“Unsaon sa Pagpahibalo og Suporta sa Inyong Anak nga Lalaki o Babaye nga Misyonaryo,” Liahona, Ago. 2024.

Alang sa mga Ginikanan

Unsaon sa Pagpahibalo og Suporta sa Inyong Anak nga Lalaki o Babaye nga Misyonaryo

Ni London Brimhall

Mga Magasin sa Simbahan

Ang mosunod nga mga baroganan gikan sa mga lider sa Simbahan makatabang samtang kamo magtinguha nga motanyag og suporta sa inyong misyonaryo.

Imahe

mga ginikanan nga nakig-istorya uban sa ilang misyonaryo nga anak nga lalaki, nga nagsidlak ang adlaw sa luyo

Mga paghulagway ni Alex Nabaum

Kon ang inyong anak moadto sa misyon, bisan kon alang sa pangserbisyo o pangtudlo nga misyon, nag-uban niini ang lain-laing mga emosyon. Mahimong mobati kamo og kadasig, kasubo, kamapagarbuhon, ug kabalaka—dungan ang tanan. Ang inyong misyonaryo usab mahimong mobati og nawad-an og kadasig o nahigawad matag karon og unya apan mobati usab og kalipay, gugma, ug paglaom. Isip mga ginikanan ug mga sakop sa pamilya, kamo adunay espesyal nga oportunidad sa pagbayaw ug paglig-on sa inyong misyonaryo samtang kamo makig-istorya kaniya. Ang pagsabot sa pipila ka baroganan alang sa paghimo niini nga matang sa komunikasyon mahimong mapuslanon dili lamang ngadto sa mga ginikanan sa misyonaryo apan usab ngadto sa mga kabanay, mga higala, ug mga lider.

Pahinumdomi Sila sa Ilang Katuyoan

Pahinumdomi ang inyong misyonaryo sa mahinungdanong buhat nga gitawag nga ipabuhat kaniya. Si Presidente Russell M. Nelson mihatag og gibug-aton sa kaimportante niini nga sagrado nga buhat:

“Ang matag anak sa atong Langitnong Amahan takos sa oportunidad sa pagpili nga mosunod ni Jesukristo, modawat sa Iyang ebanghelyo uban sa tanang panalangin niini. …

“… Gipadala kamo sa yuta niining tukma nga panahon, ang labing importanting panahon sa kasaysayan sa kalibotan, aron motabang sa pagpundok sa Israel. Walay laing panghitabo dinhi niini nga kalibotan sa pagkakaron dayon nga mas importante kay sa niana.”

Ang mga misyonaryo makahibalo nga ang ilang katuyoan mao ang “pag-imbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagbunyag, pagdawat sa gasa sa Espiritu Santo, ug paglahutay hangtod sa kataposan.”

Tabangi ang inyong mga anak nga mahinumdom sa ilang balaan nga pagkatawo. Sila mga anak sa Dios, gipadala dinhi niining higayon tungod kay gisalig sa Langitnong Amahan kanila ang Iyang buhat. Hatagi og gibug-aton ang mga paagi nga sila makagamit sa ilang mga gasa sa pagpanalangin sa mga kinabuhi sa uban. Isip mga disipulo ni Jesukristo, sila makahimo sa mga butang nga sa ilang hunahuna lapas sa ilang abilidad.

Motutok sa Espirituwal

Samtang kamo gusto og mga balita sa matag aspeto sa misyon, ayaw tugoti nga ang mga detalye mopuli sa panagsultihanay. Si Elder Dieter F. Uchtdorf sa Korum sa Napulog Duha ka Apostoles mitudlo: “Tutoki ang espirituwal nga kalidad sa pagserbisyo sa inyong anak. Ang mga tawag sa telepono sa misyonaryo maanindot; kini makapausab sa kalidad gikan sa ‘Unsay imong gikaon sa pamahaw?’ ngadto sa … ‘Kinsa nga pamilya o indibidwal ang inyong gitudloan karon ug unsa nga leksiyon? Unsay labing nakapalig-on nimo?’ Ang kakuyaw usahay nga kita motutok sa detalye ug mobaliwala sa espirituwal.”

Tutoki ang espirituwal pinaagi sa pag-aghat sa inyong misyonaryo sa pagpakigbahin og mga kasinatian mahitungod niadtong iyang giserbisyohan ug gitudloan. Ikonsiderar ang pag-ampo alang niadtong mga indibidwal sa inyong personal ug pamilya nga mga pag-ampo. Paminaw pag-ayo samtang ang inyong misyonaryo mopakigbahin og mga paagi nga ang Espiritu mitandog sa iyang kasingkasing nianang semanaha.

Imbis mohatag og mga balita sa mga salida sa TV o mga kalihokan sa isport, ipakigbahin ang importante nga mga higayon gikan sa inyong kinabuhi diin ang Ginoo migiya, mihupay, o mitudlo kaninyo. Samtang inyong buhaton, ang inyong panagsultihanay makahatag kaninyo ug sa inyong misyonaryo og espirituwal nga pagkabag-o.

Imahe

sister nga misyonaryo

Ipakigbahin ang Espirituwal nga Kalihokan

Ang inyong mga panagsultihanay uban sa inyong misyonaryo mapanalanginan samtang maningkamot kamo sa pag-apil usab sa buhat sa pagpundok sa Israel. Si Sister Bonnie H. Cordon, kanhi Kinatibuk-ang Presidente sa Young Women, mipakigbahin:

“Mahimong dili ninyo makauban ang [inyong misyonaryo], apan kamo mahimo gihapong mopakigbahin sa espirituwal nga kalihokan. …

“Apil sa inyong misyonaryo diha sa buhat—pagtuon, pagserbisyo, ug pagpakigbahin sa ebanghelyo ni Jesukristo! Kon inyong buhaton, kamo makaani sa gisaad nga mga panalangin sa misyonaryo nga pagserbisyo.”

Si Sister Cordon mihatag usab og tulo ka sugyot:

“Dugangi ang inyong kaugalingong pagtuon sa kasulatan ug ipakigbahin ang inyong mga nakat-onan sa inyong sunod nga email.
“Tambong sa templo ug apil nila sa mahimayaong buhat sa pagdala og mga pamilya ngadto ni Kristo.
“Tinguhaa ang inyong kaugalingong misyonaryo nga mga kasinatian aron dungan kamo nga makadiskobre sa hingpit nga kalipay sa pagpakigbahin sa ebanghelyo.”

Kon kamo mopili sa pag-apil sa espirituwal nga kalihokan, ang inyong hingpit nga kalipay modako samtang kamo magtinguha sa pagtabang sa uban nga moduol ngadto ni Kristo.

Sa inyong tanang pag-istoryahanay sa inyong misyonaryo, hinumdomi sa pagtinguha ngadto sa Ginoo. Siya modasig kaninyo aron makahibalo unsay kinahanglan nga madunggan sa inyong misyonaryo ug kanus-a. Kamo ug ang inyong misyonaryo mapanalanginan samtang kamo magkat-on, maglambo, ug magserbisyo pagdungan.