3 Na Sala ni Gugumatua ena Bula ka Marautaka

Mai vei Emma Hebertson

Mekasini ni Lotu

E vinakata na Tamada Vakalomalagi meda kunea na reki ena bula sa soli vei keda.

itabagone qase cake e Jamani — Guido mai Jamani

Na cava na iotioti ni gauna o a marau vakaidina kina?

E a dredre beka me saumi na taro oya?

Ena veigauna dredre eso, eda na rawa ni vakaogai tu ena noda vakatovolei ka da sega ni rawa ni nanuma kina se vakacava tu na vakilai ni reki. Me vaka a vakamacalataka o Sisita Reyna I. Aburto, na iKarua ni Daunivakasala e liu ena Mataveiliutaki Raraba ni iSoqosoqo ni Veivukei: “Na veio loaloa e rawa … ni komuni talega ena noda bula, ka rawa ni vakamatabokotaki keda ki na rarama ni Kalou ka vakavuna meda taroga kina ke se tikoga na rarama oqo me noda.”

Ki vei keda e vuqa na itabagone qase cake, na bula e rawa ni vakilai me dua ga na ka e lako curumi—edua na ka meda vosota me yacova ni da sa qai ciqoma na veivakalougatataki sa yalataki vei keda.

Na ka eda guilecava ena so na gauna sai koya ni oya edua talega na ka meda marautaka. Na veivakalougatataki ni marau tawamudu sa rawa ni tekivu sara ga oqo.

Oqo e vica na sala eda rawa ni utura tale kina na rarama kei na reki ena noda bula.

Nanuma na Veidina Rawarawa

Mai na noda vakavulica na matada meda rai ena butobuto, eda rawa ni vakasaqara na cila ni rarama ka kauta mai na kosipeli i Jisu Karisito ki na noda bula.

E vakananuma vei keda o Peresitedi Russell M. Nelson ni “reki e vu mai vei [Jisu Karisito] ena vukuna talega. O Koya na ivurevure ni reki kecega.” Nio sasaga tiko mo kunea na rarama ena nomu bula, na gole vei Jisu Karisito e dodonu me imatai ni kalawa.

E rawa talega ni o kerea na Tamada Vakalomalagi me vukei iko mo nanuma na bibi ni kemu ivakatakilakila vakalou.

O Elder Gary B. Sabin ena Vitusagavulu a vakavulica “E bibi ki na noda marau meda nanuma nida sa luvena tagane ka luvena yalewa edua na Tamada Vakalomalagi dauloloma.” Na kena kilaivakaidina ni Kalou e kilai iko ka vinakata na veika uasivi me nomu, ena rawa ni vakamarautaka na nomu bula.

Se cava ga na bolebole o sotava, na nanumi taumada ni ivakavuvuli rawarawa eso oqo ni kosipeli ena rawa ni vukei iko mo sureta na rarama ni iVakabula ki na nomu bula.

Kunea Se Cava E Kauta Mai vei Iko Na Marau

Ena so na gauna e rawa ni dredre meda nanuma ni noda marau ena sega ni dau tautauvata kei na nodra na tamata tale eso. Ia na ka dina oqo, nida itabagone qase cake, e dredre meda kakua ni vakatauvatana na noda bula kei ira era tu wavoliti keda. Ia mo nanuma tiko nio iko ga o vakatulewataka tiko na nomu marau.

Tarogi iko: na cava e dau vakamarautaki iko ?

Na cava e dau vakavuna mo matadredredre?

Me vaka a vakatututaka o Peresitedi Dieter F. Uchtdorf nia se iKarua ni Daunivakasala tiko kina ena Mataveiliutaki Taumada, “Mo ni vakamalua mada ka taura e dua na gauna mo kilai iko vakavinaka cake mada.” Vakaraica na totoka ena veika lalai: Taubale. Sikova na valetabu. Curu ki na dua na matacakacaka ni veiqaravi. Raica e dua na qitotalei vou se tomana tale na vanua o a mai cava toka kina ena dua na kena makawa.

A vosa o Elder Richard G. Scott (1928–2015) ena Kuoramu ni iApositolo Le Tinikarua me baleta na kena rawa ni vakararamataka na noda bula na bulibuli ka: “Digitaka edua na ka me vaka na sere ivakatagi, meke, ceuceu, se serekali. Na nomu dau bulibuli ka ena vukei iko mo marautaka na bula. Edau vakavurea edua na yalo ni marau. E vakatubura na taledi vuni, vakabulabulataka na nomu rawa ni vakadeuca na ka, cakacaka, ka kunea na ibalebale ni bula. E kauta laivi na galili kei na mosi ni yalo. E solia e dua na veivakavoui, e dua na lidi ni marau, kei na marautaka na bula.”

Na kunei ni veika e vakasinaita na yalomu ena marau e rawa ni vukea na kena uturi tale na rarama ena nomu bula nio mai vakataotaki tu.

Vakanamata ki na Veika e Bibi Duadua

Kevaka sa rui veiuabaleti na bula ka o vakila ni vaka e kauta tani na nomu igu taucoko mo lako curuma kina na veisiga yadua, taura e dua na gauna ni vakanomodi mo vakanamata ki na veika e bibi duadua.

Me vakayacori vakakina, e vakatura o Peresitedi Uchtdorf me da “vakarawarawataka vakalailai na noda bula.” Vakanamata tale ki na loloma nei Tamada Vakalomalagi kei na isolisoli totoka ni Veisorovaki i Karisito. Vakaliuca na nomu veimaliwai kei na nomu matavuvale, itokani, kei iko.

Valuta na ca ena vinaka, na butobuto ena rarama i Jisu Karisito kei na Nona kosipeli.

Me vaka a vakayaloqaqataki keda o Peresitedi Nelson: “Meda sa kakua walega ni gugumatua ena gauna oqo. Meda karona na veisiga ni mataka ena vakabauta!” Ni vosoti tiko na dredre ni bula, vulica mo marautaka talega na kena totoka. Na marau tawamudu e yalataka na kosipeli ena sega ni qai tekivu ena dua na gauna mai liu—ena tekivu nikua.