̧ool kōn naan in jiron̄ ko aer make im kar būki jān Jetōb Kwojarjar eo ilo naan ko an Rijjilōk ro ad raan kein. Kajjojo kōrā rein rej kwaļo̧k juon ennaan jān Kweilo̧k Eo Eļap me ekar jenolo̧k im aorōk n̄an er, im ekōjkan an kar kōm̧m̧an oktak ilo mour ko aer.
Sister Shireen A’Costa
Suva 1st Ward, Suva Fiji Stake
Ilo Jeptōm̧ba in iiō eo ļo̧k, ikar ito itak ilikin ilo juon mijen ikkijien jerbal im kar kāālet n̄an joļo̧k jet wiik ko jān jerbal jon̄an wōt aō maron̄. Kajjojo wiik ko ikar ettoļo̧k, iļakkar jiron̄ eō make inaaj kōļļāik juon m̧ōttan jon̄oul eo aō n̄e inaj bar ro̧o̧l. Āliktata ke ikar bar jepļaak n̄an kapijuknen jejjo wiik tokālik, ikar kile bwe ekar mootļo̧k jilu allōn̄ ko jān ke ikar āliktata kōļļāik juon m̧ōttan jon̄oul eo aō. Jabōt eo aō kein kajuon jān ke ikar ro̧o̧l ilo m̧ōn jar eo ikar kōļļāik juon m̧ōttan jon̄oul eo aō ilo allōn̄ eo wōt kein kajuon in aō kar jako innām kar ļo̧n̄tak ilo ļōmņak eo aō. Tōre in ej iien eo elōn̄ makūtkūt ko rej kōm̧m̧an. Ij ke lukkuun aikuj in kōļļāiki?
N̄an kaenōm̧m̧an ļōmņak eo aō ikar ennaanļo̧k ippān bisop eo aō im kwaļo̧k abōņōņō eo aō ilo kōjatdikdik ke enaaj kar būrom̧ōj kōn n̄a im jiron̄ eō ta eo ikar kōņaan ron̄. Ekar kajjitōk, “Kwōj ke kōņaan etal n̄an tampeļ ak jaab?” Ilo aō keememejļo̧k, kien in emenin aikuj bwe en kōm̧m̧an.
Ikar jeļā ilo būruō bwe tōmak eo aō ekar idajon̄jon̄e im ikar kowaan eō make kōn kōjeraam̧m̧an ko im Irooj ekar kallim̧ur kaki n̄an ro im rej tiljek ilo kōļļāik juon m̧ōttan jon̄oul ko aer. “Enaaj kapeļļo̧k wūntō ko an lan̄ im lutōkļo̧k jeraam̧m̧an n̄an kom̧ m̧ae iien enaaj ejjeļo̧k jikūn.”
Ilo kōnono eo an: Juon M̧ōttan Jon̄oul: Kōpeļļo̧k Winto ko an Lan̄, Elder Neil L. Andersen ekar kwaļo̧k:
“Wintō ko an lan̄ rej peļļo̧k ilo elōn̄ wāween ko. Jet rej ilo kanniōk, ak elōn̄ rej ilo jetōb. Jet rejjab alikkar im pidodo n̄an jab mejōki. Lōke iien eo an Irooj, kōjeraam̧m̧an ko rej iien otemjej itok.”
Āinwōt juon eo emej eo pāleen, juon m̧am̧a n̄an juon jiron̄ aiboojoj, juon jinen ak jemān bam̧le emake wōt, im rikakpilōklōk eo kein kajuon ilo Doulul eo an Kōrā ro an ward eo ad, ij pedped eļap ioon kōjeraam̧m̧an kein kar kallium̧ur kaki.
Lan̄lōn̄ eo ikar en̄jake, aenōm̧m̧an eo me ekar kalbubuik eō eban kar pidodo eļan̄n̄e ikar jab m̧ool im tiljek ilo kōm̧m̧ane ta eo ejim̧we. Ilo an ejeļo̧k aō pere ijeļā bwe kallim̧ur kein rej m̧ool jekdo̧o̧ņ aolep apan̄ ko ikar iooni, mour eo aō ekar jeraam̧m̧an im bar jeraam̧m̧an.
Sister Marlène Aroita
Toahotu Ward, Tahiti Taravao Stake
Ilo m̧ool, aolep ennaan ko an kweilo̧k ko reļļap rej naajdik jetōb eo aō . . . aolep iien.
Ilo kweilo̧k eo an Oktoba 2023, kōnke ikar iioon juon iien eo eaar kanooj in pen, ennaan eo an Elder Alan T. Philipps ilo ekōnono eo an, Anij Ejeļā im Ej Iakwe Eok, ekar letok n̄an eō eļap deor. Ejipan̄ eō keememej bwe ij juon ajiri aorōk nejin Jemād indeeo im aō Rilo̧mo̧o̧r Jisōs Kraist. E ekar kōļļāik wōņāān eo n̄an jetōb eo aō. Kōn en̄taan eo An, imaron̄ ukweļo̧k aolep iien ij kōm̧m̧an bōd im depij mour em̧m̧an eo aō.
Jekdo̧o̧n n̄e ejjab ļap aō lōke eō make, kōn an Irooj pād ippa, ewōr ippa kajoor eo n̄an niknik ilo aolep jekjek ko. Ejjeļo̧k jorrāān n̄an jan̄, bōjrak, n̄an bun̄ . . . kōnke enaaj wōr raan em̧m̧anļo̧k ilju kōn lan̄lōn̄, iakwe, im tōmak. Ij kam̧m̧oolol n̄an jeļā bwe Anij ekar kanooj iakwe kajjojo iaad im E ekar kōpooj aolep men n̄an kōj im m̧ōņōņō eo ad. Būreejtōn Russell M. Nelson im aolep ritōl ro an Kabun̄ in rej kein jerbal ko ilo pā ko pein Jemādwōj Ilan̄ n̄an tōl kōj ilo idajon̄jon̄ ko ad.
Iiō ko ruo remootļo̧k, ennaan ko an kweilo̧k eo eļap raar āinwōt juon iaļ an bōk mour. . . uwaak ko n̄an jar ko aō. Raar jipan̄ eō dibuk būrom̧ōj ko aō kōn eļapļo̧k kōmmaanwa ilo aō wōnm̧aanļo̧k ioon iaļ in bujen eo. Ij kajjieon̄ jon̄an aō maron̄ n̄an ļoor kapilōk eo an Būreejtōn Nelson n̄an joujļo̧k, im n̄an ļōmņak kōn selestial. Men ko rej em̧m̧anļo̧k; eddo eo epidodoļo̧k n̄an ineeke. N̄e en kar jab kōn iakwe eo aer, iban kar maron̄ in wōnm̧aanļo̧k wōt ilo iaļ eo. Ijeļā bwe Anij ej iakwe kōj, im ej juon toļaj n̄an būruō im aō jetōb.
Sister Emma Alofipo Tanuvasa
Massey Park Ward, Auckland Papatoetoe Stake
Ekōnono eo an Būreejtōn Russell M. Nelson ilo kweilo̧k eo eļap kar taitōļ in Lan̄lōn̄ im Mour ilo Jetōb (Oktoba 2016) ekar kanooj jelet mour eo aō. Ekar katakin bwe pedped in katak eo aorōk n̄an mour ilo jetōb, eļap tata ilo būrom̧ōj ko ad, ej bwe “Armej ren kar āinwōt, bwe ren maron̄ āinwōt.”
Ilo O̧kwōj in 2014 eo, ro jinō im jema raiboojoj Kalisi im Fa’amanatu Alofipo raar jako ilo ejja wiik eo wōt kōn nan̄inmej. Ro jinō im jema erro jim̧or kar oktaktok n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata, bōtaab ke raar oktak, raar niknik n̄an jem̧ļo̧kin āinwōt rikaļoor ro rem̧ool an Jisōs Kraist. Kōn menin ekōjkan aō lo lan̄lōn̄ ilo an mej ro jinō im jema jim̧or jekdo̧o̧n n̄e iaar en̄jake etōr jān jon̄an būrom̧ōj ilo aō?
Būreejtōn Nelson ekar kakeememej eō bwe:
“Jemaron̄ jino kōn ‘reiļo̧k n̄an Jisōs, Ri tōl im Ri koweeppān tōmak eo ad,’ im, ‘ilo aolep ļōmņak.’ Jemaron̄ leļo̧k kam̧m̧oolol n̄an E ilo jar ko ad im jān kōjparok bujen ko jaar kōm̧m̧ani Ippān im Jemādwōj Ilan̄. Āinwōt an Rilo̧mo̧o̧r eo ad erom̧ juon eo im ej m̧ool n̄an kōj im ilo ad akweļap kōn lan̄lōn̄ eo an n̄an letok n̄an kōj, lan̄lōn̄ eo ad enaaj ļapļo̧k.”
Ijeļā menin ej m̧ool im kam̧ool bwe lan̄lōn̄ eo em̧ool ej itok kōn Jisōs Kraist im Pinmuur eo An indeeo. Ej itok kōn kōjparok bujen ko aō, eo ej lukwōj eō n̄an Rilo̧mo̧o̧r eo aō im ej letok n̄an eō maron̄ n̄an deļo̧n̄e kajoor eo an eutiejļo̧k im n̄an jelm̧ae jabdewōt mālijjon̄ ko ak inepata ko. Lan̄lōn̄ ej itok kōn liāp āinwōt juon baam̧le indeeo ilo tampeļ eo ekwojarjar—n̄an ro jinō im jema, ļeo pāleō Alofa im leddik eo nejim Ane.
Lan̄lōn̄ ej barāinwōt itok kōn m̧aan im kōrā ro rej tiljek n̄an jerbal in karejar im ro rej kotak kōj ilo iien aikuj ko.
Būreejtōn Nelson ekar kam̧ool bwe: “Mōņōņō ej juon menin letok n̄an ro rej tiljek ilo tōmak. Ej juon menin letok eo jen ad kajieon̄ mour jim̧we, āinwōt an Jisōs Kraist kar kwaļo̧k.”