Na Qameni ni Matabete Tabu

Mai vei Peresitedi Jeffrey R. Holland

Peresitedi Vakatawa ni Kuoramu ni iApositolo Le Tinikarua

Me tiki ni edaumeni ni valetabu, sa soli vei keda e dua na ivakananumi tabu vakayago ni noda veiyalayalati —e dua na ivakatakarakara ni iVakabula Vakaikoya.

Vakamatailalai mai na Atama kei Ivi, mai vei Douglas Fryer

Se cava ga na veivakarautaki sega ni vakatitiqataki a soli vei rau kei na veivakadeitaki erau tovolea me rau nanuma, e rairai dua na kurabui vakidacala vei Atama kei Ivi me rau biuta na nodrau parataisi ena Were ko Iteni ka kalawa yani ki na dua na vuravura lutu.

Ena kila bibi, erau sa qai kila na kena ibalebale me biu na nodrau bula vakacegu sautu me baleta e dua na vuravura ni veibasai kei na buno, na kau vakavotona kei na yaluma—ka qai tarava mai na dua na ka e vakatokai ko mate. A sega ni rawa me rau a kila mai na ivakatekivu na ibalebale ni veika kece oqo, ia a totolo na nodrau vulica ni veisiga yadua e rawa ni kauta mai na mosi vou. E dina sara, na ka mosimosi duadua oya na nodrau kila ni rau na sotava na veika kece oqo ni rau sa tawasei tani mai vei Tamadrau mai Lomalagi—“sogoti laivi mai na nona iserau,” ena qai vola e muri o Mosese.

Ena vuku ni veitawasei kei na galili oqo ena dua na vuravura batabata, liwalala, sa dua mada na ka na kena veivakacegui vei Atama kei Ivi me rau nanuma tiko e dua na ka: na yalayala oqori a vakayacori—e dua na ka tabu ka tawamudu ka vakatokai me veiyalayalati. Erau a yalataka ni rau na talairawarawa vei Tamada ena veisiga kece ni nodrau bula, ka sa yalataka o Koya me vakarautaka e dua na iVakabula, ka na vakamamadataka na nodrau mosi kei na rarawa, sorovaka na nodrau cala, ka kauti rau lesu mai ki na Nona iserau.

Ia erau na nanuma vakacava na tamata oqo na ka erau a yalataka? Erau na kila tikoga vakacava na kedrau ituvaki rerevaki—kila tikoga ena gauna taucoko, ena siga kei na bogi?!

Na iVakananumi ni Nodrau Veiyalayalati

Me baleta na veivakananumi vakaoqori a solia vei ira o Koya na “kote kuli ni manumanu.” Sa dua na isolisoli talei oqo ena kena gauna donu. Ni rau sa kania oti na vuanikau vakatabui, voleka ni gauna vata rau sa kila kina o Atama kei Ivi ni rau sa luvawale. Taumada, rau a saga me rau vunitaka na nodrau luvaiwale ena drauni lolo. Oti, ni rau rerevaka ni na sega ni rauta, erau qai saga me rau vunitaki rau mai vua na Turaga. (Na sasaga lialia vakaoqo sa ivakadinadina ni sa yaco mai na bula vakatamata oqo!) Mai na gauna oya kina gauna oqo, sa sureti ira na Luvena e dua na Tamada dauloloma me ra lako tani mai na nodra vuni, ki Vua. Me vaka na kote ni kuli ni manumanu ena gauna oya kei na veimataqali isulu me tekivu mai na gauna oya, sa sega ni biuti keda luvawale o Koya ena Nona loloma cecere ia sa vakaisulutaki ira na talairawarawa ena dua na “icurucuru ni buladodonu,”e dua na ivakananumi ni noda yalayala kei na veiyalayalati. Na “isulu ni veivakabulai” oqo e ivakatakarakara ni isolisoli cecere duadua vei ira kece, na Veisorovaki i Jisu Karisito.

Na Qameni e iVakatakarakara ni iVakabula

Ia, na vakasama kece oqo me baleti Atama kei Ivi kei na veiyalayalati kei na isulu, e sega walega ni vakasama. E sega ni dredre me da raitayaloyalotaka na veika erau vakila o Atama kei Ivi, baleta ni da sotava talega na leqa ena vuravura lutu oqo. Eda sa tawasei tani talega mai na iserau ni Kalou, ka da sa vakayawaki keda tale ena veigauna kece eda talaidredre kina. Me vakataki Atama kei Ivi, sa soli vei keda na iVakabula vata ga o ya, o Jisu Karisito na kai Nasareci, Alifa kei na Omeka, na Luve ni Kalou bula. Me vakataki Atama kei Ivi, eda sa veiyalayalati kei na Kalou. Ka, me tiki ni edaumeni ni valetabu, sa soli vei keda e dua na ivakananumi tabu vakayago ni veiyalayalati oya—e dua na ivakatakarakara ni iVakabula Vakaikoya. Ena noda itabagauna e vakatokai me isulu ni matabete tabu.

iTukutuku ni Mataveiliutaki Taumada ena Qameni

Kena matailalai mai Na iKarua ni Lako Mai, mai vei Kevin Keele

Na qameni ni matabete tabu e vakananuma vei keda na ilati ena valetabu, ka ivakatakarakara kei Jisu Karisito na ilati oya. Nio daramaka na nomu qameni, o sa daramaka e dua na ivakatakarakara tabu i Jisu Karisito.

Na kena daramaki e dua na ivakaraitaki e taudaku ni nomu yalayala e loma mo muri Koya. Na qameni sa ivakananumi talega ni nomu veiyalayalati ni valetabu. E dodonu mo daramaka tiko na qameni ena siga kei na bogi ena nomu bula taucoko. Ni sa dodonu me vagalalataki me baleta na itaviqaravi ka na sega ni rawa ni caka ni daramaka tiko na qameni, segata mo vakalesuya ena kena gauna totolo duadua. Nio rokova na nomu veiyalayalati, oka kina na itavi tabu mo dara na qameni me vaka e vakaroti ena cakacaka vakalotu ni inisitori, ena levu cake na nomu rawata na loloma veivueti, veitaqomaki, igu, kei na kaukauwa.

Eda dara na qameni oqo e noda isulu iloma. Se cava ga na noqu itavi, se cava ga na itavi au vakayacora ena bula oqo, se cava ga e gadreva na itavi ni bula e veisiga, e loma na noqu veiyalayalati kece sara—ena veigauna kecega ka sega ni mudu. E lomana kece sara na yalayala tabu oqori au kukuva matua sara. E sega ni vakaraitaki se dokadokataki tu e matai vuravura na qameni, ka sega talega na noqu veiyalayalati. Ia au dau vakavolekati rau ruarua tikoga vei au—ena kena voleka duadua au rawata. Erau sa ka vakaitaukei sara ka bibi vakalou.

Nida nanuma tiko na veiyalayalati oqori, na yalayala rua na yasana oqori, eda sa daramaka tiko na isulu ena noda bula taucoko. Na ivakarau oqo e vakaraitaka na noda gagadre vua na iVakabula me dau veivakayarayarataki tudei ena noda bula. Eso tale na ivakatakarakara lomani era dau yaco vagauna. Eda na papitaiso vakadua ga ena noda bula. Eda vakaivotavota ena sakaramede vakadua ena dua na macawa. Keitou dau lako kina valetabu ena veigauna e rawa kina. Ia e duidui na qameni ni matabete tabu: na ivakatakilakila oqo eda rokova ena veisiga kei na bogi.

Oqori na ivakarau ni veiyalayalati—sega ni dau biu vakatikitiki baleta noda logavinaka se ena vakawelewele ka sega ni vakavoui me veisotari kei na iwalewale ni isulusulu e donu vei ira na tamata. Ena bula ni dua na tisaipeli i Jisu Karisito, sa dodonu me veisautaki na sala ni vuravura me salavata kei na noda veiyalayalati, ka sega ni kena veibasai.

Nida dara na qameni, eda sa, me vaka era sa vakavulica na Mataveiliutaki Taumada, eda sa tokara tiko e dua na ivakatakarakara tabu kei Jisu Karisito. Ia ni sa vaqori, na cava eda na vaqara kina e dua na iulubale meda luvata kina na ivakatakarakara oya? Na cava me da vakuwai keda kina mai na yalayala ni mana, veitaqomaki, kei na loloma cecere e matataka na qameni? Ia, ena veigauna kece eda na luvata kina vakawawa na qameni, e dodonu meda gadreva me da dara lesu tale, ena kena gauna totolo duadua, baleta ni da nanuma ruarua na yalayala kei na veika rerevaki ka ibalebale ni noda veiyalayalati. E bibi duadua, eda nanuma na kauveilatai kei na ibulubulu lala i Karisito.

Eso era na kaya beka, “E tiko tale eso na sala meu nanumi Jisu kina.” Au na sauma, totoka qori. Na kena levu ga na kena vinaka cake. Meda vakasamataka na levu ga ni sala e rawa ni da cakava meda maroroya kina na noda yalayala meda “nanumi koya tikoga.” Ia nida vakayacora vakakina, ena rerevaki kevaka eda nakita me da vakawalena na ivakananumi sa solia na Turaga sara ga Vakataki Koya vei ira era sa edaumeni, na qameni ni matabete tabu.

O Jisu Karisito kei na Nona kosipeli na ibalebale ni veika kece vei au. Na noqu inuinui kei na gagadre tawamudu, na veika kece e bibi vei au, e sema toka Vua. O Koya na “uluvatu ni noqu veivakabulai,” na noqu sala meu yaco kina vei Tamaqu Vakalomalagi, na sala duadua ga meu lesu kina kina veika a tu vei au ena dua na gauna kau sa vinakata oqo meu rawata tale, vata kei na vuqa tale na ka. Na Nona isolisoli vei keda sai koya na lomasoli levu duadua au se bau qai ciqoma, ka soli ena yalovinaka—voli ena rarawa tawayalani, ka yacova e dua na iwiliwili tawayalani, ka soli ena loloma tawayalani. Na wa vakavotona kei na co, na mosi kei na rarawa, na rarawa kei na ivalavala ca ni vuravura lutu oqo era sa “tilomi ira kece ko Karisito.”

Au sa dau daramaka kina na qameni ni matabete tabu—ena veisiga kei na bogi me vaka na kena dodonu me tekivu mai na gauna au sa edaumeni kina ena 64 na yabaki sa oti, niu sa yabaki 19—baleta niu lomani Koya kau gadreva na yalayala e matataka.

Taro me baleta na Daramaki ni Qameni?

Eso beka vei kemuni oni wilika tiko na itukutuku oqo ka nuitaka niu na sauma e dua na taro me baleta na qameni. O nuitaka beka e dua na “Sa kaya vakaoqo na Turaga”—se dua mada ga na “Sa kaya vakaoqo na Nona tamata”—ena dua na ka e voleka ki yalomu. Na nomu taro e rawa ni vu mai na dua na ituvaki ni tamata yadua e semati ki na cakacaka, vakaukauwa yago, savasava, draki, rakorako, valenibula, se dua mada ga na ituvaki vakavuniwai.

Eso na isau ni mataqali taro vakaoqo e rawa ni kunei ena temples.ChurchofJesusChrist.org kei na wase 38.5 ni iVoladusidusi Raraba. E rawa nira veitalanoataki kei ira na lewe ni matavuvale kei ira na iliuliu nuitaki me baleta e dua na ka vakaitaukei. Ia, e tiko, na veidusimaki matata sara e soli ena cakacaka vakalotu ni inisitori, ka tiko me tawamudu ka sega ni mudu na Tamamu mai Lomalagi, o koya e kilai iko ka lomani iko ka kila na veika kece me baleta na nomu ituvaki. Ena marautaka o Koya nio tarogi Koya vakataki koya ena taro oqo.

iTaba ni vale balavu e St. Valetabu e George Utah

Yalovinaka kua ni nanuma cala. Nio dodoliga yani kina veidusimaki vakalou, ena sega ni vakauqeti iko na Yalo mo cakava e dua na ka e lailai mai na muria na ivakasala e ciqomi ena valetabu kei na ivakasala vakaparofita era wasea na Mataveiliutaki Taumada ena nodratou itukutuku wale tikoga oqo. Ena sega ni vukei iko na Tamada dauloloma me lailai sobu mai na ka o rawata na ka o cakava mo sotava kina na Nona ivakatagedegede ni yalodina kei na bula rakorako me na vakalougatataki iko ena gauna oqo ka tawamudu. Ia e kila beka o Koya na nomu taro, ka na vukei iko beka o Koya mo ciqoma na veivakalougatataki ni kena rokovi na qameni ka maroroi na nomu veiyalayalati? Io! E dodonu beka mo veitalanoa kei ira na kenadau ni veiqaravi vakavuniwai kei na kenadau ni bula ni gadrevi vakakina? O io! E dodonu beka mo sega ni kauwaitaka na vakasama se rai baleta na ivakatakilakila? Au sa masulaka mo kakua ni vakakina.

Au sega ni sauma rawa na taro kece e tu vei iko. Au sega mada ga ni sauma rawa na taro kece e tu vei au. Ia au rawa ni yalataka vei kemuni, me vaka niu iApositolo ni Turaga o Jisu Karisito, na veivuke ni dua na Kalou dauloloma, o koya e vakasaqara na nomuni qaqa kei na veivakalougatataki kecega, ena sala e sega ni rawa ni o kila se raica rawa ena gauna oqo, nio maroroya na veiyalayalati o sa cakava vata kei Koya.

iDusidusi

1. Mosese 5:4

2. Mosese 4:27

3. Raica na Mosese 4:13–14.

4. Raica na Aisea 61:10; 2 Nifai 9:14; raica talega na Ai Vakatakila 19:8; 2 Nifai 4:33; Momani 9:5; Vunau kei na Veiyalayalati 109:76.

5. E matata ni qameni eda dara nikua e sega ni tautauvata kei na kote kuli ni manumanu e soli vei Atama kei Ivi. Sa veisau na qameni ena sala eso ena veiyabaki sa oti, oka kina na isulu kei na droini. Ia na veika e bibi dina—na ituvaki tabu ni isulu, na veiyalayalati e matataka—ena sega ni veisau.

6. Na yaca taucoko ni qameni oqo, me vaka na yaca taucoko ni Lotu, e veivakavulici. Na matabete sa kaukauwa ni Kalou, kei na daramaki ni qameni sa ivakananumi ni kaukauwa vakalou sa vakarautaki tu vei keda nida cakava ka maroroya na veiyalayalati kei na Kalou.

7. Moronai 4:3; 5:2.

8. 2 Nifai 4:30.

9. Mosaia 16:8; raica talega Alama 31:38.