Digital Lamang
“Ang Panahon sa Paghunong sa Pagkasilo Karon Na”
“Ang masilo usa ka pagpili nga himoon nato; dili kini usa ka kondisyon nga ipahamtang o ipamugos sa atoa sa usa ka tawo o sa usa ka laing butang”
Pila ka mga tawo ang atong gika-istorya sa matag adlaw? Pila ka mga mensahe o mga komentaryo ang atong nabasa? Mahimong sa tawo mismo, diha sa telepono, o pinaagi sa social media, ang gidaghanon mahimong taas kaayo. Sa usa ka punto o sa lain, kita makahinagbo og usa ka tawo nga mosulti o mobuhat og butang nga maisip nga makapasilo, sa tinuyo o sa dili.
Si Elder David A. Bednar sa Korum sa Napulog Duha ka Apostoles miingon: “Gitogahan uban sa kabubut-on sa pagpili, kamo ug ako mga tinugyanan, ug kita gayod ang molihok ug dili aghaton sa paglihok. Ang pagtuo nga adunay tawo o butang nga makapahimo kanato nga masilo, masuko, masakitan, o maglagot mopaubos sa atong moral nga kabubut-on ug mohimo kanato nga mga butang nga aghaton pa sa paglihok. Isip mga tinugyanan, hinoon, kamo ug ako adunay gahom sa paglihok ug sa pagpili unsaon nato pagtubag sa usa ka makapasilo o sakit nga sitwasyon.”
Hunahunaa kon unsaon ninyo paglihok sa mosunod nga mga sitwasyon nga sa kasagaran ikasuko sa mga tawo—ug pamalandongi kon unsaon nimo sa pagpili nga dili masuko:
-
Mainampingon ka nga miandam og pagkaon alang sa uban. Samtang nagkaon, adunay tawo nga nag-ingon nga ang pagkaon daw napan-os na.
-
Adunay naghisgot ngadto sa usa ka grupo nga ang imong buhok nagkalkag, ug ang ubang mga tawo nangatawa.
-
Atol sa usa ka panaghisgotan sa Sunday School, human nimo gipakigbahin ang imong kinasingkasing nga espirituhanong kasinatian, adunay tawo nga misaway sa imong mga pulong.
Ang pagpili kon unsaon sa paglihok ug pagtubag sa makapasakit nga mga sitwasyon dili sayon. Apan, si Presidente Russell M. Nelson nagpahinumdom kanato kon asa kita mahimong motutok: “Kon mohimo kamo og mga pagpili, dapiton ko kamo sa paglantaw sa layo—usa ka mahangtoron nga panglantaw. Unaha si Jesukristo tungod kay ang inyong kinabuhing dayon nagdepende sa inyong hugot nga pagtuo diha Kaniya ug sa Iyang Pag-ula.”
Usa ka Pundasyon sa Doktrina diha ni Kristo
Si Jesukristo mao ang hingpit nga ehemplo sa dili pagtugot sa mga pulong ug mga aksiyon sa uban nga makaapekto sa Iyang katungdanan (tan-awa sa 1 Nephi 19:9). Atol sa Wali sa Bukid, si Jesus nagtudlo kanato sa paghigugma sa atong mga kaaway ug nagsugo kanato nga mamahimong hingpit, nga posible pinaagi sa Iyang Pag-ula (tan-awa sa Mateo 5).
Samtang kita maningkamot nga mas mapaduol ngadto sa atong Langitnong Amahan, kita makadawat og makapagahom ug makapalig-on nga kusog pinaagi ni Jesukristo aron sa pagtabang kanato sa pagbuntog sa atong kasakit ug pagkasilo.
Si Elder Bednar nagtudlo nga “pinaagi sa makapalig-ong gahom sa Pag-ula ni Jesukristo, kamo ug ako mapanalanginan sa paglikay ug pagbuntog batok sa pagkasilo.”
Mahimong usa ka Detektib
Human sa usa ka bastos nga komentaryo, o aksiyon, kita lagmit mobati nga kinahanglan makabalos dayon, tingali masuko, o iluom ang atong mga emosyon hangtod nga kita dili na kaagwanta. Unsaon nato paghimo og mas lapad nga panglantaw ug mohinumdom sa Manluluwas?
Ang usa ka ideya mao ang pagkahimong atong kaugalingon nga mga detektib. Mahimo natong sulayan ang pagsabot sa mga emosyon luyo sa pagkasilo. Aduna bay dili pagsinabtanay? Naghunahuna ba kita inubanan sa pinatuyangan nga emosyon o usa ka tin-aw nga paminsar? Unsa ang atong gitubag?
Si Elder Dieter F. Uchdorf sa Korum sa Napulog Duha ka Apostoles miingon: “Kasagaran atong hatagan og katarongan ang atong kasuko nga kini matarong ug ang atong paghukom kasaligan ug angay lamang. … Dili nato iapil ang atong kaugalingong kayugot tungod kay kita nagtuo nga, sa atong bahin, aduna kita sa tanang impormasyon nga atong gikinahanglan nga mahatagan og sala ang uban.”
Bisan og ang pagkahimong atong kaugalingong mga ditektib lagmit magkinahanglan og praktis, ang mas maayong pagsabot sa sitwasyon ug sa atong kaugalingong mga emosyon tingali makatabang kanato sa paghinumdom sa Manluluwas, imbis sa pagbati og negatibo nga mga emosyon nga makapahilayo kanato.
Human nga sulayan kini nga taktika, usahay ang unsay nasulti o nabuhat na sakit lang gihapon. Kon mao lang gihapon, si Elder Bednar miingon: “Ang atong unang obligasyon mao ang pagbalibad nga masilo ug dayon isulti kini sa pribado, matinuoron, ug direkta sa mao nga tawo. Ang ingon nga paagi makadapit og inspirasyon gikan sa Espiritu Santo ug motugot sa mga sayop nga pagtan-aw nga maklaro ug ang tinuod nga tuyo masabtan.”
Alang sa dugang suporta, basaha ang “Emotional Resilience Helps Us to Prepare for Emergencies” ug ang mosunod niini nga mga subseksiyon diha sa Emergency Preparedness Manual, ug tan-awa diha sa emotional resilience course gikan sa Self-Reliance Services.
Pagpangita og Kalinaw Karon
Kon adunay tawo nga moingon o mobuhat og butang nga maisip nga makapasilo, kita makasalig sa gipahinumdom ni Elder Uchtdorf:
“Kinahanglan atong mahibaloan nga kitang tanan dili hingpit—makililimos kita atubangan sa Dios. …
“Tungod kay tanan kita nag-agad sa kalooy sa Dios, unsaon nato paghikaw sa uban sa grasya nga atong gitinguha og maayo alang sa atong mga kaugalingon? Hinigugma kong mga kaigsoonan, dili ba kita mopasaylo sama nga kita nangandoy nga mapasaylo?”
Sa kataposan, ang tinuod nga pagkaayo moabot pinaagi ug tungod sa Manluluwas, nga naghatag kanato og kalinaw sa pagpadayon sa unahan.
“Kaninyo ibilin Ko ang kalinaw, kaninyo ihatag Ko ang akong kalinaw: hatagan Ko kamo niini dili sama sa hinatagan sa kalibotan. Kinahanglan dili magkaguol ang inyong kasingkasing, ni magtalaw” (Juan 14:27).