Digital Lamang: Mga Young Adult
Kinsa ang Nagdasig Kanimo sa Pagsunod sa Ebanghelyo?
Ang tagsulat taga Taipei, Taiwan.
Sa dihang akong naamgohan nga nagsalig ko sa uban sa pagpalig-on sa akong pagpamatuod, mihukom ko nga nagkinahanglan ko nga motutok sa akong personal nga relasyon sa Manluluwas.
Sa dihang nagsugod na ko sa akong unang semestre sa kolehiyo sa Estados Unidos mahinamon kaayo ko. Nagtungha ko sa eskwelahan uban sa daghan kaayo nga mga miyembro sa Simbahan, ug wala pa gyod ko sukad napaliboti og daghang tawo sa akong pangedaron nga parehas og pagtuo nako! Naglaom ko nga kaming tanan managsama og sumbanan ug motabang sa usag usa nga molambo sa espirituhanon ug sa kinaadmanon.
Apan, nakurat ko sa dihang ang akong mga gilaoman medyo wala nakab-ot.
Didto sa akong lugar nga gipuy-an sa siyudad sa Taiwan, ang mga miyembro sa Simbahan sa kanunay ingon og giseryoso gayod ang ebanghelyo. Wala gayod nila sipyata ang kahigayonan sa pagkonektar ngadto kang Jesukristo, ug ingon usab ako. Didto, moadto ako sa templo sa matag bulan uban sa akong manghod nga babaye (kinsa kanunayng nagdasig kanako sa pag-adto), dili gayod ako mopalta sa mga miting sa simbahan (tungod sa akong mga ginikanan), ug kanunay akong naningkamot sa paghimo og mga desisyon nga nagpabilin kanako nga konektado ngadto sa Espiritu, sama sa gibuhat sa mga tawo nga nagpalibot kanako.
Apan sa eskwelahan, samtang walay usa nga motuyo sa paglapas sa mga sugo, alang sa pipila ka tawo, ang ebanghelyo ingon og anaa sa ubos sa lista sa ilang mga buhatonon. Ang uban kanila naghimo og mga pagpili nga mas duol ra sa sumbanan sa kalibotan kay sa ebanghelyo. Sa unang higayon nga ako nagkinaugalingon, nahimo kong busy ug wala kaayo kabantay nga miapil na sa gibuhat sa uban sa akong palibot. Nakita nako kon unsa kadali nga maimpluwensiyahan sa kalibotan sa imong palibot kon wala nimo giuna ang ebanghelyo.
Pagpasiga og usab sa Kadasig sa Espirituhanong Paglambo
Kon ang mga higala nga nagpalibot kanako mohimo og mga desisyon nga dili sa kanunay mahiuyon sa mga sumbanan sa ebanghelyo, maghunahuna dayon ko kon nagsunod ba ko sa usa ka paagi nga subra ra ka espirituhanon kaayo. Naghunahuna ko kon ako ba ang nalahi—kon giseryoso ra ba nako pag-ayo ang ebanghelyo. Misugod ko sa pagbati og kaguol, ilabi na sa simbahan. Mibati ko nga natintal nga usbon ang akong mga sumbanan aron mohaom sa mga tawo nga nagpalibot nako.
Apan, nianang mga higayona, si Presidente Russell M. Nelson mipakigbahin og usa ka gamhanang mensahe diha sa kinatibuk-ang komperensiya:
“Wala kita sukad magkinahanglan og positibo nga espirituhanong paglambo labaw kay sa karon. … Ang espirituhanong paglambo makatabang nato nga makasugakod sa walay puas, nga daotang pag-atake sa kaaway ug pagsanta sa iyang mga paningkamot sa pagguba sa atong personal nga espirituhanong pundasyon.
“… Awhagon ko kamo sa pagsubay sa dalan sa pakigsaad ug magpabilin didto. Sinatia ang hingpit nga kalipay sa paghinulsol matag adlaw. Magkat-on mahitungod sa Dios ug sa unsang paagi Siya naglihok. Tinguhaa ug laomi ang mga milagro. …
“Samtang inyong lihokon kini nga mga tinguha, ako mosaad kaninyo og katakos nga makapadayon sa dalan sa pakigsaad uban sa nagkadugang nga kadasig sa paglambo, bisan unsa ang mga babag nga inyong giatubang.”
Niana nga higayona sa kalit nakaamgo ko.
Nahimo ko nga mas interesado sa unsay gibuhat sa uban kay sa akong kaugalingong personal nga relasyon sa Manluluwas. Gani nakaamgo ko nga ang akong eskwelahan tupad ra sa usa ka templo ug wala pa ko nakaadto didto! Naklaro usab kini kon unsa ka dako ang akong pagsalig sa uban sa pag-impluwensiya sa akong espirituwalidad didto sa Taiwan.
Kinahanglan ko nga maningkamot sa pagpasiga pag-usab sa akong espirituhanong paglambo ug motutok diha kang Kristo—kinsa mao gayod ang angay nga akonga labawng tigdasig sa pagsunod sa Iyang ebanghelyo.
Pagkaplag og Kadasig pinaagi sa Pagtutok diha sa Manluluwas
Gisugdan nako ang paghimo og pipila ka kausaban.
Bisan kon wala ako mobati nga nadasig sa pag-adto sa simbahan o sa pagtambong sa templo o mobuhat og bisan unsang espirituhanon sa ubang mga adlaw, gipili lang gihapon nako ang pagbuhat sa ingon ug motutok sa akong Manluluwas. Dili na importante kon unsa ang gibuhat ni bisan kinsang tawo.
Sayon ra sa kalibotan ang pagbaliwala sa mga panalangin sa ebanghelyo, apan kon ako motutok diha Kaniya, ako mahinumdom kon unsa ang labing importante.
Imbis magpaunlod sa kaguol ug motutok diha sa mga kalainan kon giunsa nato sa pagpakabuhi, ako karon nagtabang na sa uban. Naningkamot ko sa pagpakighigala ug gitiman-an ang tanang positibo nakong mga inter-aksiyon uban kanila, sama sa usa ka yano nga pahiyom o usa ka mabination nga panag-istoryahay.
Wala na nako gitandi ang akong pagkadisipulo ngadto sa uban. Hinoon, akong gitutokan ang pagpabiling makanunayon sa akong espirituhanong pamatasan ug sa pagpalig-on sa akong relasyon uban sa Langitnong Amahan ug ni Jesukristo. Kon akong hatagan og prayoridad ang akong relasyon Kanila, akong mahinumdoman kon unsa ka dako ang Ilang paghigugma sa matag usa kanato sa hingpit nga paagi, ug kini nagpahinumdom kanako sa pagtanyag og grasya ngadto sa uban sama nga Sila nagtanyag og grasya ngari kanako.
Si Presidente Nelson midapit usab kanato sa: “pag-ako sa responsibilidad sa inyong pagpamatuod ni Jesukristo ug sa Iyang ebanghelyo. Trabahoa kini. Atimana kini aron kini motubo. Palamboa kini gamit ang kamatuoran. … Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.”
Gihimong kaswal sa kalibotan ang mahitungod sa inyong pagkadisipulo, ilabi na kon kamo nagkinaugalingon sa unang higayon isip usa ka young adult. Apan, awhagon ko kamo sa pagdawat sa pagdapit sa atong propeta sa paglig-on sa inyong pundasyon sa hugot nga pagtuo diha ni Jesukristo.
Ang paghimo Kaniya nga akong prayoridad naghimo kanako nga makapadayon diha sa dalan sa pakigsaad.