Au na Vakarautaki Au Vakacava meu Ciqoma na iVakabula?

Oqo e va na sala o rawa ni ciqoma kina na iVakabula ki na nomu bula.

A gadrevi vei ira na Nifaiti mera vakarautaki ira mera ciqoma vakayago na iVakabula ena kedra maliwa. Na cava eda rawa ni vulica mai na nodra ivakaraitaki me vukei keda meda ciqoma vakayalo na iVakabula ki na noda bula?

Vakasamataka Vakatitobu na Veika ni Kalou

E Liu: Ni vakila tiko na parofita o Nifai ni sa “vakamalumalumutaki,” a vakananuma o koya “na veika sa vakaraitaka vua na Turaga” (Ilamani 10:2–3).

Oqo: Noda nanuma na veika sa cakava vei keda na Kalou, ena veigauna vinaka kei na veigauna ca, ena solia vei keda na kaukauwa kei na yaloqaqa meda volekati Koya tiko ga ka sotava na veisiga ni mataka ena vakabauta.

E vakatura o Peresitedi Henry B. Eyring, iKarua ni Daunivakasala ena Mataveiliutaki Taumada, meda dau vakananuma ka vola e veisiga na veika eda uqeti kina. A kaya: “Sa rawa mo na masu ka vakasama vakatitobu, ka taroga na taro: A solia beka mai na Kalou e dua na itukutuku me baleti au sara ga? Au a raica beka na Ligana ena noqu bula se ki na nodra bula na luvequ?”

O sa bau raica vakacava na loloma, na veivakauqeti, se veivakalougatataki ni Kalou ena nomu bula nikua?

Taura vei Iko na Yaca i Jisu Karisito

E Liu: A doudou o Momani ena nona tukuna ni o koya “e a dua na tisaipeli i Jisu Karisito” (3 Nifai 5:13).

Oqo: E vakatura o Elder Jonathan S. Schmitt ena Vitusagavulu ni rawa ni da vakanamata vei Jisu Karisito ena noda taura vei keda na veitutu duidui eso e Nona. Me kena ivakaraitaki, o Jisu “sai koyakoya tiko ga e nanoa, ena siga edaidai, ka sega ni mudu” (1 Nifai 10:18). E vakatura o Elder Schmitt ni rawa ni da taura vei keda na itutu oqo ena noda yalodina ni bulataka na kosipeli.

Na yaca se itutu cava tale i Jisu Karisito o rawa ni vakasamataka ka vakayagataka vei iko?

Vakatara na iVakabula me Vakasokumuni Iko Vua

E Liu: Ena 3 Nifai 10:4–6, e vakatauvatani Koya o Jisu Karisito ki na dua na toa yalewa ni vakasoqoni ira tiko na luvena. Oqo e ivakatakarakara totoka baleta ni dau kacivi keda tiko ga o Koya meda lako mai Vua me rawa ni taqomaki keda ka vakani keda. Ia sa dodonu meda digitaka meda lako mai Vua. O Koya a kaya, “Au sa nanuma vakavica me’u vakasoqoni kemuni vata me vaka na toa yalewa sa vakasoqoni ira na luvena e ruku ni tabana, ia ko ni a sega ni vinakata” (tikina e 5).

Oqo: O Jisu e tomana tiko ga nikua na nona vakasoqoni keda vata tiko, ia sa dodonu meda vakatarai keda me da vakasoqoni vata yani ki Vua. O vakatarai iko tiko beka mo vakasoqoni vata yani vua na iVakabula ka kunea na veitaqomaki mai Vua, se o besetaka ka dolavi iko tu ki na veika rerevaki?

Na veisureti cava e vakatetea tiko vei iko na iVakabula, kei na cava e gadrevi mo cakava mo ciqoma kina?

Mo rai matua ki Lomalagi

E Liu: A taura e tolu na gauna vei ira na Nifaiti mera qai rogoca rawa kina na domo ni Kalou. “Ka ra sa rogoca tale na domo ena ikatolu ni gauna, era sa vakatudaliga me ra rogoca sara; ka rai matua na matadra ki na vanua ka rorogo tiko mai kina; ka ra rai matua ki lomalagi, na vanua sa rogo mai kina na domo” (3 Nifai 11:5).

Oqo: Edua na sala eda rawa ni “rai matua kina ki lomalagi” sa ikoya mai na malanivosa nei Peresitedi Russell M. Nelson, meda “vakasama vakasilesitieli.” E vakamacalataka ni dua na tiki ni vakasama vakasilesitieli sai koya “na noda dau vakanananu vakayalo.”

Na cava o rawa ni cakava mo dau vakanananu vakayalo vakalevu cake ka “ rai matua ki lomalagi”?