Domodra na Yalododonu Edaidai

A Tiko Vua na Kalou Edua na Ka e Vinaka Cake me Neitou

Mai vei Ronald Baa, Northern Mindanao, Yatu Filipaini

Ni rau vakavulica vei au na daukaulotu niu luve ni Kalou, au a kila ni tu vei Koya e levu sara na veivakalougatataki me baleta na noqu matavuvale kei au.

iTaba mai vei dauvolaivola

Au a tubu cake ena dua na koro lailai ka e loma ni vanua ena Yatu Filipaini. E a dravudravua tu na noqu matavuvale. Ena Yatu Filipaini, kevaka e sega vei iko na ilavo, ona sega ni rawa ni lako i vuli. Dina ga ni tiko na veivakataotaki oya, au a dua toka na cauravou dausasaga.

Au tukuna vei rau na noqu itubutubu niu vinakata meu vuniwai se qasenivuli se meu kenadau ena dua na cakacaka, ia eratou dau tukuna vei au meu muduka na tatadra. A sega vei keitou na ilavo meu gole ki na dua na univesiti. Erau a vinakata na noqu itubutubu meu yalovakacegu ka kakua ni yalolailai me baleta na noqu bula.

“Mo dua na kenadau ena dua na cakacaka e sega ni rauti kedatou,” erau a kaya. Erau a sega ni vakabauta ni dua na ka e vinaka cake a vakarautaki tu me baleta na neitou matavuvale mai na veika sa tu rawa tu vei keitou.

Ia oqori a se bera ni keitou lewena Na Lotu i Jisu Karisito ni Yalododonu Edaidai.

Keitou tiko vakayawa sara mai na veikoro lelevu kece, ia erau a kunei keitou na daukaulotu ka dau talevi keitou tiko ga. Erau a solibula vakalevu sara me rau vakavulica na noqu matavuvale, ia a veisautaka vakadua na neitou bula.

Ni keitou lewena na Lotu, au vulica kina niu sa luve ni Kalou ka rawa niu tubu ka vuli ka yaco me matua sara (raica na Mosese 1:39; “Na Matavuvale: Ai Vakaro ki Vuravura Raraba,” Gospel Library se Valenivola Vakosipeli). Ena kilai ni kosipeli, au a kila kina ni sa kena gauna meu laveta cake na bula ni noqu matavuvale. Keitou a sega tale ni tamata dravudravua ga mai na dua na koro lailai—keitou sa luve ni Kalou tagane kei na yalewa bula kilikili ka ganita na veivakalougatataki sa yalataka tu o Koya vei ira era muri Koya ena yalodina.

Erau a kauta mai na daukaulotu na kosipeli ki na noqu bula, na kosipeli a kauta mai na sereivakatagi ki na noqu bula, ka a kauta mai vei au na sereivakatagi e dua na sikolasivi meu curu ki na university. Au rawata e dua na koroi ni bachelor ni vuli ena sekenidri ka qai tarava edua na diqiri ena sereivakatagi, ka vakatabakidua ki na liutaki ni matasere. Oqo au vakatavulica tiko na sereivakatagi ena Liceo de Cagayan University ka konidakita ena Liceo U High School Glee Club. Au liutaka tale tiko ga e dua na matasere ni lewe ni Lotu. E neimami lalawa me wasea na dina ni Kalou ena sereivakatagi.

Na noqu taurivola mai na university a solia vei au edua na bula vou. Au sega ni kila na vanua au na tiko kina nikua ke sega na kosipeli i Jisu Karisito.

Na tamata yadua sa nodra kece na madigi mera vuli, me vakataki au, ni tiko e dua na Tamadra Vakalomalagi ka sa vakalougatataki ira mera na rawa ni tubu ka vuli ka yaco me matua sara.