Sega tale ni Galili: 7 na Sala mo Sema Kina

Mai vei Julianne Holt-Lunstad

Parofesa ni Vulici ni Vakasama kei na iTovo, ena Brigham Young University

Na galili e dua na bolebole ka rawa ni vakadrukai ena sasaga vagumatua, igu ni lomada, kei na veivuke mai vua na iVakabula.

Eda na rairai sotava taucoko beka na galili ena so na gauna. Na vakilai vagauna ni galili e rawa dina ni bulabula ka vuavuai vinaka, edua na sikinali mai na yagoda ni gadrevi vei keda meda tara cake na veiwekani e qaqaco cake. Ia na galili e tomani tikoga e vakavuqa me dua na itatao levu ki na marau.

Na ituvatuva ni bula marau nei Tamada Vakalomalagi e okati kina na vakasoqoni vata vakamatavuvale ka vaka ivavakoso talega. Oqo ena vukei keda sega walega ena noda torocake tawamudu ia ena noda gagadre vakatamata meda veimaliwai, ka vakila nida ciqomi, meda solia ka ciqoma na veitokoni vakayalo. O ira na dauvakadidike era sa tekivu me raica na veisemati ena veimaliwai me dua na gagadre vakatamata ka veiwekani kei na noda bula vinaka kei na noda rawa ni bula tiko.

E gagadre talega vakayalo. Eda veigadrevi meda tiko-vinaka kina vakayalo ka tubu. Kei na dua na lomalagi ka vakasinaiti tu ena veiwekani tawamudu e sa dua na itovo ni vakasama marautaki dina (raica na Vunau kei na Veiyalayalati 130:2).

Vakasamataka na veivakasama oqo mo tusaqata kina na galili ena nomu bula:

Nuitaka na iVakabula. Na Tamamu Vakalomalagi kei Jisu Karisito erau kila na nomu galili ka vinakata me veivuke. Na nomu kila ni sa kila vinaka tu na iVakabula na mosi ni galili ena rawa ni vukei iko mo kila ni kila vinaka o Koya na veika o vakila. Na toro voleka vua na Tamada Vakalomalagi kei na iVakabula ena masu, vulici ni ivolanikalou, kei na sokalou ena Siga ni Vakacecegu kei na valetabu ena vukei iko mo kila nio sega vakadua ni tiko duadua. Me vaka e vakatavulica o Peresitedi Russell M. Nelson, “Ni vakanamata na noda bula vei … Jisu Karisito kei na Nona kosipeli, e rawa nida vakila na reki veitalia na cava e yaco—se sega ni yaco—ena noda bula.”
Mo yalovinaka. Na galili e rawa ni vakavuna meda vakatitiqataka ni noda sasaga ena vukea me vakalailaitaka na noda mosi. Dikevi iko mo kila kina kevaka o dau vakatitiqa tu ga. Ni vakasaqarai tiko na veitokani, nanuma ni na daugadrevi na yalovinaka. Na vakabula mada ga vei ira na tiko e yasada e rawa ni vakayaco veisau. Kei na vakasaqarai ni madigi mera vakalougatataki o ira ka sotava tiko na dredre ena vuku ni galili e rawa ni veivuke e mana duadua vei ira.
Veitarai cake ena veika eda taleitaka vata. Vakasaqarai ira na tamata kei na ilawalawa ka tautauvata kei na nomu na veika era taleitaka, nodra rai, kei na ivakatagedegede. E rawa ni o vakaraica (se navuca mo tekivuna sara ga!) e dua na isoqosoqo ni wilivola, ni veiqaravi, ni taubale, ni lagasere, ilawalawa ni lotu vakamatavuvale, se na veiwatini era sa tiko taurua ga.
Vaqaqacotaka na veiwekani sa tiko rawa. E vuqa na tamata sa tiko rawa na nodra veiwekani ena matavuvale, itokani, ira na tiko voleka, kei ira na lewe ni tabanalevu. Na susugi cake ni veimaliwai oqo e dua na vanua vinaka me tekivutaki kina na valuti ni galili. Na veitokani e taura na gauna me tarai cake kina, o koya gona mo dauvosota nio susuga cake tiko na veimaliwai. Nanuma tiko ni ivakatagedegede ni nomu veimaliwai e bibi cake sara mai na iwiliwili ni veiwekani sa tiko vei iko.
Vakasaqara na madigi eso mo veiqaravi ka wasea na nomu taledi kei na isolisoli vakayalo. E voleka ni tawayalani na veimadigi eso ni veivuke kei na veiqaravi ena Lotu, noda matavuvale, kei na itikotiko raraba. Nida vakila ni mana tiko na noda sasaga vei ira na tani, ena rawa ni vakaibalebale ka vakainaki ki na noda bula. Noda vakila ni noda bula e vakaibalebale vei ira na tani e sa dua na iyaragi kaukauwa me valuti na galili.
Tuvatuva ki na veigauna dredre. Na vakacagicagi kei na tikinisiga bibi eso, me vaka na vakananumi ni nona mate edua na daulomani, e rawa ni dredre. Tovolea mo tuvanaka na itaviqaravi vata kei ira na itokani se matavuvale ena veisiga vakaoqori mo kakua kina ni vakananuma tiko na isema o diva me se tiko.
Vakaitavi ena cakacaka ni valetabu kei na tuvakawa. Oqo e dua na sala kaukauwa me vakilai kina na vakacegu kei na veivakataukenitaki. E yalataka o Elder Dale G. Renlund ena Kuoramu ni iApositolo Le Tinikarua e vuqa na veivakalougatataki e rawa ni da ciqoma, oka kina na “tubucake ni loloma kei na vakavinavinaka vei ira na tubuda kei ira na wekada bula, meda kakua vakadua ni vakila tiko kina na galili.”

Vei ira e vuqa na tamata, na galili e dua na bolebole ka rawa ni valuti ena sasaga vagumatua, igu ni lomada, kei na veivuke mai vua na iVakabula.