“Usa ka Litrato, usa ka Basahon, ug usa ka Bunyag,” Liahona, Ago. 2024.
Mga Tingog sa mga Santos sa Ulahing mga Adlaw
Usa ka Litrato, usa ka Basahon, ug usa ka Bunyag
Mapasalamaton ko sa gamay nga buhat nga nakahimo og dakong kalainan.
Paghulagway pinaagi ni Katy Dockrill
Dili mominos makausa sa usa ka tuig, usa ka inspektor sa kalikopan ang mobisita sa among distrito sa eskwelahan. Kasagaran, ang inspektor mahigalaon ug komon ang kadiyot nga panag-istorya. Mao ang sitwasyon ni Ryan Pethtel. Si Ryan nakamatikod og mga litrato sa akong pamilya sa akong opisina, mao nga atol sa matag bisita magbinayloay kami og mga istorya sa pamilya.
Atol sa usa ka pagbisita, si Ryan nakamatikod og litrato sa kasal sa akong anak nga lalaki ug sa iyang asawa diha sa Washington D.C. Temple. Ang among panagsultihanay miabot ngadto sa templo, sa ebanghelyo ni Jesukristo, ug sa Basahon ni Mormon.
“Ang akong asawa ug ako nangita og usa ka simbahan,” miingon siya. “Naglaom ko mohatag sa akong mga anak unsay imong nahatag sa imong mga anak.”
Sa pagpangandam alang sa sunod nga pagbisita ni Ryan, akong gisulat ang akong pagpamatuod sa sulod sa usa ka kopya sa Basahon ni Mormon ug gidala kini ngadto sa akong opisina. Apan pagkasunod tuig lahi nga inspektor sa kalikopan ang miabot. Si Ryan wala na motrabaho alang sa departamento. Naguol ko, apan akong gibutang ang basahon sa akong opisina basin og ako mobati sa paghatag niini ngadto sa lain.
Hinuon, paglabay sa usa ka tuig, nakadawat ko og email gikan ni Ryan nga nagplano nga mobisita. Mibalik siya sa iyang karaan nga trabaho. Sa dihang miabot siya, ang among panagsultihanay sa kataposan mibalhin ngadto sa Simbahan. Sa dihang akong gihatag ni Ryan ang kopya sa Basahon ni Mormon, madasigon siyang mipakli niini.
Paglabay sa pipila ka bulan, miapil ko sa akong bana, nga si Bill, sa usa ka buluhaton sa pagpamulong sa high council didto sa Mannington, West Virginia—lugar ni Ryan. Pagkahuman, usa ka sister sa chapel nangutana nako kon nakaila ba ko ni Ryan ug kon ako ba ang mihatag kaniya sa Basahon ni Mormon. Siya ang asawa ni Ryan, si Stephanie.
Si Stephanie miingon nga siya ug si Ryan nagplano nga magpabunyag sa miaging gabii, apan si Ryan nagkasakit. Pagkadako sa panalangin nga wala maamgohi! Si Bill ug ako nakatambong sa ilang naeskedyul pag-usab nga bunyag paglabay sa tulo ka semana. Sa ilang bunyag, miingon si Ryan nga ang Basahon ni Mormon nga akong gihatag niya nagpabilin nga wala matandog hangtod ang iyang asawa mikontak sa mga misyonaryo.
Ang akong bahin sa ilang pagkakabig nagsugod sa pagbutang og litrato sa templo sa akong opisina. Ang litrato misangpot sa panagsultihanay. Ang panagsultihanay misangpot ngadto sa Basahon ni Mormon.
Ang matag buhat gamay ra, apan ang sangpotanan dako (tan-awa sa Doktrina ug mga Pakigsaad 64:33). Ang akong kasingkasing mibati og pasalamat nga ang akong gamay nga mga aksiyon nakahimo og dako nga kalainan ug migiya sa usa ka tawo ngadto sa Manluluwas.