Digital Lamang
Unsaon Nato nga “Mausa” sa Pamaagi sa Ginoo?
Gusto ko sa kahilwasan nga moabot sa pagkahimong nahiusa kang Kristo.
Kamo ba, sama nako, naghunahuna gayod, “Unsaon nako nga mobati og dugang nga kalipay sa akong kinabuhi?”
Samtang adunay daghang butang nga magdala og kalipay, bag-ohay lang ko natandog sa usa ka pamahayag ni Presidente Henry B. Eyring, Ikaduhang Magtatambag sa Unang Kapangulohan: “Ang hingpit nga kalipay moabot kon kita panalanginan og panaghiusa.” Sukad sa mga adlaw ni Adan ug Eva, ang mga anak sa Dios nagtinguha nga mahimong mas mahiusa Kaniya ug sa usag usa, samtang si Satanas nagtinguha sa paglaglag sa panaghiusa.
Ako adunay daghang kasinatian latas sa katuigan diin nasinati nako ang kalipay sa panaghiusa ug kasakit sa kawalay panaghiusa. Ako nakakaplag og dakong paglaom nga, sama sa gisulti ni Presidente Eyring: “Samtang kita mag-ampo ug maningkamot alang niini diha sa pamaagi sa Ginoo[,] … ang atong mga kasingkasing mahimong mabugkos diha sa panaghiusa. Ang Dios misaad niana nga panalangin ngadto sa Iyang matinud-anon nga mga Santos bisan unsa pa man ang ilang mga panaglahi diha sa kaagi ug bisan unsa pa nga panagsumpaki ang nahitabo sa ilang palibot.”
Mao nga, unsaon man nato nga “mausa” diha sa pamaagi nga gisugo sa Ginoo (Doktrina ug mga Pakigsaad 38:27)? Si Elder D. Todd Christofferson sa Korum sa Napulog Duha ka Apostoles mitudlo kanato og tulo ka paagi: “Mahimo kitang usa sa kasingkasing ug usa sa hunahuna samtang kita sa tinagsa mobutang sa Manluluwas nga sentro sa atong mga kinabuhi ug mosunod niadtong Iyang gitudlo sa pagpangulo kanato. Magkahiusa kita … diha sa gugma ug sa kahingawa alang sa usag usa.”
Ania kon giunsa nako pagpaningkamot sa pagsunod niadto nga mga kamatuoran sa akong kaugalingon nga kinabuhi:
Pagbutang sa Manluluwas nga Sentro sa Akong Kinabuhi
Sa Juan 17, ang Manluluwas nangamuyo sa Amahan alang kanato diha sa Iyang Pangamuyo nga Pag-ampo: “Nag-ampo ako nga mausa unta sila. Amahan, mausa unta sila dinhi kanato sama nga ikaw ania kanako ug ako anaa kanimo” (Juan 17:21). Ang pulong nga Pag-ula literal nga nagpasabot nga “sa paghimong usa,” o sa pakig-uli. Ako nahingangha nga ang Manluluwas nagtinguha gayod sa atong panaghiusa ngadto Kaniya ug sa Langitnong Amahan nga Siya andam nga mopaagas og dugo gikan sa matag lungag sa panit aron mahimo kining posible.
Kini klaro nga nakapasabot kanako nga ako gusto nga mahiusa ngadto Kanila. Apan, kini nakapahibulong kanako nga Sila gustong mahiusa kanako. Ug gani, ang Espiritu Santo sa makadaghan misaksi kanako nga Sila gusto gayod.
Ang akong panaghiusa ngadto Kanila mao ang kinadak-an nga tinubdan sa hingpit nga kalipay ug kahilwasan sa akong kinabuhi. Kini nga panaghiusa mas hingpit nga nagdapit sa makagiya, makapanalipod, ug makalimpyo nga impluwensiya sa Espiritu Santo sa akong kinabuhi. Ako nag-ampo matag buntag nga ang Espiritu Santo mouban kanako ug molihok pinaagi kanako niana nga adlaw. Naningkamot gayod ako nga ibutang si Jesukristo sa sentro sa akong kinabuhi ug maminaw Kaniya.
Hingpit ba nako kining nabuhat? Dili gayod! Apan naningkamot ba ako matag adlaw? Siyempre! Kitang tanan tingali adunay nagkalainlain nga mga panginahanglan ug mga sirkumstansiya, apan ang Espiritu mogiya kanato samtang maningkamot kita sa pagsunod sa mga pagtulun-an ug ehemplo sa Manluluwas matag adlaw.
Bisan unsa pa ang akong sulayan, ako nadasig sa pagkahibalo nga si Kristo nangamuyo alang sa matag usa kanato aron mahimong usa ngadto Kaniya ug sa Langitnong Amahan.
Pagsunod Niadtong Kinsa Gitahasan ni Jesukristo sa Paggiya Kanako
Samtang nahimo kong mas maayo sa pagbutang sa Manluluwas sa sentro sa akong kinabuhi, akong nabantayan nga ang akong abilidad nga mahiusa ngadto sa Iyang pinili nga mga propeta milambo, ug ang Espiritu mipamatuod kanako nga gitahasan sila sa paggiya kanako. Ang pulong nga “tahas” nagpasabot og “awtoridad sa paglihok alang sa laing tawo.”
Ang Mosiah 18 usa ka matahom nga ehemplo sa mga tawo nga nakakaplag og panaghiusa sa Dios pinaagi sa pagsunod sa mga propeta. Si Alma ang Tigulang bag-ohay lang nakabig human nakadawat sa mensahe ni Abinadi. Siya dayon misugod sa pagtudlo sa mga tawo nga andam nga moagi sa usa ka yuta nga “gidagsaan, sumala sa kahigayonan o kapanahonan, sa ihalas nga mga mananap” (Mosiah 18:4) aron magkat-on bahin sa Dios ug sa Iyang hingpit nga plano alang kanila.
Ang mga sumusunod ni Alma niini nga asoy makatabang kanato nga makasabot nga samtang usahay kini mahimong mabati nga ingon og kita mobiyahe latas sa lisod nga mga sirkumstansiya aron sa pagsunod sa atong mga lider (tan-awa sa Mateo 5:10), adunay kahilwasan sa pagkahimong nahiusa sa mga propeta sa Dios tungod kay sila kanunayng mogiya kanato ngadto ni Jesukristo. Samtang ang mga tawo midawat sa kamatuoran ug mihimo og mga pakigsaad ngadto sa Dios, “ang ilang mga kasingkasing [nabugkos] sa panaghiusa ug sa gugma sa usag usa” (Mosiah 18:21).
Tungod sa gasa sa teknolohiya, ang mga propeta nahimong maayo kaayo nga mga kauban kanako—ilabi na sa akong pag-inusara. Balik-balik nakong gipaminaw ang ilang mga mensahe samtang nanghabas ako sa akong nataran, nanglimpyo sa akong balay, gipala ang niyebe, ug migawas aron maglakaw-lakaw. Ang ilang mga kasingkasing ug mga tingog pamilyar kanako.
Ug bisan kon ang ilang tambag lisod alang kanako, gitabangan ko nila sa pagbutang sa Manluluwas sa sentro sa akong kinabuhi. Ako adunay mas dako nga panaghiusa sa Dios nga Kapangulohan tungod niadtong gitahasan ni Kristo sa paggiya kanako.
Paghiusa diha sa Gugma ug Pakabana alang sa Usag Usa
Sa akong kasinatian, ang pagsunod ni Jesukristo ug sa Iyang mga propeta kanunayng mogiya kanato sa pag-amuma alang sa usag usa. Si Presidente Eyring mitudlo: “Ang hingpit nga kalipay sa panaghiusa nga gusto Niya ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini uban sa lain.” Adunay daghan kaayong kalainan taliwala sa mga tawo sa akong inadlaw-adlaw nga kinabuhi nga dili sa kanunay ako nakahibalo kon unsaon sa paglihok sa paagi nga makatabang sa pagpahinabo og panaghiusa. Ug usahay mobati lang gayod ko nga gikapoy, ug ang akong tinguha nga mohiusa dili kaayo lig-on.
Ang paghinumdom nga “ang garbo mao ang dakong kaaway sa panaghiusa” makatabang kanato sa pagtinguha sa tabang sa Ginoo sa pagpalambo og panaghiusa. Ang 1 Mga Taga-Corinto 12 nakatabang kanako nga makaila nga matag usa sa mga anak sa Dios adunay nagkalainlaing espirituhanon nga mga gasa ug nga ang ilang mga gasa mahinungdanon sa akong kinabuhi. Akong nakat-onan usab nga ang mga kalainan sa Iyang mga anak nakapahimo sa mga butang nga mas makapahinam ug matahom.
Bisan og nasayod ako nga kinahanglan dili nato itandi ang atong kaugalingon ngadto sa uban, subo lang usahay maayo gayod kaayo ako sa pagtandi sa akong mga kahuyang ngadto sa mga kalig-on sa uban. Ug usahay, kini nga mga matang sa mga pagbati nakapugong kanako sa pagpalambo og panaghiusa ngadto sa uban tungod kay ako dili matarong nga mihukom kanila (tan-awa sa Mateo 7:1).
Ang Ginoo klaro nga Siya nagtinguha nga “dili magkabahinbahin ang lawas kondili ang tanang bahin niini may samang pagtagad alang sa usag-usa” (1 Mga Taga-Corinto 12:25).
Mao nga nangutana ko, “Unsa kaha ang akong mabuhat aron sa pag-undang sa paglahi sa akong kaugalingon gikan sa uban sa akong hunahuna ug kasingkasing?”
Nag-ampo ko nga makita ang uban sama nga si Kristo nakakita kanila. Nag-ampo ko nga makakita sa gasa nga aduna sila nga nakasangkap sa akong panginahanglan nianang adlawa. Ug sama lang ka importante, gitugotan nako ang akong kaugalingon nga magmapasalamaton alang niini.
Nagsugod dayon ko sa pagpangutana sa akong kaugalingon, “Unsa man ang akong makat-onan gikan sa uban nga adunay mga kasinatian nga dili gayod nako mabatonan?” Ang pagbuhat niini nakatabang kanako sa pagkakita sa akong pamilya, sa attendant sa gasolinahan, mga tin-edyer, mga kauban sa trabaho, ug sa tanan sa palibot kanako sa lahi nga paagi ug makigkonektar kanila sa mas makahuloganon nga mga paagi.
Kinahanglan usab ko nga mosalig sa mga kalig-on sa uban aron magmalamposon sa akong pamilya, sa trabaho, sa mga calling, o sa mga pundok. Sa kadaghanan nga mga higayon, imbes nga mag-indigay, kami misuporta ug misalig sa usag usa. Ang among hiniusa nga mga paningkamot ug mga kalainan, gipadako sa Langitnong Amahan, nagdala og mga milagro—mga milagro nga mapahinabo lamang sa usa ka hingpit nga Dios kinsa hanas sa pagtipon sa mga tinguha, mga kalainan, ug mga gasa sa paagi nga nagpanalangin sa Iyang mga anak.
Nasayod ako nga akong kinaiya ug mga aksiyon makamugna o makaguba og panaghiusa. Nasayod usab ako nga gusto nakong magmugna og panaghiusa. Gusto ko nga makabaton sa kahilwasan nga naggikan sa pagkahimong nahiusa kang Kristo. Gusto ko nga mobati nga duol ngadto sa Langitnong Amahan ug kang Jesukristo ug motugot sa mga propeta sa paggiya kanako ngadto Kanila. Ug gusto ko nga motabang ug matabangan sa uban sa akong panaw dinhi sa mortalidad.
Gusto ko nga mopili og panaghiusa kang Kristo. Masaligon ako nga ang pagbuhat sa ingon magdala og dugang nga kalipay!