“Usa ka Kilo nga Gugma,” Liahona, Ago. 2024.
Mga Tingog sa mga Santos sa Ulahing mga Adlaw
Usa ka Kilo nga Gugma
Ang mga panahon sa krisis, kanihit, ug pagsulay makapagawas sa labing maayo nga anaa sa matag usa nato.
Paghulagway pinaagi ni Carolyn Vibbert
Aron makasangkap sa among pamilya, ang akong bana nagkugi og maayo sa pagpamasahero gamit ang motorsiklo. Bag-ohay lang naaksidente siya sa kadalanan apan sa milagroso nga paagi wala mag-antos og grabe nga kaangol. Siya, hinuon, kinahanglang magpaalim samtang giayo pa ang iyang motorsiklo.
Tungod kay ang akong bana dili makatrabaho, nabalaka kami. Wala kami laing kinitaan, ug ang krisis sa ekonomiya sa among nasod mas nakapagrabe sa among kabalaka.
Atol sa panagtigom alang sa sakramento sa Dominggo human sa aksidente sa akong bana, duha sa mga pakigpulong nakasentro sa pagkamanggiloy-on ug kon unsaon nga kita makapalambo niining Kristohanon nga kinaiya. Human niana, usa sa among mga miyembro sa ward miduol nako nga nag-ingon nga ang usa ka miyembro sa branch nagkinahanglan kaayo og pagkaon. Naghunahuna siya kon mahimo ba kami nga mohatag og “usa ka kilo nga gugma”—usa ka kilo (2.2 lbs.) sa bisan unsa nga matang sa pagkaon nga anaa namo sa panimalay. Miingon ko niya nga makasalig siya sa among suporta.
Sa dihang ang among pamilya naabot na sa panimalay human sa pagsimba, akong gisulti ang gikasabotan ngadto sa akong bana. Nagsagubang kami sa among kaugalingong pagsulay, apan mibati kami nga napanalanginan bisan pa man niana.
“Bisan kon nagsagubang kita og lisod nga mga panahon,” siya miingon, “kita adunay igo nga makalahutay sa inadlaw-adlaw, tingali adunay gamayng sobra nga ikapakigbahin.”
Niana nga hapon, usa ka silingan nga nakadungog sa pagkaaksidente sa akong bana, mihangyo nga mobisita kami. Sa dihang miabot kami, ang silingan mihatag namo og usa ka karton nga puno sa 7 kilo (15 lbs.) nga pagkaon, uban sa laing mga aytem nga among gikinahanglan. Nahingangha kami. Walay usa namo nga nagdahom niana nga matang sa panalangin.
Samtang nakig-istorya ko sa akong bana mahitungod niini nga kasinatian, dili nako mapugngan nga moila sa tabang sa Dios ug mopasalamat Kaniya sa Iyang dakong gugma alang namo. Nakita Niya ang among kaandam nga mopakigbahin sa unsay among mahimo—usa ka kilo nga gugma—ug mipanalangin namo og kapitoon ang gidaghanon sa among gitabang.
Ang mga panahon sa pagsulay ug kanihit makapagawas sa labing maayo nga anaa sa matag usa nato. Nagtanyag kini kanato og mga oportunidad sa pagpalambo ug sa pagpakita og Kristohanon nga mga kinaiya. Nasayod ko nga dili tanang buhat sa gugma moresulta og dihadiha dayon nga mga panalangin agi og bugti, apan ako nasayod nga ang Ginoo nagtan-aw sa Iyang mga anak. Siya motubag sa atong mga pag-ampo samtang kita motubag sa mga pag-ampo sa uban pinaagi sa pagserbisyo ug sa pagpakigbahin—bisan kon ang mahatag lamang nato mao ang usa ka kilo nga gugma.