Ang Gahom sa Tinuyo, Makanunayon nga Paningkamot

Imahe

mga kahil nga adunay mga nagtulo nga tubig niini

Ang atong gamay, yano, makanununayon nga mga desisyon makaapekto sa dagan sa atong mga kinabuhi.

Ikonsiderar, pananglitan, ang gahom sa usa ka makanununayon nga pagtulo sa tubig. Si Elder David A. Bednar sa Korum sa Napulog Duha ka Apostoles sa makausa mihulagway sa baroganan sa gagmay ug yano nga espirituwal nga pag-amuma pinaagi sa pagpasabot sa trabaho sa sistema sa pagpatulo sa patubig [irrigation]: “Ang kanunay nga pagtulo sa tubig motuhop ngadto sa yuta ug mohatag og grabe nga kaumog sa yuta diin ang mga tanom motubo. Sa samang paagi, kon ikaw ug ako makatutok ug kanunay makadawat og tinulo sa espirituhanong pag-amuma, nan ang mga gamot sa ebanghelyo makatuhop sa atong kalag, lig-on nga maestablisar ug adunay maayong pundasyon, ug makapamunga og dili ordinaryo ug lamian nga bunga.”

Ang “dako nga kausaban sa [atong] mga kasingkasing” (Alma 5:14) mahimong mao ang resulta sa gagmay, makanunayon nga mga desisyon. Ang desisyon nga mobasa sa Basahon ni Mormon matag adlaw, mag-ampo, o magbuhat og maayong buhat aron sa pagpagaan sa gisagubang sa usa ka tawo tingali ingon og dili importante. Apan “pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Samtang gagmay nga mga tinulo sa tubig makaamuma, kini makabanlas usab. Sa samang paagi, ang gagmay nga mga desisyon sa atong mga kinabuhi mosangpot ngadto sa pag-uswag—ngadto sa Manluluwas—o ngadto sa pagkabanlas sa atong mga pagpamatuod, palayo gikan Kaniya. Ang kanunay nga pagbaliwala sa gagmay nga mga aksiyon nga mokonektar nato ngadto ni Jesukristo sa hinay-hinay makapahuyang sa hugot nga pagtuo ug sa pasalig nga magduhaduha.

Si Presidente Russell M. Nelson mitudlo: “Samtang magtinguha kita nga mahimong mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan kini og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulon-an, sa Iyang mga kamatuoran.” Ang pagduol ngadto ni Jesukristo naglakip og tinuyo nga paghimo og gagmay nga mga kausaban sa atong mga kinabuhi.

Siyempre, adunay mga panahon nga mas tulukibon nga kausaban ang gikinahanglan. “Kon kita nalambigit sa bug-at nga mga sala, ang Ginoo klaro ug dili kasaypan; kinahanglan kitang mohunong, mangayo og tabang gikan sa atong bishop, ug mosalikway niana nga mga binuhatan dihadiha dayon.” Sa kadaghanan sa mga sitwasyon, hinuon, kita makatan-aw sa ingon og gagmay natong mga aksiyon aron sa pag-usab sa atong kinaiya.

Kon kamo mamalandong og balik sa inyong kinabuhi, makita ninyo nga ang inyong gagmay, nakasentro ni Kristo nga mga pagpili nadugang ngadto sa tinuod nga kausaban. Sa kasagaran dili magkinahanglan og tulukibon nga kausaban—nagkinahanglan lamang og gagmay nga desisyon, ug dayon lain na usab nga gagmay nga desisyon, ug lain na usab, nga mopadulong ngadto ni Kristo.