Domodra na Yalododonu Edaidai

Na Yalo a Veitomani Vei Keimami

Mai vei Lisa Nielsen Young, South Carolina, Amerika

Au rawa ni vakila na nodra loloma na lewe ni tabanalevu nira lagasere ka sega niu vakatarataka.

Droini mai vei Katy Dockrill

Keirau a tiko ena dua na taoni lailai e Georgia, Amerika, ena gauna a mate kina o tamaqu ni se qai yabaki 55 ga. E vuqa vei ira noqu matavuvale era a vakaitikotiko ena dua tale na yasana. Se bera vakadua ni bau vakilai vakalevu na 2,000 na maile (3,200 km) ni neimami veiyawaki me vaka e vakilai ena gauna oya.

Na watiqu a bisopi tiko kau dautabaoqani ni neitou tabanalevu lailai. Ena yalo luluvu kei na oca niu a veivuke tiko ena ituvatuva ni veibulu, au a vakila sara ga na dadaga ena Sigatabu oya ni yaco mai na gauna me lagati kina na iotioti ni sere ni soqoni ni sakaramede: “Me sa Tiko Ga kei Kemuni” (Serenilotu, naba 88).

Ena veimama ni ikarua ni qaqana, au a luvuci sara ga ena rarawa. Ia au a sega ni kila noqu vakacavara rawa na qaqa ni sere oya, ia a sakure tiko na ligaqu ka tonawanawa na wainimataqu kau mani cegu kina ni se vo tu edua taucoko na qaqana. Au a sega ni tarova rawa na noqu tagi.

E a yaco edua na cegu lekaleka nira kila na ivavakoso ni sa mai mudu na oqani. Ia era sa qai tekivu laga sere na lewe ni tabanalevu ka sega ni vakatarataki. A sega ni taucoko sara na lagasere. Ni keimami a lewe lailai ga. Ia na Yalo a veitomani vei keimami. Ena dela ni noqu tagi kei na madua, au a rawa ni vakila na nodra loloma e vuqa ni ra lagasere tiko.

Me sa tikoga kei kemuni;

Yalo Tabu dauloloma;

Vere kece me sabaya.

Ka dau wanonovi kemuni.

Ni tini na sere, e a mokoti au o koya ka liutaka tiko na sere niu mamakeukeu toka ena masu ni suka. E vica na tamata era a qai gole mai ki na oqani ka tovaki wai tu na matadra mera vakaraitaka na nodra lolosi baleti tamaqu.

E muri, au a qai tukuna vua na iliuliu ni sereivakatagi niu na taba piano tiko ena gauna ni veibulu. E a sega ni vaka me vakasama vinaka baleta na veika se qai yaco oti ga, ia o tamaqu a dau taleitaka me rogoci au niu taba piano. Au a vinakata meu taba piano vei koya. Au a qai kila e kea na nona voleka vei au ena iotioti ni serenilotu.

Au vakavinavinakataka vakalevu na serenilotu. Au vakadinadinataka ni ivakatagi e rawa ni vakavulici keda ka vakacegui keda ena sala e sega ni rawa ki na vosa me cakava. Me vaka eratou a vola na Mataveiliutaki Taumada ena ikau ni serenilotu, “Na Serenilotu … e vakacegui ira na oca, vakaceguya na yalorarawa, ka vakauqeti keda me da vosota me yacova na ivakataotioti.” Au vakavinavinakataka talega na loloma ni dua na tabanalevu vinaka niu a yawa sara tu mai na noqu matavuvale. Au kila ni keirau na sota vakaidina tale kei tamaqu.