Digital Lamang: Mga Pagtulun-an sa mga Lider sa Simbahan gikan sa Social Media
Mga Anak sa Dios ug Iyang Gugma
Tan-awa kon unsa ang bag-ohay lang nga gitudlo sa mga propeta ug ubang mga lider sa Simbahan diha sa social media kabahin kon sa unsang paagi kitang tanan mga anak sa Dios.
Ang Salmo 82:6 nagpahinumdom kanato sa atong balaanon nga panulundon: “Mga dios kamo; nga kamong tanan mga anak sa Labing Halangdon.”
Sa samang paagi, si Presidente Russell M. Nelson kinasingkasing nga mihangyo kanato nga mahibalo sa kamatuoran mahitungod kon si kinsa kita:
“Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa ‘Ako Anak sa Dios.’ Apan kana ba nga mahangtoron nga kamatuoran napatik sa inyong kasingkasing? …
“Ang kalibotanon nga mga timailhan dili gayod mohatag kaninyo og panglantaw kon kinsa kamo mamahimo sa kataposan. Kini dili gayod momatuod sa inyong balaanon nga DNA o sa inyong walay limitasyon, balaanon nga potensiyal. …
“… Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya.”
Ang mga lider sa Simbahan namulong sa kinatibuk-ang komperensiya mahitungod sa atong balaanong panulundon isip mga anak sa Dios (tan-awa ang “diosnong kinaiya” ug “indibidwal nga bili” nga mga koleksiyon). Mipakigbahin usab sila og mga mensahe mahitungod niini nga mga hilisgotan diha sa social media, lakip na sa mosunod:
Kamo Mga Anak sa Dios, usa ka Lahi nga Balaang Panulondon
“Makaluya kining mga panahona kanatong tanan, apan ang ebanghelyo ni Jesukristo naghatag kanato og igong rason nga magmaya. Pinaagi sa Iyang propeta, gihatagan kita sa Dios og hagit nga molahutay sa mga kalisdanan, ug ang mga pagtulun-an ni Jesukristo naglatid sa dalan padulong sa atong balaang destinasyon nga kinabuhing dayon. Nasayod kamo nga kamo mga anak sa Dios, usa ka lahi nga balaang panulondon. Gihigugma kamo sa Dios. Siya gamhanan nga tiggiya, ug misaad Siya nga motabang kaninyo kon kamo mangita Kaniya sigon sa Iyang gitudlo.
“Isilsil sa inyong hunahuna ug sa inyong personal nga mga prayoridad ang puno sa gahom nga kamatuoran nga kamo hinigugmang anak sa Dios. Ang Iyang gugma naghatag kaninyo og pagtahod sa kaugalingon, kusog, ug kadasig nga mobatok sa bisan unsang suliran nga inyong atubangon sa inyong kinabuhi. Ug ayaw gayod kalimot nga ang Iyang mga sulugoon nahigugma kaninyo. Kami nagmahal kaninyo. Sa atong tanan nga kabalaka, samtang maningkamot kita sa atong tanan nga hagit, awhagon ko kamo nga magmadasigon, kay Iyang gibuntog ang kalibotan. Mao usab kita. Hinumdomi, ang plano sa atong Langitnong Amahan usa ka plano sa kalipay.”
Presidente Dallin H. Oaks, Facebook, Mayo 22, 2023, facebook.com/dallin.h.oaks.
Ang Dios Dili Mohunong sa Paghigugma Kaninyo
“Dili igsapayan sa inyong kinaiya ngadto sa Dios, Siya dili mohunong sa paghigugma kaninyo.
“Kapila man magmapailobon ang Langitnong Amahan kaninyo?
“Labaw pa sa inyong mahunahunaan.
“Kapila man Siya mopasaylo kaninyo?
“Labaw pa sa inyong bation nga kamo angayan.
“Kapila man kamo amumahon ug hupayon Niya?
“Labaw pa gayod sa inyong mahibaloan.
“Walay kataposan sa grasya ug kaluoy sa atong mabination nga Dios. Walay mga limitasyon sa kalawmon sa Iyang gugma. Walay babag sa Iyang kaluoy alang sa Iyang mga anak.
“Ang Dios dili maoy atong oposisyon. Siya ang atong tigtudlo. Atong giya. Atong tig-ayo. Atong Manluluwas.
“Ang Iyang giangkon nga katuyoan ug labing dako nga kalipay mao ang atong kalipay hangtod ngadto sa imortalidad ug kinabuhing dayon.”
Elder Dieter F. Uchtdorf, Facebook, Feb. 8, 2023, facebook.com/dieterf.uchtdorf.
Ang Dios Nasayod sa Atong Walay Kataposan nga Potensiyal
“Kon ang Langitnong Amahan motan-aw kanato, Iyang mga anak, Siya nakakita kanato kon kinsa gayod kita. Siya nasayod sa tanan mahitungod kanato. Atong mga kahadlok, kaguol, ug atong pag-inusara. Apan Siya nahibalo usab ug nagmaya sa atong hugot nga pagtuo, sa atong matarong nga mga tinguha ug mga kadaogan. Siya nagsaulog sa mga higayon nga kita nakabuntog sa mga babag, kon kini man pisikal, mental, emosyonal, o espirituwal. Apan labaw sa tanan, Siya nasayod sa atong walay kataposan nga potensiyal. Ang inyong walay kataposan nga potensiyal. Siya nakakita sa labing maayong bersiyon kanato, ang mahimayaon nga tawo nga kita adunay potensiyal nga mamahimo.
Samtang kamo mosunod sa atong minahal nga Manluluwas, si Jesukristo, ang inyong hugot nga pagtuo motubo. Ang inyong pagsalig magmalig-on, ug usa ka adlaw, kamo seguradong mahibalo nga ang inyong mga paningkamot adunay bili sa panaw. Mahimo ninyo kini. Tuo. Tuo sa Dios. Tuohi ang inyong kaugalingon. Pilia nga mosunod sa Manluluwas. Paduol ngadto sa inyong Langitnong Amahan, ug Siya magpaduol kaninyo.”
Elder Dieter F. Uchtdorf, Facebook, Sept. 18, 2023, facebook.com/dieterf.uchtdorf.
Kamo Kabahin sa Pamilya sa Ginoo
“Ako moseguro kaninyo nga kon kamo minyo o dili minyo, adunay dako nga pamilya o gamay nga pamilya, kamo kabahin gihapon sa pamilya sa Ginoo. Ako nagmaya nga ang halangdong plano sa kaluwasan igo ang gidak-on alang sa tanang anak sa Langitnong Amahan. Ug labi nga mapasalamaton gayod ko nga ang plano sa Dios naghatag og paagi alang sa mga relasyon sa pamilya nga magpadayon human sa kamatayon. Ako nagpamatuod nga kon kita mobalik ngadto sa presensiya sa Dios, kita mahiusa sa kahangtoran uban niadtong atong labing gimahal.”
Elder Quentin L. Cook, Facebook, Mayo 15, 2023, facebook.com/quentin.lcook.
Ang Langitnong Amahan Personal nga Nakaila ug Nahigugma Kanato
“Klaro kini nga kita adunay Amahan sa Langit nga personal nga nakaila ug nahigugma kanato ug hingpit nga nakasabot sa atong pag-antos. Ang Iyang Anak, si Jesukristo, mao ang atong Manluluwas ug Manunubos.
“Ang plano sa atong Amahan alang sa kalipay sa Iyang mga anak naglakip dili lang sa kinabuhi sa wala pa dinhi sa yuta ug sa mortal nga kinabuhi apan sa kinabuhing dayon usab, lakip na ang dako ug mahimayaong paghiusa og balik uban niadtong nawala kanato. Tanang sayop tarongon, ug atong makita uban sa hingpit nga kaklaro ug sa kawalay sayop nga panglantaw ug panabot.”
Elder Quentin L. Cook, Facebook, Oct. 19, 2023, facebook.com/quentin.lcook.
Matag Henerasyon Kinahanglang Makasabot Kon Kinsa Sila
“Matag henerasyon kinahanglang makasabot kon kinsa sila ug sa ilang mahangtoron nga pagkatawo. [Kini mahimong] lisod sabton tungod kay ang kaaway dili gusto nga kamo makabaton og klaro nga pagsabot sa Dios nga Amahan ug ni Jesukristo ug sa Ilang plano sa kalipay alang kaninyo ug kon si kinsa kamo ngadto Kanila.
“Ang leksiyon mao nga dili itugot ang pagduhaduha o kawalay pagtuo nga mobuntog sa atong pagtuo.”
Elder Quentin L. Cook, Facebook, Dec. 7, 2023, facebook.com/quentin.lcook.
Ang mga Templo usa ka Pagpahayag sa Gugma sa Dios
“Ang pagtukod sa … mga templo sa tibuok kalibotan sa pagkatinuod usa ka pagpahayag sa gugma nga aduna ang Langitnong Amahan alang sa Iyang mga anak. Kini usab usa ka pagpamatuod nga ang atong Langitnong Amahan buhi ug nga Siya nagpakabana mahitungod sa mahangtoron nga kaluwasan sa Iyang mga anak nga lalaki ug mga anak nga babaye sa tanang dapit. Kini usa ka matahom nga pagpamatuod sa balaan nga panglantaw ug plano nga aduna ang Dios alang kanato, Iyang mga anak, sa atong kagikan, ug kaliwatan.”
Elder Ulisses Soares, Facebook, Oct. 9, 2023, facebook.com/soares.u.
Ang Dios Kanunay nga Nahibalo sa Inyong mga Panginahanglan, mga Hagit, ug mga Tinguha
“Akong dili minyo nga mga sister, hibaloi nga gibati nako nga mamulong kaninyo ug sa tanan nakong mga sister kinsa nagkinahanglan nga mahibalo nga sila gihigugma ug nailhan sa atong Langitnong Amahan. …
“Minahal nga matahom nga kababayen-an ug mga anak nga babaye sa Dios, nasayod ako nga ang atong Langitnong Amahan ug Manluluwas nahibalo kaninyo. Nahigugma Sila kaninyo. Nakadungog Sila sa mga pangamuyo sa inyong kasingkasing, sa inyong mga kabalaka, sa inyong mga kasubo, sa inyong mga kalipay. Kamo wala gayod mag-inusara. Kamo makakaplag og hingpit nga pagsabot diha Kanila. Gilaoman kamo nga makig-uban sa Ginoo sa gamhanang paagi pinaagi sa inyong mga pakigsaad. Sa Isaias kapitulo 49 ang Ginoo naghatag kanato og panabot sa Iyang dako nga gugma alang kaninyo ug kanako. Sa [mga bersikulo 14–16] kini nag-ingon:
“‘Apan ang Zion miingon, Gibiyaan na ako sa Ginoo, nalimot na siya kanako.
“‘Makalimot ba ang usa ka inahan sa iyang anak nga masuso? Dili ba niya mahalon ang iyang anak? Apan bisan pag malimot ang inahan sa iyang anak ako dili gayod malimot kanimo.
“‘Tan-awa, … gikulit ko ang imong ngalan diha sa akong mga palad; ang imong mga paril kanunay kong gibantayan.’
Siya kanunayng nahibalo sa inyong mga paril—inyong mga panginahanglan, mga hagit, mga tinguha. Wala gayoy panahon nga kamo wala sa Iyang hunahuna ug sa Iyang kasingkasing. Gikulit kamo diha sa mga palad sa Iyang mga kamot. Gihigugma ko kamo, ug ako nag-ampo nga kamo makakaplag og maayo nga pag-alima, pagkaayo, ug kalinaw diha sa walay kapakyasan nga gugmga sa Dios alang kaninyo isip Iyang anak nga babaye.”
Sister Kristin M. Yee, Facebook, Mar. 8, 2023, facebook.com/RS2ndCounselor.
Ang Gugma ug Kahayag sa Dios Mohimo sa Atong Balaan nga Pagkatawo nga Labing Importante
“Nagdako sa Queens, New York, usahay mibati ko nga nahisalaag sa mga pundok sa katawhan nga nagpuyo diha sa siyudad nga daghan kaayong tawo. Usahay mibati ko nga nahilayo gayod ug nag-inusara, bisan og gipalibotan ko og daghan kaayong mga tawo.
“Sa dihang gipaila ko ngadto sa ebanghelyo ni Jesukristo, nagsugod ko nga makasinati sa Kahayag ni Kristo nga miabot sa akong kinabuhi. Samtang midawat ko sa mga imbitasyon nga mobasa sa mga kasulatan, mag-ampo, ug mamalandong, ang kahayag sa sulod nako nagsugod sa pagtubo. Gibati nako nga nailhan gayod sa Dios, kaysa gibati nako kaniadto nga wala mailhi ni bisan kinsa.
“Isip usa ka tin-edyer, sayo akong misalig niana nga kahayag, ug ako nagpabilin nga misalig niana hangtod karong adlawa. Si Presidente Russell M. Nelson nagtudlo nga kini ‘gikinahanglan’ nga makasinati sa gugma sa Langitnong Amahan ug ni Jesukristo—ilabi na sa atong kasamtangang adlaw ug panahon. Mapasalamaton ako alang niadtong importante kaayo nga kasinatian sa akong pagkabatan-on ug nga ang Ilang gugma ug kahayag nagpadayon sa pagdasig kanako nga mopadayon karon.
“Ang gugma ug kahayag sa Dios nagpabilin sa akong balaan nga pagkatawo isip usa ka minahal nga anak nga babaye sa Dios nga labing importante ug mao ang paagi nga ako mipili sa pagpresentar sa akong kaugalingon ug pagpangita sa akong agianan sa akong inadlaw nga kinabuhi. Kini mitugot usab kanako nga makakita sa pagkabalaan sa tanang anak sa Dios—akong mga igsoon nga lalaki ug mga igsoon nga babaye. Ang gugma sa Dios makatandog gayod sa kinahiladman sa mga kasingkasing sa Iyang mga anak. Kon mabati nato kini—kon masinati nato kini alang sa atong mga kaugalingon—kita makahibalo kon nganong ‘kini ang labing madanihon sa tanan nga mga butang … ug ang labing hingpit nga kalipay ngadto sa kalag’ (1 Nephi 11:22–23).”
Sister Tracy Y. Browning, Facebook, July 27, 2023, facebook.com/Primary2ndCounselor.