“Nagkalig-on diha sa Hugot nga Pagtuo ni Kristo,” Liahona, Ago. 2024.
Dali, Sunod Kanako
Nagkalig-on diha sa Hugot nga Pagtuo ni Kristo
Unsaon nato sa pagpalambo og hugot nga pagtuo diha ni Jesukristo nga makasarang bisan unsa pa ang mahitabo sa kinabuhi?
Diha sa ikatulong kapitulo sa Helaman, mabasa nato ang bahin sa usa ka panahon sa “nagpadayon nga kalinaw” (Helaman 3:23) ug “hilabihan ka dako nga kauswagan sa simbahan” (Helaman 3:24). Liboan ang nabunyagan, ug “daghan kaayo ang mga panalangin nga gibu-bo diha sa mga katawhan” hilabihan ka daghan “daghan kaayo ang mga panalangin nga gibu-bo diha sa mga katawhan nga bisan ang halangdon nga mga pari ug ang mga magtutudlo sa ilang mga kaugalingon natingala sa walay sukod” (Helaman 3:25).
Subo lang, pipila “sa mga katawhan kinsa nagpatuo nga mga sakop sa simbahan sa Dios” (Helaman 3:33) nahimong mapagarbohon ug misugod sa pagpanglutos sa ilang isigka miyembro sa Simbahan (tan-awa sa Helaman 3:34). “Karon kini … nakapahimo sa ubay-ubay nga mapainubsanon nga bahin sa mga katawhan sa pag-antos sa dako nga pagpanggukod, ug sa pag-ubog sa dako nga kasakitan” (Helaman 3:34).
Naghunahuna ko nga sakit kaayo kini labi na sa mapainubsanon nga mga miyembro sa Simbahan. Human sa tanan, pipila lang ka tuig sa wala pa kana, ang mga tawo nagtinabangay sa pagpakig-away aron mapildi ang Lamanita sa pagpang-ataki (tan-awa sa Helaman 1). Niining higayona, hinuon, ang mga kasakit nagagikan sa sulod. Ang mga tiglutos mao kadtong ilang nahimamat ug nakauban sa pag-ampo ug nakaila ug nakauban sa pagsimba.
Taliwala niini nga mga pag-antos, giunsa sa “ubay-ubay nga mapainubsanon nga bahin sa mga katawhan” sa pagtubag? Unsa ang nakatabang nila nga makalahutay sa murag kataw-anan nga pagalutoson niadtong nagpatuo kaniadto nga isigka mga disipulo ni Kristo?
Ang Helaman 3:35 naghatag og tubag: “Sila nagpuasa ug nag-ampo sa kanunay, ug nag-anam sa pagkalig-on ug pagkalig-on diha sa ilang pagpaubos, ug nagkalig-on ug nagkalig-on diha sa hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan, oo, ngadto sa paglimpyo ug pagbalaan sa ilang mga kasingkasing, diin nga pagbalaan moabot tungod sa ilang pagtugyan sa ilang mga kasingkasing ngadto sa Dios.”
Atong ikonsiderar kon unsaon nga kita, sama sa mga Santos sa panahon ni Helaman, mahimong “nagkalig-on ug nagkalig-on diha sa hugot nga pagtuo ni Kristo” samtang kita manag-ubang moatubang sa gihulagway ni Presidente Russell M. Nelson isip ang “labing komplikado nga panahon sa kasaysayan sa kalibotan,” usa ka panahon sa “dili ordinaryo nga mga hagit.”
Duha ka Ehemplo sa Hugot nga Pagtuo ni Nephi
Ang mga kasulatan puno sa mga kasinatian sa mga lalaki ug mga babaye kinsa nagkalig-on ug nagkalig-on diha sa ilang hugot nga pagtuo ni Kristo samtang nag-atubang og mga hagit sa ilang panahon. Pananglitan, palihog pamalandongi ang matinud-anong tubag ni Nephi ngadto sa duha ka kasinatian nga lisod kaayo sa espirituhanong paagi nga hapit parehas ra sa sinugdanan apan managlahi sa hagit diha sa kataposan.
Samtang si Nephi ug ang iyang mga igsoong lalaki mibalik gikan sa Jerusalem uban ni Ishmael ug sa iyang pamilya, si Laman ug si Lemuel ug ang pipila sa lain pa mirebelde (tan-awa sa 1 Nephi 7:6–7). Si Nephi misulti nga maghinulsol sila ug nangamuyo nila sa paghinumdom sa Ginoo (tan-awa sa 1 Nephi 7:8–15). Si Laman ug si Lemuel nasuko ni Nephi ug gigapos ang iyang mga kamot og mga tiil gamit ang mga higot ug gibiyaan siya aron mamatay sa kamingawan (tan-awa sa 1 Nephi 7:16).
Bisan kon sakit kaayo ang gibuhat sa iyang mga igsoong lalaki, ug bisan pa sa kahadlok nga tingali iyang gibati, si Nephi mipili nga magpabiling lig-on diha sa iyang hugot nga pagtuo ni Kristo. Siya “nag-ampo ngadto sa Ginoo, nag-ingon: O Ginoo, sumala sa akong hugot nga pagtuo diha kanimo, luwasa ako gikan sa mga kamot sa akong igsoon nga mga lalaki; oo, gani hatagan mo ako sa kusog nga ako makabugto niini nga mga pisi diin ako gigapos” (1 Nephi 7:17).
Ang pag-ampo ni Nephi gitubag dihadiha dayon ug sa milagrosong paagi! “Ang mga pisi nahubad gikan sa [iyang] mga kamot ug mga tiil, ug [siya] mibarog sa atubangan sa [iyang] mga igsoon, ug … nakigsulti kanila” (1 Nephi 7:18). Ang kasingkasing ni Nephi napuno tingali sa pagpasalamat sa Ginoo sa pagluwas kaniya.
Dili kini, hinuon, ang kataposang higayon nga si Laman ug si Lemuel migapos sa ilang igsoong lalaki og mga higot. Ug sa sunod nga higayon, ang kaluwasan ni Nephi lahi kaayo kaysa unang higayon ug momatuod, sa makausa pa, sa kalig-on sa hugot nga pagtuo ni Nephi diha ni Kristo.
Daghang katuigan ang milabay, samtang mitabok sa dagat paingon sa gisaad nga yuta, si Laman ug si Lemuel ug ang mga anak nga lalaki ni Ishmael misugod sa paghimo og “hilabihan nga pagkalaw-ay” ug sa paghikalimot sa gahom sa Ginoo nga nakapanalangin sa ilang panaw (tan-awa sa 1 Nephi 18:9). Si Nephi misulti na usab nila nga maghinulsol, ug si Laman ug si Lemuel nasuko na usab kaniya (tan-awa sa 1 Nephi 18:10). Sama gayod sa ilang gibuhat kaniadto, gikuptan nila si Nephi ug gigapos siya gamit ang lig-ong mga higot (tan-awa sa 1 Nephi 18:11–12).
Unsa kaha ang gihunahuna ni Nephi sa dihang gigapos siya gamit ang mga higot sa ikaduhang higayon? Unsa kaha ang hunahunaon nimo ug nako kon atong makita ang atong kaugalingon nga anaa na usab niini nga sitwasyon? Tingali maghunahuna kita, “Nakasinati na ko niini kaniadto! Kahibalo na ko unsay buhaton. Kon mag-ampo ko sa Ginoo, Siya moluwas nako dihadiha dayon ug sa milagrosong paagi.” Kita wala mahibalo sa gihunahuna ni Nephi, apan kita nahibalo nga bisan kon parehas ra kining duha ka kasinatian, ang dihadiha dayon nga mga resulta managlahi. Niining higayona, si Nephi wala luwasa dihadiha dayon gikan sa iyang mga igsoong lalaki, kondili nag-antos siya og upat ka adlaw diha sa ilang mga kamot (tan-awa sa 1 Nephi 18:14–15).
Nahinumdom sa iyang kasinatian kaniadto, si Nephi tingali nag-ampo uban sa dakong pagsalig alang sa dihadiha nga kaluwasan. Sa dihang walay miabot nga ingon niana nga kaluwasan, si Nephi tingali nawad-an unta og kadasig, ang iyang hugot nga pagtuo nahuyang unta pinaagi sa pagduhaduha. Samtang ang mga oras ug mga adlaw milabay, ug ang iyang kasakit nagkagrabe, ang nagkadako nga kabug-at nianang pagkawalay kadasig ug pagduhaduha mahimong makaguba sa hugot nga pagtuo ni Nephi. Mahimo siya nga magbagulbol, “Nganong wala man ko giluwas?” Ang iyang hugot nga pagtuo mas dako ba kaha karon—mas naglambo ug mas nalig-on—kaysa kaniadto nga gigapos siya sa unang higayon? Kon ang iyang hugot nga pagtuo wala pa molambo pinaagi sa gamhanang mga kasinatian sa Liahona, sa iyang nabali nga gapasan, ug sa usa ka barko nga gitukod ubos sa pagmando mismo sa Ginoo?
Imbes mawad-an og kadasig o magduhaduha, si Nephi nagpabiling lig-on diha sa iyang hugot nga pagtuo. Ang iyang hugot nga pagtuo wala nakasentro sa panahon o pamaagi sa iyang kaluwasan, ni ang iyang hugot nga pagtuo nagdepende sa gilaoman nga resulta. Ang iyang hugot nga pagtuo walay kondisyon. Ang hugot nga pagtuo ni Nephi lig-on nga nakasentro ni Jesukristo—bisan unsa pa ang mahitabo. Tungod nianang hugot nga pagtuo, nakahimo siya sa pagsulat, “Ako midangop sa akong Dios, ug ako midayeg kaniya sa tibuok adlaw; ug wala ako magbagulbol batok sa Ginoo tungod sa akong mga kasakit” (1 Nephi 18:16).
Palihog hinumdomi nga ang kalig-on sa hugot nga pagtuo ni Nephi diha ni Kristo nagtugot kaniya nga makakaplag og kahupayan taliwala sa iyang mga kasakit ug mapuno sa gugma alang sa Dios bisan pa man sa iyang kasakit. Siya ang panig-ingnan sa unsay gitudlo sa iyang igsoong lalaki nga si Jacob sa kaulahian:
“Tan-aw ngadto sa Dios uban ang kalig-on sa hunahuna, ug pag-ampo ngadto kaniya uban sa hilabihan ka hugot nga pagtuo, ug siya mohupay kaninyo sa inyong mga kasakit, ug siya mohangyo alang sa inyong katuyoan. …
“… Ipataas ang inyong mga ulo ug dawata ang makapahimuot nga pulong sa Dios, ug pagbusog sa iyang gugma; kay kamo makahimo, kon ang inyong mga hunahuna malig-on, sa kahangtoran” (Jacob 3:1–2).
Kita Makapadayon diha sa Hugot nga Pagtuo
Si Nephi ug ang mga Santos sa panahon ni Helaman nakahatag nato og paglaom nga, uban sa tabang sa Ginoo, kita mahimong magkalig-on diha sa atong hugot nga pagtuo ni Kristo. Samtang magbasa ka niini, tingali maghunahuna ka kon kini nga paglaom magamit ba nimo. Mokuha kitang tanan og kahupay ug kaisog gikan niini nga mga pulong gikan sa atong pinalangga nga propeta, si Presidente Nelson:
“Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo gayod Siya kanato nga motuo. …
“… Ang Manluluwas mas duol kaninyo kon mag-atubang kamo o magsagobang og kalisdanan uban sa hugot nga pagtuo.”
Sa kataposan, sama sa gitudlo ni Elder D. Todd Christofferson sa Korum sa Napulog Duha ka Apostoles, “kadaghanan nato makakita sa atong kaugalingon niining duha ka nagkalahi nga sitwasyon tali sa nadasig nga moapil sa mga tulumanon sa ebanghelyo tungod sa sosyal nga mga konsiderasyon apan mapakaaron-ingnon sa pagbuhat sa mga butang nga may kalabotan sa ebanghelyo ug sa laing bahin ang hingpit nga paglambo sa Kristohanon nga pasalig ngadto sa kabubut-on sa Dios. Niining duha ka nagkalahi nga sitwasyon, ang maayong balita sa ebanghelyo ni Jesukristo mosulod sa atong kasingkasing ug moangkon sa atong kalag. Tingali dili kini mahitabo diha-diha, apan kita kinahanglan nga nagpaingon nianang bulahan nga kahimtang.”
Busa, taliwala sa talagsaong mga pagsulay ug mga kalisdanan sa atong panahon, hinaot nga kita magtinguha—sa makausa pa—nga mopili sa hugot nga pagtuo diha ni Jesukristo, usa ka hugot nga pagtuo nga makasarang bisan unsa pa ang mahitabo sa kinabuhi. Hinaot nga kita maningkamot ug magpuasa ug mag-ampo nga mag-anam og kalig-on diha sa hugot nga pagtuo ni Kristo ug, uban sa lig-ong mga hunahuna, makadawat og kahupayan sa atong mga kasakit ug magpakabusog sa Iyang gugma sa kahangtoran.
Niana nga katuyoan, ako mopamatuod bahin sa katinuod sa espesyal nga pagsaksi ni Presidente Nelson: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo.”