“Jesukristo: Ang Sentro sa Atong Hugot nga Pagtuo,” Liahona, Ago. 2024.
Dali, Sunod Kanako
Jesukristo: Ang Sentro sa Atong Hugot nga Pagtuo
That Ye May Know [Nga Kamo Masayod], ni Gary L. Kapp, dili mahimong pakopyahan
Sa Hebreohanon nga mga teksto, ang chiasmus usa ka mabalaknon nga han-ay diin ang mga pulong o mga ideya gipresentar ug dayon balikon sa binali nga pagkahan-ay, nga ang sentro mao ang gipokusan ug labing mahinungdanon nga punto. Ang pagbalik-balik molig-on sa naulahi nga katunga, naghatag og gibug-aton sa kinauyokan nga mensahe. Usa ka ehemplo makita diha sa Alma 36, naghulagway sa kanindot niini nga pagkasunod-sunod.
-
Maghupot sa mga sugo (bersikulo 1)
-
-
Siya sa pagkamatuod miluwas kanila (bersikulo 2)
-
-
Pagabuligan sa ilang mga pagsulay, mga kasamok, ug mga kasakit (bersikulo 3)
-
-
Ako nasayod dili sa akong kaugalingon apan sa Dios (bersikulo 4)
-
-
Mga kasakit sa usa ka gipanghimaraot nga kalag (bersikulo 16)
-
-
Ako nahinumdom ni Jesukristo (bersikulo 17)
-
Ako nangamuyo, “O Jesus, ikaw nga Anak sa Dios” (bersikulo 18)
-
-
Hingpit nga kalipay labaw sa akong kasakit (bersikulo 20)
-
-
Ang akong kahibalo gikan sa Dios (bersikulo 26)
-
-
Gibuligan ubos sa mga pagsulay, mga kasamok, ug mga kasakit (bersikulo 27)
-
-
Siya moluwas kanako (bersikulo 27)
-
-
Maghupot sa mga sugo (bersikulo 30)
Himatikdi nga ang Manluluwas mao ang sentro niini nga ehemplo sa chiasmus. Si Elder Richard G. Scott (1928–2015) sa Korum sa Napulog Duha ka Apostoles mitudlo mahitungod sa mga panalangin sa pagsentro sa atong kinabuhi diha ni Jesukristo: “Ang malungtaron nga kalipay inubanan sa kalig-on, kaisog, ug kapasidad sa pagbuntog sa labing mahagiton nga kalisdanan moabot gikan sa kinabuhi nga nakasentro kang Jesukristo.”
Kita nasayod nga ang pagbaton og hugot nga pagtuo diha sa Manluluwas mopanalangin kanato sa kahangtoran. Apan usahay malimot kita kon unsaon nga ang pagbaton og hugot nga pagtuo makapanalangin nato karon. Pinaagi sa pagpakita niini sa chiasmus, ang Alma 36 nagpakita nato sa gahom sa hugot nga pagtuo ug kon sa unsang paagi nga kining tanan nakapunting ngadto ni Jesukristo.
Ang mosunod nga mga kasulatan—gikan sa lainlaing mga leksiyon sa Agosto nga Dali, Sunod Kanako—nagpakita kon sa unsang paagi nga ang hugot nga pagtuo diha ni Kristo naghatag nato og gahom:
Siya Moluwas Kanato
Kon kita mabitik sa makadaot nga mga hunahuna, mga pagbati, o mga sitwasyon, ang hugot nga pagtuo diha ni Kristo makatabang nato aron makalingkawas.
“Karon kini mao ang hugot nga pagtuo niini kinsa ako nakapamulong; sila mga batan-on, ug ang ilang mga hunahuna mga lig-on, ug sila mibutang sa ilang pagsalig diha sa Dios sa kanunay. …
“Ug tan-awa, kami pag-usab naluwas gikan sa mga kamot sa among mga kaaway. Ug bulahan ang ngalan sa among Dios; kay tan-awa, kini siya mao ang nagluwas kanamo.”
Kita Makapangita ug Makakaplag og mga Tubag
Ang pagbaton og hugot nga pagtuo diha ni Kristo makagiya nato aron makaplagan ang mga tubag kon adunay butang nga wala nato masabti o mahibaloi.
“Daghan pa kaayo nga mga misteryo ang gitipigan, nga walay usa nga nasayod gawas sa Dios lamang. Apan ako mopakita nganha kanimo og usa ka butang diin ako nangutana sa kakugi ngadto sa Dios nga ako unta masayod.”
Ang Atong mga Kalag Mapuno sa Hingpit nga Kalipay
Ang hugot nga pagtuo diha ni Jesukristo mowagtang sa bati nga mga hunahuna sa atong mga pangisip ug modan-ag sa atong kasingkasing og hingpit nga kalipay .
“Sila … nag-anam sa pagkalig-on ug pagkalig-on diha sa ilang pagpaubos, ug nagkalig-on ug nagkalig-on diha sa hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan.”
Kita Makabuntog sa Kahadlok ug mga Kasakit
Kon kita adunay hugot nga pagtuo diha sa Ginoo, Siya mobulig nato atol sa lisod nga mga panahon sa atong mga kinabuhi.
“Kami nasubo ug usab napuno sa kahadlok. …
“Busa kami mibu-bo sa among mga kalag diha sa pag-ampo ngadto sa Dios, nga siya molig-on kanamo ug moluwas kanamo. …
“… Ang Ginoo nga among Dios miduaw kanamo uban ang mga pasalig nga siya moluwas kanamo; oo, hangtod nga siya misulti og kalinaw sa among mga kalag, ug mihatag ngari kanamo og hilabihan ka hugot nga pagtuo, ug mihimo kanamo nga kami kinahanglan molaom sa among kaluwasan diha kaniya.”