“Ang Dios Mosuporta ug Mopanalipod Kanato,” Liahona, Ago. 2024.
Ang Dios Mosuporta ug Mopanalipod Kanato
Sama ni Kapitan Moroni, kita makadawat og balaanong tabang ug gahom alang sa mga gubat nga atong giatubang sa kinabuhi.
Mga paghulagway pinaagi ni Eric Chow
Sa dihang gibasa nako ang Basahon ni Mormon sa unang higayon, nalingaw ko sa kasaysayan bahin sa mga gubat tali sa mga Nephita ug mga Lamanita. Nahingangha ko sa hugot nga pagtuo, kinaadman, ug mga taktika nga gigamit ni Kapitan Moroni, usa ka kumander sa militar nga gitudlo nga mahimong lider sa tanang Nephita nga mga sundalo dihang nagpangidaron pa siya og 25 anyos. Siya maalamon, kusgan, ug lantip og panghunahuna. Siya hingpit nga mapasaligon ngadto sa kagawasan ug kaayohan sa iyang katawhan. (Tan-awa sa Alma 48:11–12.)
Imbes nga angkonon ang kalamposan sa militar, gipasidungog ni Moroni ang kalamposan ngadto sa Dios ug ngadto sa sagrado nga suporta sa iyang mga kasundalohan nga nadawat gikan sa wala moapil sa gubat nga kababayen-an ug kabataan. Miingon siya ngadto sa usa ka lider sa napildi nga kaaway: “Ang Ginoo … mitugyan kaninyo sa among mga kamot. Ug karon ako manghinaot nga kamo kinahanglan mosabot nga kini … tungod sa among tinuohan ug sa among hugot nga pagtuo kang Kristo.” Si Moroni mipakigbahin dayon niining propetikanhong hunahuna: “Ang Dios mobulig, ug moamping, ug mopanalipod kanamo, samtang kami matinud-anon ngadto kaniya, ug ngadto sa among hugot nga pagtuo, ug sa among tinuohan” (Alma 44:3, 4).
Paglabay sa panahon, akong naamgohan nga si Moroni mipasiugda og mga baroganan nga mahimo natong magamit aron matabangan kita nga matubag ang mga hagit sa atong mga kinabuhi karon. Samtang mogamit kita sa hugot nga pagtuo diha ni Jesukristo, ang Manluluwas sa kalibotan, Siya mopanalangin nato sa Iyang gahom. Apan aron mahimo Niya kini ug aron kita makaila sa Iyang mga panalangin, kita kinahanglang makasabot sa atong katuyoan, maghimo og mga plano aron magmalamposon, ug mangandam alang sa mapasumbingayon nga mga gubat nga atong giatubang, sama sa pagpangandam ug pag-atubang ni Moroni sa tinuod nga mga gubat sa iyang kinabuhi. Kon buhaton nato kini, ang Langitnong Amahan ug si Jesukristo mobulig ug mopanalipod kanato.
Pagsabot sa Atong Katuyoan
Si Moroni balik-balik nga mipahinumdom sa katawhan kon kinsa sila (mga manununod sa pakigsaad ni Abraham), kon kang kinsa sila (pinangga nga mga anak sa Dios), ug ang katuyoan sa ilang pagpakig-away (pamilya, tinuohan, ug kagawasan). Si Moroni mitudlo sa iyang katawhan nga sila nakig-away alang sa ilang kinabuhi ug kagawasan gikan sa pagpanglupig ug pagkaulipon. Sa sukwahi, ang ilang mga kaaway nakig-away alang sa ilang kaugalingong kaayohan ug gahom pinaagi sa pagpangulipon sa uban.
Sa dihang ang ubang mga Nephita nagtinguha sa pagpangilog og awtoridad alang sa kaugalingong kaayohan, si Moroni migisigisi sa iyang kupo ug misulat diha sa piraso niini og mahinungdanong mga elemento sa iyang mensahe: “Agi og paghinumdom sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak.” Gibitay niya kini nga bandila, nga iyang gitawag og “ang bandila sa kalingkawasan,” sa tumoy sa usa ka tukon ug gigamit kini aron sa pagpahinumdom sa katawhan kon alang sa unsa ang pagpakig-away ug sa pagpamartsa kanila niana nga kawsa. (Tan-awa sa Alma 46:12–13, 19–20.)
Sa espirituhanong mga gubat sa kinabuhi, “ang atong pakigdumog dili batok sa mga binuhat nga unod ug dugo, kondili batok sa … labawng agalon niining mangitngit … [ug] batok sa mga daotan nga espirituhanon” (Mga Taga-Efeso 6:12). Kita, usab, nagkinahanglan nga pahinumdoman kon alang sa unsa ang pagpakig-away. Si Elder Neal A. Maxwell (1926–2004), kanhi sakop sa Korum sa Napulog Duha ka Apostoles, mipahayag niini nga hunahuna diha sa usa ka maalamon, mubo, nga pakighinabi.
Niadtong 2004, mibisita ko ni Elder Maxwell sa iyang lawak sa ospital sa wala pa siya mamatay. Siya mabination kaayo sa tanan nga mibisita ug mitabang niya. Ang mga tig-atiman alang sa kahimsog sa panglawas misulod sa iyang lawak ug migawas nga nanaghilak. Miingon ko niya, “Elder Maxwell, lisod kaayo kini.” Mikatawa siya ug miingon, “Oy, Dale, kita mahangtoron nga mga binuhat nga nagpuyo sa mortal nga kalibotan. Kita anaa sa sitwasyon nga dili tukma sa usa ka tawo, sama sa isda nga wala sa tubig. Gawas lamang kon kita adunay mahangtorong panglantaw nga ang bisan unsa niini mahimong makahuloganon.”
Kinahanglang dili gayod nato hikalimtan ang mahinungdanong elemento sa atong balaanong kinaiyahan ug mahangtorong padulngan ug ang daotang mga pwersa nga mosupak kanato. Ang saktong pagsabot sa plano sa Langitnong Amahan makapadasig nato nga padayong makig-away alang sa atong mahangtorong kaluwasan ug alang sa atong kagawasan gikan sa espirituhanong pagkaulipon.
Paghimo og mga Plano aron Magmalamposon
Sa tanang gubat nga ang iyang mga kasundalohan nakig-away, si Moroni naghimo og mga plano aron segurado nga magmalamposon. Migamit siya og mga espiya aron madiskobrehan ang mga kalihokan ug mga tinguha sa iyang mga kaaway. Nangayo siya og giya sa propeta, si Alma. Gigamit dayon ni Moroni kanang dinasig nga tambag diha sa iyang pamaagi sa pagpakiggubat. Siya mipadala og mga kapanguhaan sumala sa panginahanglan, mibutang og daghan pa nga mga sundalo diha sa mga siyudad nga dili kaayo lig-on. Gamit ang estratehiya nagtakda siya og mga plano sa pagsulong base sa bag-ong impormasyon.
Mao nga nakabintaha siya sa kaaway nga mga sundalo. Wala gayod siya makontento sa miaging mga kadaogan; hinuon, nagpadayon siya sa pagpalambo sa kapasidad niya ug sa iyang mga kasundalohan sa pagdumala sa umaabot nga mga hagit.
Kita mahimong mogamit sa samang mga pamaagi sa pagdumala sa espirituhanong mga kaaway. Mahimo natong sugdan pinaagi sa pag-ila kon unsay gipaningkamotan ni Satanas nga buhaton sa atong kinabuhi. Siya naningkamot sa pagbalda kanato gikan sa atong katuyoan. Kon mag-atubang og tentasyon, atong pangutan-on ang atong kaugalingon:
-
Sa unsang paagi nga kini nga aksiyon sa akong bahin matandi sa gipadayag nga pulong sa Dios?
-
Unsa ang mga sangpotanan sa paghimo niini nga aksiyon?
-
Kini ba nga aksiyon makatabang nako nga matuman ang akong katuyoan dinhi sa yuta?
Kinahanglan usab natong ilhon ang umaabot nga resulta sa pagtugyan ngadto sa bisan ginagmay nga mga tentasyon. Kon kita motugyan ngadto sa tentasyon, kita nag-inom og “hilo sa hinayhinay” (Alma 47:18), ang labing epektibo nga estratehiya nga gigamit sa gahom sa daotan nga mosangpot sa espirituhanong kamatayon.
Atong mapalig-on ang atong kaugalingon batok sa mga tentasyon ni Satanas pinaagi sa pagsunod sa giya nga atong nadawat gikan sa atong propeta sa ulahing mga adlaw. Ang pagbuhat niini makatabang nato sa pagpadayon og mahangtorong panglantaw diin matimbang-timbang ang atong mga aksiyon. Ang paghimo og mga plano kon unsaon nato sa pag-atubang ang mga tentasyon nga motumaw sa nagkalainlaing mga dapit sa atong kinabuhi makatabang nato sa paghimo og mas saktong mga pagpili nianang higayona. Ang giplano nang daan nga mga estratehiya ug mga pamaagi motabang nato sa pagpanalipod batok sa mga makabalda sa atong mahangtorong katuyoan.
Usa ka ehemplo mao kanang sa teknolohiya. Ang teknolohiya mahimong usa ka espada nga doble og suwab, parehong mapuslanon ug makadaot, depende kon giunsa nato kini sa paggamit. Aron matabangan kita sa paghimo og maalamon nga mga pagpili mahitungod sa atong mga device, ang batan-on ug tigulang mahimong magpakisayod ngadto sa “Taking Charge of Technology” ug Alang sa Kalig-on sa mga Kabatan-onan: Usa ka Giya sa Paghimo og mga Pagpili. Kini mopahinumdom nato sa atong katuyoan, mopunting nato ngadto ni Jesukristo, ug motabang nato sa pagdapit sa Espiritu Santo ngari sa atong kinabuhi. Ang pagplano kon unsaon, kon kanus-a, ug kon asa nato gamiton ang teknolohiya molig-on nato batok sa mga makadaot sa moral, og kalibotanong mga taktika.
Pagpangandam alang sa Mapasumbingayon nga mga Gubat
Naghulat sa umaabot nga gubat, si Moroni miandam sa iyang katawhan sa tinagsa-tagsa uban sa mga panagang, mga taming, mga kalo nga puthaw, ug baga kaayo nga sapot. Siya miandam sa iyang katawhan sa kinatibuk-an pinaagi sa pagtukod og mga kota libot sa siyudad, pagkalot og mga bungdo sa yuta libot niini.
Sa epirituhanong paagi, kita mangandam sa tinagsa-tagsa pinaagi sa pagsunod sa mga sugo sa Dios. Kita mohimo ug motuman sa mga pakigsaad uban sa Dios nga makapaduol sa gahom ni Jesukristo ngari sa atong mga kinabuhi. Kita moapil diha sa personal, pribado nga mga buhat sa debosyon, sama sa pag-ampo, pagpuasa, ug pagsiksik sa mga kasulatan. Kita usab mobuhat diha sa hugot nga pagtuo, motubag sa espirituhanong giya nga atong madawat. Kita mahunahunaong mangandam ug takos nga moambit sa sakramento. Kon buhaton nato kini, ang Manluluwas mahimong mas tinuod sa atong mga kinabuhi, ingon nga Siya tinuod ngadto kang Moroni, kinsa lig-on sa iyang hugot nga pagtuo diha ni Jesukristo. Si Moroni nahibalo nga makasalig siya sa Manluluwas alang sa giya ug kaluwasan (tan-awa sa Alma 48:16). Kita, usab, makasalig ni Jesukristo alang sa giya ug kaluwasan.
Kita makapangandam pa og dugang pinaagi sa pagpalig-on sa atong mga pamilya. Ang atong Langitnong Amahan miorganisar nato ngadto sa mga pamilya aron matabangan kita nga magmalipayon ug makakat-on kon unsaon nga makabalik ngadto Kaniya. Ang atong mga pamilya mahimong usa ka tinubdan sa tabang alang nato. Kitang tanan mahimong mobati sa hingpit nga kalipay ug gugma pinaagi sa paghinumdom nga kabahin kita sa dakong pamilya sa Dios, bisan unsa pa ang indibidwal nga mga kahimtang sa atong mga pamilya.
Kita sa kinatibuk-an makabaton og kalig-on ug makapangandam sa atong espirituhanong mga gubat kon kita moapil diha sa mga komunidad sa mga Santos. Ang atong mga stake ug mga district naghatag og ingon nga dapit nga kadangpan ug kapanalipdan. Kita makaamuma sa usag usa sa espirituhanong paagi, makatabang sa usag usa nga mosunod sa mga sugo sa Dios, ug moawhag sa usag usa nga mosalig ni Kristo, sa kanunay ug labi na sa mga panahon sa hagit. Kon kita magkapundok, atong maamgohan nga kita wala makig-away sa atong mga gubat nga nag-inusara. Kita adunay mga higala, mga magtutudlo, ug mga lider nga makatabang ug makapanalipod kanato. Kitang tanan mas lig-on kon kita manag-uban sa pagpangandam.
Sa talagsaong paagi, gipasidungog ni Moroni ang tanan nga kalipay sa Iyang katawhan ngadto sa ilang hugot nga pagtuo diha sa Dios ug sa ilang tinuohan. Sama ni Moroni, kinahanglan nga atong maamgohan nga ang hingpit nga kalipay moabot tungod sa Langitnong Amahan ug sa Iyang plano ug tungod ni Jesukristo ug sa Iyang Pag-ula. Kon atong masabtan ang atong katuyoan, maghimo og mga plano aron magmalamposon, ug mangandam alang sa mapasumbingayon nga mga gubat, kita makadawat og balaanong tabang ug gahom.
Sama ni Moroni, ako nasayod nga ang Langitnong Amahan ug si Jesukristo nagdala og labing mahinungdanong kagawasan gikan sa pagkaulipon—kagawasan gikan sa kamatayon ug sala. Sila mipanalangin kanato sa Ilang gahom kon kita mosalig Kanila diha sa tanang butang.