Unsa ang Akong Ikasulti ngadto sa Uban mahitungod sa Templo?

Ni Jessica Anne Lawrence

Mga Magasin sa Simbahan

Ang paagi sa atong paghisgot mahitungod sa templo importante.

Nakahinumdom ko nga naghinam-hinam sa pagdawat sa akong pagtuga dihang nangandam na ko sa pagbiya alang sa akong misyon. Nakahinumdom usab ko nga ang kahinam nahimong kabalaka ug kalibog human ang pipila ka sakop sa pamilya mihatag nako og walay klarong mga pasidaan mahitungod sa pagtambong sa unang higayon.

Nasayod ko nga ang ilang mga katuyoan tinud-anay pinaagi sa pagpaningkamot sa pagtabang kanako nga makabaton og maayong kasinatian. Apan gusto nako nga imbis magtutok sa pagpasidaan kanako nga ang templo dili pamilyar, ang mga tawo nagtabang nako nga maandam alang sa templo pinaagi sa makapabayaw ug hustong mga paagi.

Sa ingon niana nga panghunahuna, ania ang upat ka butang nga ikonsiderar samtang magkigsulti kamo niadtong nag-andam nga moadto sa templo sa unang higayon:

1. Hatagi og pagtagad ang mga Kamatuoran dili ang mga Opinyon

Kon ang usa ka tawo nga atong gimahal motambong sa templo sa unang higayon, natural lang nga kita gusto nga mopakigbahin sa atong kaugalingong mga kasinatian ngadto kaniya. Apan kita kinahanglang maniguro nga kon unsa man ang atong ipakigbahin kini nakatutok sa mga kamatuoran sa ebanghelyo kay sa atong kaugalingong mga opinyon.

Ang husto nga impormasyon magtugot sa atong mga minahal sa pagtutok sa atong Manluluwas ug dili mapaling ngadto sa pihong pagbati mahitungod sa ilang mga kasinatian sa templo. Si Presidente Russell M. Nelson misulti, “Ang maayo nga inspirasyon pinasikad sa maayo nga impormasyon.”

Mahimo ninyong ipakigbahin ang husto nga impormasyon (ug gani mga hulagway!) mahitungod sa templo gikan sa klase sa pagpangandam alang sa templo, mga kasulatan, ug sa temples.ChurchofJesusChrist.org. Usahay tingali makulbaan kita mahitungod sa unsay ipakigbahin, apan pinaagi sa pagdangop sa mga kapanguhaan imbes sa atong mga opinyon, dili kita angayang mabalaka mahitungod sa sobra nga pagpakigbahin.

Pinaagi sa paghatag og hustong impormasyon mahitungod sa templo, kita nagtanyag og mas nalamdagan nga panglantaw mahitungod sa templo. Ang mga opinyon kasagaran nakatutok sa mga pagbati ug mga kasinatian nga atong nasinati, samtang ang impormasyon sa ebanghelyo nakatutok sa pagtugot sa inyong minahal nga makabaton og ilang kaugalingong kasinatian sulod sa templo.

2. Ikonsiderar ang mga Pulong nga Inyong Gamiton

Unsa nga mga paghulagway bahin sa templo ang nagpabilin sa inyong panumdoman? Pananglitan, si Presidente Nelson miingon, “Ang inyong pagserbisyo ug pagsimba diha sa templo motabang ninyo sa paghunahuna og celestial.” Ug si Presidente Thomas S. Monson (1927–2018) miingon, “Ang kada usa [templo] nagbarog isip usa ka suga sa kalibotan.”

Makapili kita og mga pulong nga maghatag og paglaom ug kalamdagan niadtong atong gimahal kinsa nangandam alang sa ilang kasinatian sa templo. Makalikay kita sa negatibong mga paghulagway sa templo (sama sa “dili kasagaran” o “kahibulongan”), ug makapili kita sa paggamit og positibo, nakasentro ni Kristo nga mga paghulagway (sama sa “kalinaw” ug “paglaom”).

Akong nakita nga makatabang ang paghunahuna mahitungod sa daghang nindot nga mga hulagway nga akong nakita sa sulod sa templo, ug sa kasagaran akong ipakigbahin kadtong mga hulagway ngadto sa mga higala o mga sakop sa pamilya kinsa nangandam sa pag-adto. Unsang mga pagbati ug mga emosyon ug mga pulong ang inyong mahunahunaan kon magtan-aw kamo niadto nga mga imahe? Paningkamot nga kamo makapabayaw diha sa pamaagi sa inyong paghisgot mahitungod sa templo.

3. Pangita og mga Tubag gikan sa mga Kapanguhaan sa Ebanghelyo

Tungod sa atong gugma ug dako kaayong respeto alang sa templo, mahimong sayon nga mobati og kahadlok sa paghisgot mahitungod niini. Mahimo kitang kulbaan ug maghunahuna kon unsay OK nga isulti. Nasayod ko nga naanad na nako nga sultihan ang kuryoso nga mga higala ug sakop sa pamilya nga dili kita mahimong maghisgot sa unsay nahitabo diha sa sulod sa templo.

Pero, samtang nagserbisyo ko ug nagtuon og dugang mahitungod sa templo, akong nakita nga kita mas makapakigbahin og daghan kay sa akong naamgohan!

Pananglitan, kita makapakigbahin nga ang “usa ka pagtuga usa ka literal nga ‘gasa.’” Ang pagtuga sa templo usa ka gasa sa sagradong mga panalangin gikan sa Dios ngadto sa matag usa kanato, ug pipila niadtong panalangin naglakip sa:

“Mas lapad nga kahibalo sa mga katuyoan ug mga pagtulon-an sa Ginoo.
“Gahom sa pagbuhat sa tanan nga gusto sa Dios nga atong buhaton.
“Balaang paggiya ug panalipod samtang kita nagserbisyo sa Ginoo, sa atong pamilya, ug sa uban.
“Dugang nga paglaom, kahupayan, ug kalinaw.
“Gisaad nga mga panalangin karon ug sa kahangtoran.”

Mahimo usab kita nga makasulti bahin sa mga pakigsaad nga atong gihimo sulod sa templo. Ang nakanindot mahitungod sa templo mao nga kini nagtugot kanato nga mas maduol sa Dios ug mapalig-on ang atong relasyon uban Kaniya pinaagi sa paghimo og dugang nga mga saad ngadto Kaniya. Kini nga mga pakigsaad mao ang:

“Balaod sa Pagkamasulundon, nga naglakip sa pagpaningkamot sa pagtuman sa mga sugo sa Dios.
“Balaod sa Sakripisyo, nga nagpasabot sa pagbuhat sa tanan nato nga mahimo sa pagsuporta sa buhat sa Ginoo ug paghinulsol uban sa masulub-ong kasingkasing ug mahinulsulon nga espiritu.
“Balaod sa Ebanghelyo, nga mao ang mas labaw nga balaod nga Iyang gitudlo sa dihang Siya dinhi pa sa yuta.
“Balaod sa Kaputli, nga nagpasabot nga kita adunay sekswal nga relasyon lamang sa tawo diin kita legal ug pinasubay sa balaod gikasal sumala sa balaod sa Dios.
“Balaod sa Pagpahinungod, nga nagpasabot sa pagpahinungod sa atong panahon, mga talento, ug sa tanan nga gipanalangin sa Ginoo kanato sa pagtukod sa Simbahan ni Jesukristo dinhi sa yuta.”

Rome Italy Temple nga adunay repleksyon sa estatuwa ni Kristo

Samtang kita mopakigbahin og positibong mga mensahe mahitungod sa templo, nagtabang kita sa atong minahal sa kinabuhi nga mobati nga gihangop ug andam sa pagtambong sa unang higayon. Makatabang kita nila sa paglantaw sa umaabot aron sa pagpalig-on sa ilang relasyon ngadto ni Jesukristo pinaagi sa mga pakigsaad sa templo.

4. Ipakigbahin ang Positibo nga mga Kasinatian

Unsay akong labing nakat-onan mahitungod sa templo mao nga kon husto ang impormasyon, dili kini kahibulongan. Gani, kadaghanan—kon dili man ang tanan—nga impormasyon ug mga panalangin nga atong madawat sulod sa templo mga kaanggid sa unsay gitudlo kanato matag adlaw diha sa ebanghelyo.

Pinaagi sa akong mga kasinatian, akong nakat-onan pag-usab nga ang kahadlok dili iya sa Ginoo. Kon kita maglikay sa paghisgot mahitungod sa templo o mosulay sa paghisgot mahitungod niini inubanan sa walay klarong mga pasidaan o mga kabalaka, maghatag kini sa kaaway og mas dakong gahom sa pagguba sa katahom sa templo. Imbis putlon ang atong pag-istoryahanay pinaagi sa pagsulti nga, “Padayon lang sa pagbalik-balik ug mahimong maayo ra kini sa kataposan,” kita makapakigbahin sa atong positibo nga mga kasinatian tungod sa pagtambong sa templo.

Kon atong makaplagan ang atong kaugalingon nga may kahadlok sa pagtubag sa mga pangutana mahitungod sa templo, posible nga kana maoy usa ka imbitasyon gikan sa Ginoo sa pagtuon og dugang mahitungod sa templo. Kini mopanalangin dili lamang nato apan niadtong anaa usab sa atong palibot. Gituyo sa Ginoo nga ang templo mopanalangin kanato, dili mopahadlok kanato.

Hinumdomi ang mga pulong ni Presidente Nelson: “Ang paghimo og mga pakigsaad ug pagdawat sa gikinahanglan nga mga ordinansa diha sa templo, ingon man ang pagtinguha sa pagpaduol ngadto Kaniya didto, makapanalangin sa inyong kinabuhi sa mga paagi nga walay bisan unsa nga matang sa pagsimba ang makahimo.” Ug kon mas daghan kita og isulti nga positibo mahitungod sa balay sa Ginoo, mas mapadayon pa nato ang paggiya sa matag usa aron makabalik ug modapit niadtong mga panalangin sa atong kinabuhi.