Veiyabaki ni Veiqaravi Yalodina: Veivakavuvuli Digitaki mai vei Peresitedi Russell M. Nelson

Ena gauna oqo ni sa yabaki 100, o Peresitedi Nelson sa veiqaravi oti vaka dua na iApositolo me 40 na yabaki. Oqo eso na nona ivakavuvuli mai na nona gauna vaka-Peresitedi ni Lotu.

Tekivu ena Vakasamataki Taumada ni iCavacava

“Na icavacava eda sa sasaga yadua tiko kina sai koya meda laki vakaedaumeni ena kaukauwa ena dua na vale ni Turaga, vauci vakamatavuvale, dinata na veiyalayalati vakayacori e valetabu meda rawata kina na isolisoli cecere duadua ni Kalou—sai koya na bula tawamudu. Na cakacaka vakalotu ni valetabu kei na veiyalayalati o sa cakava sa idola ni kena vaqaqacotaki na nomu bula, nomu bula vakawati kei na matavuvale, kei na nomu rawa ni vorata rawa na nona ravuravu na meca. Na nomu sokalou e valetabu kei na nomu veiqaravi kina baleti ira nomu qase e liu ena vakalougatataki iko me vakalevutaka na nomu ivakatakila kei na vakacegu ka na vaqaqacotaka na nomu yalayala mo tiko ga ena salatu ni veiyalayalati.”

“Ni da Toso Vata Yani ki Liu,” Liaona, Epe. 2018, 7.

Veivutuni e veisiga

E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga ni veivutuni. Na veivutuni e sega ni caka ga vakadua; e tomani tikoga. Sai koya na idola ki na marau kei na vakacegu ni vakasama. Ni okati vata kei na vakabauta, na veivutuni ena dolava na katuba meda rawata na kaukauwa ni Veisorovaki i Jisu Karisito.”

“E Rawa ni Vinaka Cake na Veika Eda Cakava tiko meda Vinaka Cake kina,” Liaona, Me 2019, 67.

Cakava ka maroroya na veiyalayalati

“Na yalewa kei na tagane kece sara e veiyalayalati kei na Kalou ka rokova na veiyalayalati oqori, ka vakaitavi kilikili ena veicakacaka vakalotu ni matabete, ena lutuki koya mai vakadodonu na mana ni Kalou. O ira era sa edaumeni ena vale ni Turaga era sa ciqoma edua na isolisoli mana ni nona matabete na Kalou ena vuku ni nodra veiyalayalati, vata kei na isolisoli ni kilaka mera kila kina na ivakarau mera rawa-ka kina mai na mana oqori.”

“iYau Talei Vakayalo,” Liaona, Nove. 2019, 77.

Rogoca na Turaga

Sa kila tu na Kalou ni gauna e voliti keda kina na veilecayaki kei na rere, na ka ena vukei keda vakalevu sara o ya meda rogoca na Luvena.

“Ena vuku ni noda saga meda rogoca—rogoca vakaidina—na Luvena, eda na dusimaki meda kila na ka meda cakava ena ituvaki cava ga.”

“Mo Rogoci Koya” Liaona, Me 2020, 89.

Digitaka mo Laiva me Qaqa Tikoga na Kalou

Ni tiko ena noda vakasama na ivakamacala vaka-Iperiu ni Isireli eda raica ni sa vakaikuritaki kina na ibalebale ni vakasokumuni nei Isireli. Na Turaga sa vakasokumuni ira era sa tuvakarau mera laiva na Kalou me qaqa tikoga ena nodra bula. Na Turaga sa vakasokumuni ira era na digitaka mera laiva na Kalou me dau ni veivakayarayarataki bibi duadua ena nodra bula.”

“Me Qaqa Tikoga na Kalou,” Liaona, Nove. 2020, 92.

Vakamalumalumutaki Vuravura

“Na vakamalumalumutaki vuravura e sega ni dua na ka mena yaco ena loma ni dua se rua ga na siga. Ena yaco ena loma ni dua na gauna ni bula taucoko ni da katona vakawasoma na ivakavuvuli i Karisito. Eda vakatorocaketaka na vakabauti Jisu ena noda veivutuni e veisiga ka maroroya tiko na veiyalayalati ka na solia vei keda na kaukauwa. Eda tikoga ena salatu ni veiyalayalati ka vakalougatataki ena kaukauwa vakayalo, ivakatakila yadua, vakabauta e vakalevutaki, kei na nodra veiqaravi na agilosi. Na bulataki ni ivunau i Karisito e rawa ni vakavurea edua na kaukauwa levu ni ivakarau ni bula qaqa, kei na igu vakayalo ena noda bula.”

“Vakamalumalumutaka na Vuravura ka Kunea na Vakacegu,” Liaona, Nov. 2022, 97.

Digitaka mo Dautataro

“Na veileti ena vakasava tani na Yalotabu—e veigauna. Na veileti e tokona na nanuma cala ni veivala e sala duaduaga me wali kina na duidui; ia e sega ni vakakina. Na veileti e dua na digidigi. Na dautataro e dua na digidigi. E tiko vei iko na galala mo digitaka na veileti se veivakaduavatataki. Au vakamasuti iko mo digitaka mo dua na dautataro, edaidai kei na veigauna kecega.”

“Era Gadrevi na Dautataro,” Liaona, Me 2023, 100.

Vakasama Vakasilesitieli

Ni o caka digidigi, au sureti iko mo rai vakayawa—ena rai tawamudu. Vakaliuci Jisu Karisito, baleta na nomu bula tawamudu ena vakatau ena nomu vakabauti Koya kei na Nona Veisorovaki. E vakatau tale ga ki na nomu talairawarawa ki na Nona lawa. Na talairawarawa e kauta mai na bula rekitaki vei iko nikua kei na icocovi e cecere, ka tawamudu ni mataka.”

“Vakasama Vakasilesitieli!,” Liaona, Nove. 2023, 118.