Marautaka na Parofita

E lululu o Peresitedi Russell M. Nelson kei na dua na marama mai Awai — Kidavaki ira na Yalododonu Edaidai o Peresitedi Russell M. Nelson mai Kona, Awai, ena ika 16 ni Me, 2019, ena nona ilakolako ni veiqaravi vakalotu ena Pasifika.

Kemuni na iTubutubu Lomani,

Ena vula oqo ena marautaka kina o Peresitedi Russell M. Nelson na ika 100 ni nona siganisucu. Na itukutuku ena ilavelave oqo e vakabibitaka na sala e dusimaki keda kina o koya kei ira na parofita tale eso vei Jisu Karisito.

E dua na sala e rawa nira muria kina na parofita na itabagone o ya ena nodra rogoca na nona veisureti mera dau tiko wasoma ena semineri ka wilika na ivolanikalou ena veisiga. Sa yalataka o Koya na veivakalougatataki totoka vei ira era cakava, oka kina na vulici ni ciqomi ni ivakatakila yadua, kunei ni isau ni taro dredre ni bula, kei na noda mai kila na iVakabula. Era sa bau rogoca beka na luvemu itabagone na veisureti vakaparofita oqo? Sikova na seminary.ChurchofJesusChrist.org mo kila kina eso tale na itukutuku.

Veitalanoataki ni Kosipeli

Nanuma na Nomu Veiyalayalati

Ena itukutuku nei Peresitedi Jeffrey R. Holland ena tabana e 4, eda vulica kina na kena maroroi na noda veiyalayalati ka daramaki na qameni ni matabete tabu nida sa edaumeni eda na taqomaki ka vakavolekati keda kina Yalotabu. E rawa nio wasea kina nomu matavuvale e dua na malanivosa mai na itukutuku ka veivosakitaka ni daramaki ni qameni “e dua na ivakaraitaki e taudaku ni dua na yalayala e loma.” Na cava tale eso na ivakaraitaki e tautuba eda cakava meda vakaraitaka kina na noda yalayala meda tisaipeli?

Muria nai iVakaro

A kerea o Elda Isaac K. Morrison vei Peresitedi Nelson e dua na itukutuku me baleti watina kei ira na luvena. Na nona isaunitaro na parofita o ya “Muria na ivakaro.” (Raica na tabana e 20.) O na tarogi ira beka na luvemu: Ena duidui vakacava na nomu digidigi kevaka a dabe vata kei iko na parofita ena dua na teveli ka kerei iko mo muria na ivakaro?

Muria na Parofita

Sa yabaki 100 o Peresitedi Nelson ena vula oqo! E wasea o Peresitedi Dallin H. Oaks eso na lesoni sa vulica mai vua na parofita (raica na tabana e 12). Na cava era sa vulica na luvemu mai vua na parofita? E tiko beka e dua na vosa se lotu e vakaibalebale vakalevu vei ira? Wasea na nomu nanuma. E rawa nio sarava e dua na nona itukutuku ena vidio.

Lako Mai, Mo Muri Au Veimarautaki Vakamatavuvale

Rogoci na Domo ni Kalou

3 Nifai 11:5

Ena 3 Nifai 11, eda wilika kina na nodra sega ni rogoca rawa na domo ni Kalou ko ira na Nifai me yacova nira sa vukica na matadra kina domo ka dolava na daligadra.

Tu e matana e dua. Vuki me kakua ni drau veiraici.
E dua na tamata me vosa, ka vakarorogo na kena ikarua. Me ubia na daligana o koya e vakarorogo.
Me qai cavuta o koya e vosa e dua na malanivosa ena domo malumu, me vakataka “Au tovolea tiko meu vakataki Jisu.”
Raica mada ke rawa vua e vakarorogo me kila na ka e tukuna tiko o koya e vosa.
Ia oqo me qai tabonaka na daligana o koya e vakarorogo tiko ka vuki vua e vosa tiko.
Me tokaruataka tale o koya e vosa na malanivosa vata ga oya.

Veivosaki: E rawarawa beka na rogoci ni domo ni rau veiqaravi tu kei koya e vosa tiko o koya e vakarorogo? Wilika na 2 Nifai 11:5. E rawa vakacava mo vagolea na matamu ka dolava na daligamu kina domo ni Kalou nikua?