Kune Vakacegu vei Jisu Karisito

Ena vula oqo ena noda vuli ena Lako Mai, Mo Muri Au , eda wilika kina e dua na ka e sotavi: na Karisito sa tucaketale e sikovi Amerika ka sureti ira na Nifai mera “lako mai vei au, mo dou curumaka kina na ligamudou ki yasaqu, ka mo dou tara talega na we ni ivako e ligaqu kei na yavaqu, mo dou kila kina ni sai au na Kalou ni Isireli, ka Kalou ni vuravura taucoko, au sa vakamatei ena vuku ni nodra ivalavala ca na kai vuravura” (3 Nifai 11:14).

Me vaka a vakayacora vei ira na Nifai, a sureti keda yadua o Jisu Karisito meda lako mai ka vakila e dua na ka baleti Koya ka tara cake e dua na isema ni veiyalayalati kei Koya. Au vakavinavinaka ni lomani keda o Koya ena sala oqo ka gadreva me tiko vata kei keda. Ena Vukuna, eda sega ni tiko duadua. Ena noqu itukutuku, au wasea kina ni “sa kena inaki meda veitokani vata kei na Turaga ena dua na sala mana mai na noda veiyalayalati” (tabana e 44). Nida lako mai Vua ena noda digidigi ni veisiga meda maroroya na veiyalayalati tabu, eda tara cake e dua na isema vei Jisu Karisito ka na kauta mai na Nona loloma kei na vakacegu kina noda bula kei na nodra bula na noda matavuvale.

Eda nanumi Jisu Karisito ena noda daramaka na qameni ni valetabu nida sa edaumeni oti, e vakamacalataka o Peresitedi Jeffrey R. Holland ena nona itukutuku “The Garment of the Holy Priesthood” (tabana e 4). E wasea o koya na yalayala ni Mataveiliutaki Taumada ni maroroi ni noda veiyalayalati kei na daramaki ni qameni ena solia vei keda na veitaqomaki kei na mana ni iVakabula.

Au vakadinadinataka ni rau lomani kemuni na Tamada Vakalomalagi kei na iVakabula ka lako mai o Jisu Karisito ena inaki sara ga oqo: me kauta mai vei keda na vakacegu eda vakasaqara. E veivakacegui o Jisu Karisito.

Wekamuni dina,

Kristin M. Yee

iKarua ni Daunivakasala ena Mataveiliutaki Raraba ni iSoqosoqo ni Veivukei

Vakabula ko Jisu e dua na tagane mataboko — “Ni sa tiko e vuravura, au na rarama kei vuravura.”

“Ni sa vosa vakaoqo ko [Jisu], sa kasivita na qele, ka ulia vata na soso kei nai kasivi, a sa boroya kina na mata ni tamata mataboko,

“A sa kaya vua, Laki tavoi ena isilisili ko Sailoama. A sa lako yani ka tavoi, ka tale mai ka rai rawa.”