“Ganahan Ko Niana nga Kanta,” Liahona, Ago. 2024.
Mga Tingog sa mga Santos sa Ulahing mga Adlaw
Ganahan Ko Niana nga Kanta
Ang mga pulong sa usa ka paborito nga himno mipahinumdom sa akong inahan nga kita kinahanglang motabang niadtong nanginahanglan.
Paghulagway pinaagi ni Katy Dockrill
Ang akong inahan, si Dorothy Candland Woodruff (karon patay na), moabot unta sa Regina, Saskatchewan, Canada, usa ka hapon, apan wala siya makaabot sa iyang flight. Mao nga giusab ang iyang rota, nga moagi sa Colorado, USA, ug Calgary, Alberta. Dili siya maabot hangtod sa tungang gabii. Nasagmuyo, siya misugod sa iyang biyahe.
Ang iyang ikaduhang flight puno ug saba. Naningkamot siya nga mohimo og pipila ka buhatonon, sa dihang ang gamayng bata sa atbang misugod sa paghilak. Naglagot siya sa inahan niini, nga nagkugos og gamayng masuso. Ang amahan sa batang babaye naglingkod sa atubangan sa akong inahan nga naggunit usab og laing bata, mga singko anyos.
Ang inahan sa batang babaye hinay nga nakigsulti sa iyang anak, apan mas mikusog pa ang hilak sa bata.
“Kini nga pamilya klaro nga wala moandam sa ilang mga anak alang sa biyahe,” miingon ang akong inahan sa dihang gipakigbahin niya kini sa among pamilya. Alang sa leksiyon nga misunod, akong gamiton ang iyang mga pulong:
“Sa kataposan, ang inahan mikugos sa iyang naghilak nga anak balik ngadto sa banyo. Wala madugay, mibalik ang inahan uban sa batang babaye, nga nagluha gihapon—hilom nga mga luha, salamat na lang. Milingkod siya ug gikugos ang iyang anak, hinayhinay nga miyugyog niya. Dayon nadungog nako siya nga hinay nga mikanta og ‘Ako Anak sa Dios.’
“Nakuratan, mihangad ko gikan sa akong trabaho kay nakahibalo ko sa kanta. Gitan-aw nako ang pamilya pinaagi sa lahi nga panglantaw. Human sa pagkanta sa inahan, akong gibutang ang akong kamot sa iyang abaga ug miingon, ‘Ganahan ko niana nga kanta.’
“Nagluha, siya miingon, ‘Paborito kana sa akong siyete anyos nga anak nga lalaki. Dad-on namo siya pauli ngadto sa sementeryo sa among pamilya didto sa Montana. Namatay siya kagahapon sa grabe nga aksidente. Kaming tanan gimingaw kaayo niya.’
“Ang kaulaw misanap kanako. Gihukman dayon nako kining buotan nga pamilya, wala maghunahuna kon sa unsang paagi nga ako makatabang. Ang mga pulong sa kanta nakapaikag sa akong pagpakabana nga bisan kon dili pa sila mga Santos sa Ulahing mga Adlaw, sila mga anak gihapon sa Dios, ug kinahanglan ko nga motabang nila sa ilang panginahanglan.
“Nagmapainubsanon ko. Ang nahibilin sa among dungan nga biyahe puno sa maluhaon nga mga pagpakigbahin sa mga pagbati, mga emosyon, ug mga kasinatian nga bililhon namong duha. Nagbulag kami isip maayong mga higala nga padayong magkumustahay pinaagi sa mga sulat sa moabot nga katuigan.”