“Russell M. Nelson: Na Parofita Ni Noda Siga,” Liaona, Sepi. 2024.
Russell M. Nelson: Na Parofita Ni Noda Siga
Ni tiko edua na parofita me dusimaki keda ena veisiga e muri oqo, eda sa tamata kalougata dina.
O Peresitedi Russell M. Nelson e kidavaki ira tiko na tamata ni oti e dua na lotu mai Singapore ena ika 20 ni Noveba, 2019.
Ena gauna a vakalewa kina edua na dauveivakatarogi Na Lotu i Jisu Karisito ni Yalododonu Edaidai me “dua na lotu era cicivaka na tamata qase,” a sauma o Peresitedi Gordon B. Hinckley (1910–2008), “E sega beka ni ka totoka me veiliutaki tu edua na turaga yalomatua, e dua na turaga vakatulewa vinaka ka sega ni kuitaki ena veicagi kecega ni ivakavuvuli?”
O Peresitedi Russell M. Nelson, na parofita qase duadua me veiqaravi ena itabagauna oqo, edua na turaga vakaoqo. Ena mai yacova na nona ika 100 ni yabaki ena i ka 9 ni Sepiteba, 2024. O koya e dua na iliuliu sinai ena yalololoma kei na ivakarau vinaka, raiyawa ka bulabula, yalovinaka ka yalomatua.
Au lomani Peresitedi Nelson. Keirau sa veitokani tu mai me 60 na yabaki ka veitokani vaka iApositolo me 40 na yabaki. Me tekivu mai na Janueri ni 2018, au sa vakalougatataki meu veiqaravi ena ruku ni nona veidusimaki ena Mataveiliutaki Taumada ni Lotu.
Kacivi me liutaka na Lotu vakalesui mai i Jisu Karisito ka kena qasenivuli iliuliu duadua, e kila o Peresitedi Nelson na iVakabula, ka nona parofita o Koya. Ena loma ni dua na senijiuri ni bula kei na vuli, e vakairogorogo o koya ena veiqaravi vakacakacaka ka vakakina ena loma ni mataivalu. Ena loma ni nona matavuvale levu, sa yaco o koya me dua na iliuliu ni matavuvale dau loloma ka vakayaco ka. Mai na veikacivi ni Lotu, oka kina na ono na yabaki sa oti vaka parofita ni Turaga, sa dua na ivakaraitaki vinaka ni iliuliu ena Lotu vakalesuimai ni Turaga.
Ena loma ni dua na senijiuri ni bula, sa vulica ka vakatovotovotaka o Peresitedi Nelson na idola ni marau ena bula oqo kei na bula sa bera mai—na ka e vakatoka me “lesoni bibi duadua” ni bula.”
Sa vakavulica vei keda o Koya ni dodonu meda “tekivu ena noda nanuma taumada na icavacava.”
E taleitaka o koya na vale ni Turaga. Ena nona veiyabaki vaka-Peresitedi ni Lotu, sa kacivaka oti o koya e 153 na valetabu vou—rauta ni veimama ni 335 na valetabu ni Lotu era sa tara oti, era se tara tiko, se era sa kacivaki oti ena itabagauna oqo.
Sa vakatavulica vei keda o Koya ni noda tara valetabu kece e kauta mai vakavoleka na valetabu, kei na veivakalougatataki ni veiyalayalati ni valetabu, vei ira e vuqa sara na luve ni Kalou. Oqori na ituvatuva ni Kalou.
E vakavulica o Peresitedi Nelson, “Au sa vulica ni ituvatuva nei Tamada Vakalomalagi vei keda e vakasakiti, kei na ka eda cakava ena bula oqo e bibi vakaidina, kei na Veisorovaki ni iVakabula e vakavuna me rawati kina na ituvatuva nei Tamada.” Na kilai vakamatata ni ituvatuva oya, a kaya o koya, “e kauta tani na veika vuni mai na bula kei na veilecayaki mai na noda veisiga ni mataka. E vakatara vei keda yadua meda digitaka na ivakarau eda na bula kina e vuravura kei na vanua eda na lai bula tawamudu kina.”
Me vaka nida Yalododonu Edaidai, eda sa tamata kalougatata dina meda liutaki mai vua na italai yalomalua ni Turaga, o Peresitedi Nelson, ka sa yalodina tiko me vakarautaka na vuravura me baleta na iKarua ni Lako Mai ni noda iVakabula ka Dauveivueti, o Jisu Karisito. Meda qai masulaka tikoga, vakadinadinataka tiko, tokona, ka vakavinavinakataka na Kalou ena vuku ni noda parofita—o Peresitedi Russell Marion Nelson.