“Usa ka Dili Ordinaryo nga Panahon alang sa Buhat sa Templo ug Family History,” Liahona, Ago. 2024.
Usa ka Dili Ordinaryo nga Panahon alang sa Buhat sa Templo ug Family History
Wala pa gayod sukad sa kasaysayan sa kalibotan nga adunay daghan kaayong templo ug, salamat sa bag-ong teknolohiya, daghan kaayong tawo (lakip na kadtong dili mga sakop sa atong tinuohan) ang nagdugang ngadto sa ilang mga family tree.
Unsa ang nakapadasig nimo mahitungod sa buhat sa templo ug family history?
Elder Hamilton: Ang kamot sa Dios klaro kaayo niini nga buhat. Sa dihang si Presidente Russell M. Nelson midapit nato sa “pagpalig-on sa atong personal nga espirituwal nga mga pundasyon,” dayon miingon siya, “Ang dili ordinaryo nga mga panahon nagkinahanglan og dili ordinaryo nga mga paagi.” Kita wala pa sukad makakita og matang sa pagtubo nga atong nakita karon. Anaa kita sa usa ka panahon sa pagtukod og templo nga wala mahibaloi sa kasaysayan sa tawo, uban sa dul-an sa 180 ka templo nga gigamit, mga dosena ang gitukod pa, ug mga dosena ang ipahibalo pa matag tuig.
Ug uban niana nga pagtubo, ang panginahanglan sa paghimo og family tree sa katawhan nagtubo usab. Si Presidente Nelson mitudlo nga ang templo “gisangkapan og mga ngalan.” Anaa ra kanato sa pagseguro nga ang atong mga templo maayong pagkasangkap og mga ngalan nga gikinahanglan aron ang atong mga katigulangan makadawat sa ilang mga ordinansa ug ang mga miyembro makatagamtam sa mga panalangin sa templo sa tibuok nilang kinabuhi.
Mahimo ka ba nga mopakigbahin sa imong mga hunahuna kon unsaon nga atong mauna ang Manluluwas diha sa buhat sa family history?
Elder Hamilton: Kasagaran, nakatutok kita sa genealogy, nga mogiya nato ngadto sa atong mga katigulangan, nga modala nato sa pag-apil sa mga ordinansa ug sa paghimo og mga pakigsaad diha sa templo, nga mobugkos dayon nato ngadto sa Manluluwas. Nindot kana, apan atong balihon kana nga pamaagi. Ang Manluluwas mao ang mag-una. Magtinguha kita og mas suod nga relasyon uban Kaniya, mao nga moadto kita sa balay sa Ginoo ug modawat sa mga ordinansa ug mohimo og mga pakigsaad uban Kaniya, nga nagbugkos kanato ngadto Kaniya. Dayon himoon nato kana alang sa atong namatay na nga mga katigulangan pinaagi sa pagpangita nila ug sa pagpahigayon sa mga ordinansa sa templo alang nila.
Magsugod kita sa Manluluwas ug moingon, “Gusto ko nga motabang sa akong mga katigulangan nga mabugkos sila ngadto sa Manluluwas pinaagi sa mga ordinansa sa templo.” Sa pipila lang ka pagtuplok sa smartphone, ang Andam na nga mga Ordinansa nga himan sa FamilySearch mangita sa mga sakop sa imong pamilya nga nagkinahanglan nga ipahigayon ang mga ordinansa aron sila adunay oportunidad nga mabugkos ngadto sa Manluluwas. Ang sakto nga pagkasunod-sunod: Si Jesukristo, dayon ang mga pakigsaad ug mga ordinansa nga pagahimoon didto sa templo—ang balay sa Ginoo.
Brother Rockwood: Ang FamilySearch usa ka organisasyon sa pagserbisyo nga gipahinungod aron matabangan ang mga tawo sa kalibotan nga makapangita ug makakonektar sa ilang mga pamilya. Mao kana ang labing importante sa unsay atong gihimo sulod sa sobra sa 100 ka tuig. Ang Simbahan nagdala sa mga templo ug sa FamilySearch nga mas mapaduol ngadto sa mga tawo sa tibuok kalibotan. Ang atong tumong parehas ra: aron mahatagan og paagi ang mga tawo sa pagduol ngadto ni Kristo.
Unsa ang labing nakasurprisa nimo mahitungod niini nga bahin sa buhat sa Dios sa kaluwasan ug kahimayaan?
Brother Rockwood: Usa sa mga butang nga labing nakasurprisa nga akong nakita sa akong 20 ka tuig nga nagtrabaho sa Departamento sa Family History mao nga kon giunsa sa daghang mga tawo sa tibuok kalibotan sa paghimo sa ilang mga family tree. Gani, kadaghanan sa mga tawo karon nga naggamit sa FamilySearch dili mga miyembro sa atong tinuohan. Gikan sila sa hapit matag nasod sa yuta. Niadtong 2023, 6 ka milyon nga katawhan ang mi-sign up alang sa account sa FamilySearch—ug ang makapahingangha nga 97 ka porsiyento nila dili mga miyembro sa atong tinuohan. Kita adunay 4.1 ka milyon nga katawhan ang miapil sa atong komperensiya sa RootsTech sa miaging tuig gikan sa 243 ka nasod ug mga teritoryo, ug kadaghanan dili mga miyembro sa atong tinuohan.
Elder Hamilton: Maisogon kaayo ang pamahayag nga moingon nga kita naghimo og family tree sa katawhan, uban sa 17 ka milyon lamang nga mga miyembro sa Simbahan. Apan uban sa tabang sa minilyon pa nga mga anak sa Langitnong Amahan sa tibuok kalibotan, ang tree gihimo usa ka pamilya sa matag higayon. Dayon ang mga Santos sa Ulahing mga Adlaw makapahigayon sa buhat sa ordinansa sa templo ug makahatag og paagi alang sa ilang mga katigulangan nga mabugkos ngadto ni Jesukristo. Mao gayod kini ang dakong milagro sa atong panahon karon. Ang tibuok kalibotan gidapit sa pagduol ug sa pagkolekta og mga ngalan ngadto sa family tree ug sa pagtabang nato sa pag-ila ug pagdokumento niining mga relasyon sa pamilya sa tanang panahon ug sa tanang matang.
Mao ba kini ang gitawag sa mga tawo nga espiritu ni Elijah?
Elder Hamilton: Si Elijah mianhi gayod ug mihatag sa mga yawe alang niini nga buhat (tan-awa sa Doktrina ug mga Pakigsaad 110:13–15). Apan si Presidente Nelson mitudlo nga ang unsay atong kasagaran nga gitawag og “ang espiritu ni Elijah” mao lamang ang Espiritu Santo nga nagsaksi sa balaanong kinaiyahan sa pamilya. Makapadasig kini tan-awon. Gamhanan kini nga pagbati. Hapit sa matag higayon nga ang usa ka tawo mosugod sa pagkat-on pa og dugang mahitungod sa ilang mga katigulangan, usa ka gamhanang espiritu moabot. Mao kini ang Espiritu Santo. Ang pagsaksi sa Espiritu Santo molapas pa sa etniko nga mga linya, politikal nga mga utlanan, ug mga utlanan sa pinulongan. Kini nga Espiritu mokanap sa yuta samtang ang minilyon nga katawhan moduol sa FamilySearch.
Usahay mangutana kita sa mga tawo nga dili sakop sa atong tinuohan, “Nganong naghimo man kamo niini?” Ang mga tawo sagad maglisod sa pagpasabot niini. Moingon sila, “Gusto lang ko nga mokonektar ug masayod kon sa unsang paagi nga ako nahisakop. Gusto ko nga mobati nga kabahin sa usa ka pamilya.” Mao nga magsige sila og balik-balik sa FamilySearch—tungod kay sila adunay gibati. Kining tanan mao ang kamot sa Ginoo nga nagtabang sa paghimo og family tree sa katawhan.
Unsa ang imong ikasulti sa mga tawo nga naghunahuna nga ang buhat sa family history lisod?
Elder Hamilton: Gusto ko nga wagtangon sa mga tawo ang ilang gihunahuna nga lisod kini nga buhat. Dili kini klerikal nga buhat. Kini usa ka espirituhanon nga buhat. Kini usa ka buhat sa kalipay. Makita nimo kana og balik-balik diha sa kasaysayan niini.
Brother Rockwood: Sa dihang ang unang mga Santos nakahibalo nga mahimo silang magpabunyag alang sa ilang mga katigulangan, mibati sila og tumang kalipay ug naghinamhinam nga makasugod. Sa atong panahon karon nakasaksi kita sa hingpit nga kalipay nga gibati sa mga tawo sa dihang nadungog nila nga usa ka templo gipahibalo diha sa ilang dapit. Kini mao ang hingpit nga kalipay diha sa usa ka panahon diin ang kalibotan nag-anam ang kadaotan. Ang Ginoo nagdala niining hingpit nga kalipay ngadto sa tanan pinaagi sa nagkadaghan nga mga templo. Siya miabli og mga oportunidad alang sa katawhan aron madiskobrehan ang ilang mga katigulangan sa mga paagi nga dili gayod ordinaryo, gamit ang teknolohiya nga gipalambo ubos sa Iyang pagdasig. Kini tungod kay Siya nagpakatap sa yuta og hingpit nga kalipay.
Ug dayon anaa kana nga hunahuna nga ang buhat sa family history mas labing mahimo (o nahimo na) sa usa ka tawo diha sa atong pamilya.
Elder Hamilton: Ang ubang mga tawo dili manumbaling kon makadungog sila sa “family history” tungod kay naghunahuna nang daan kon kinsa ang kinahanglang mohimo niini nga buhat o kinsa ang maayo niini. Apan adunay daghang paagi sa paghimo niini nga buhat. Adunay sinati na kaayo nga mga family historian nga ganahan kaayo sa genealogy ug mogahin og pila ka oras sa ilang panahon sa paghimo niini, sa pagkat-on niini, ug sa pagbaton og espesyal nga mga kahanas. Apan adunay mga tawo usab nga ganahan lang nga adunay ngalan sa pamilya atol sa ilang sunod nga pag-adto sa templo. Adunay nagkapuliki nga mga ginikanan, mi-retire nga mga tawo, kabatan-onan, ug gani mga bata sa Primary nga naghimo sa family history. Kita nagkinahanglan niining tanan nga mga tawo, sa bisan unsa nga paagi nga sila makatabang.
Sa unsang paagi nga ang kabatan-onan ug ang mga young adult makatabang?
Elder Hamilton: Nindot kaayo tan-awon nga nagkadaghan ang atong kabatan-onan nga miapil sa family history. Niadtong 2011, si Elder David A. Bednar sa Korum sa Napulog Duha ka Apostoles mihatag og pakigpulong sa kinatibuk-ang komperensiya diin gidapit niya ang kabatan-onan sa Simbahan nga moapil niini nga buhat. Siya miingon, “Ang inyong mga tudlo maayo na kaayo mo-text ug mo-tweet aron mapaspas ug mapalambo ang buhat sa Ginoo.” Kadaghanan sa mga batan-on komportable kaayo sa teknolohiya. Ganahan sila sa makasulbad sa problema nga matang sa family history nga—morag sama kini sa pagpangita og bahandi. Kinahanglan ka nga maghunahuna kon asa moadto sunod ug unsay buhaton sunod.
Si Presidente Nelson mitudlo sa kabatan-onan—ug kanatong tanan—nga ang pagpundok sa Israel mao ang labing mahinungdanong katuyoan dinhi sa yuta. Ang kabatan-onan ug mga young adult wala lang moapil niini nga oportunidad apan nangulo usab niini. Nindot kaayo nga makita kining nanagtubo nga banggiitan sa teknolohiya nga mahimong kabahin sa usa ka mahinungdanong panaghiusa—dili ordinaryo nga pagtukod og templo, dili ordinaryo nga teknolohiya, dili ordinaryo nga gidaghanon sa mga tawo nga miapil.
Kining mga batan-on ganahan sa templo, ug nahigugma sila sa Manluluwas. Usa kini sa dakong manipestasyon sa pagpundok—ang pag-abot sa bag-ong henerasyon samtang miapil sila niini nga buhat.
Brother Rockwood: Nindot kaayo nga ang mga bata makahibalo nga sila mga anak sa Dios samtang mangandam sila sa ilang mga pakigsaad sa bunyag ug sa kaulahian moadto sa templo. Sila makahibalo nga sila makaapil isip mga anak sa pakigsaad sa pagtabang sa pagpundok sa Israel, ug kon buhaton nila kini, mahimo sila nga lig-on nga mga disipulo ni Jesukristo. Nindot kaayo nga oportunidad alang sa mga batan-on nga makahibalo kon kinsa sila ug kon unsa ang katuyoan sa Ginoo alang nila—ug nga sila gigahin gayod alang niini nga panahon, “gisangkapan sa katarong” (1 Nephi 14:14).
Sa unsang paagi nga ang buhat sa family history nakatabang sa imong kaugalingong pamilya?
Elder Hamilton: Miabot kami sa sitwasyon nga walay pag-uswag samtang nangita sa katigulangan sa akong French nga amahan sa akong apohan sa tuhod, si Adolph Cuny, kay ang kadugayon sa among pagtrabaho niini—mga dekada. Wala namo makit-i ang iyang mga ginikanan, bisan giunsa namo sa pagpangita. Apan sa miaging tuig pipila sa talagsaong mga French genealogist nga nagtrabaho sa FamilySearch mitan-aw sa among mga rekord ug, gamit ang ilang mga kahanas ug lokal nga kahibalo, nakit-an ang ginikanan ni Adolph ug gani ang iyang mga apohan.
Ang among pamilya nakahimo na sa tanan nilang mga ordinansa diha sa templo, ug nagtrabaho na kami karon sa ilang mga paryente ug mga kaliwatan. Naabli ang oportunidad sa daghan kaayong mga tawo gikan niini nga bahin sa akong family tree. Kini nga panalangin gihatag sa FamilySearch ug sa daghang mapahinungoron ug hanas nga mga tigsiksik ug mga consultant niini. Kini nga matang sa tabang magamit ni bisan kinsa nga patron sa FamilySearch—miyembro sa Simbahan o dili.
Unsa nga mga kalamboan ang imong nakita niini nga buhat?
Brother Rockwood: Sulod sa daghang katuigan, ang mga papeles gitipigan sa mga simbahan o sa mga gobyerno. Kadaghanan sa mga rekord sa kasadpang bahin nagsugod sa panahon sa AD 1500–1600. Pagka mga 1930 gisugdan nato ang paglitrato sa mga rekord gamit ang microfilm. Sa panahon nga giundang niadtong 2006, kita adunay 2.6 ka milyon ka rolyo sa mga microfilm nga atong nakolekta. Nakahukom kita nga i-digitize kadto nga mga imahe, nga morag mokabat og daghang dekada nga proyekto. Apan ang balaanong inspirasyon nagdala nato sa bag-ong teknolohiya nga nagpadali niana sa talagsaong paagi sa mubo nga panahon, nga nahuman pagka 2022. Ang labing mahinungdanong bahin niana mao ang unsay anaa lamang unta sa microfilm kadaghanan anaa na karon sa internet, pinaagi sa FamilySearch. Mahimo na ninyong maakses kini pinaagi sa smartphone, tablet, o sa computer. Ang internet mao ang nakapausab gayod sa sitwasyon.
Ang FamilySearch naghimo og dakong desisyon sa pagbalhin ngadto sa publiko nga tree—murag sama sa Wikipedia, nga mahimong matan-aw ug ma-edit sa tanan. Ang mga kausaban mainampingong gisubay, ug uban sa usa ka matang sa pamaagi sa pagpanguha og pakisayran, ang family tree sa katawhan mahimong himoon uban sa mas daghang partisipasyon ug diyotay ra nga mga sayop.
Elder Hamilton: Karon, binilyon sa katawhan ang makaakses sa internet. Aron magamit og maayo ang smartphone nga teknolohiya, ang Simbahan mipalambo og mobile nga mga app aron sa pagdala sa FamilySearch ngadto sa mga tawo bisan asa. Ang Mga Handomanan [Memories] nga app, ang Family Tree nga app, ug ang Pag-apil [Get Involved] nga app anaa na sa mga smartphone, nga nag-abli og mga oportunidad aron mapadali ang buhat sa Ginoo.
Brother Rockwood: Ania kita taliwala sa mga milagro, uban sa daghan kaayong mga templo nga gitukod ug daghan kaayong mga datos nga gikolekta sa kadaghanan. Ug sa higayon gayod nga kita nagkinahanglan niini, ang teknolohiya sa pag-organisar niini ug ang paghimo niini nga magamit sa kadaghanan gipalambo. Ang artificial intelligence nagtugot nato karon sa pag-organisar sa mga datos sa paagi nga mapangita kini ug mahubad kini ngadto sa bisan unsa nga pinulongan.
Elder Hamilton: Karon atong nakita ang katumanan sa Mga Taga-Efeso 1:10, nga nag-ingon nga “inig-abot na sa hustong panahon hiusahon niya ang tanang binuhat diha sa langit ug sa yuta ubos sa pagpangulo ni Kristo.” Usa ka paagi nga nakita nato kana nga natuman mao ang diha sa mga templo, sa mga ngalan, ug sa teknolohiya nga naghiusa pinaagi sa kamot sa Ginoo aron makahimo kita sa buhat sa templo alang sa daghang mga anak sa atong Langitnong Amahan nga andam nga modawat niini. Ug kana mao gayod ang istorya bahin sa paningkamot sa templo ug family history sa mubo nga katingbanan niini. Ang Ginoo anaa niini nga buhat, ug ang milagroso nga mga butang nahitabo. Nahitabo kini tungod kay Siya ang naggiya niini.