Na Vinaka a Kauta Mai vei Au na Kosipeli

Mai vei Tom Yellowman, New Mexico, Amerika

Au a vakila na Yalo Tabu, mai vei ira na tamata e valenilotu.

Niu tubu cake tiko, au a dau vakaliuci tukaqu tu e yasa vei tinaqu me noqu qaqa, na noqu acheii. A qaqaco o koya ena nona vakabauta. Au a lako vata kei koya ki na vuqa na veilotu duidui, ia a sega ni yaloqu meu lewena edua na lotu.

Ena gauna au sotavi Gina kina, ka qai yaco me watiqu, e a lewe ni lotu yalodina tiko Ni Lotu i Jisu Karisito ni Yalododonu Edaidai. A vinakata o koya meu vulica na veika me baleta na Lotu me rawa ni keirau vakamau kina ena valetabu. Ia au a sega ni vinakata na ka oya. Au a sega ni tamata daulotu.

A qai yaco me keirau vakamau vakamatanitu. Ni oti nona sucu edua na luvei keirau, au a se sega tiko ga ni taleitaka na lotu, ia o Gina a dau lako tiko ga ki lotu.

Kena itinitini, au a nanuma meu vakacala na nona lotu ena noqu gole ki na veimatalotu tale eso. A vaka tiko oqo me vica vata na yabaki, ia se vanua cava au lako kina, au a sega ni logaloga vinaka kina.

Qai, dua na Sigatabu ni vakarautaki luvei keirau yalewa tiko o Gina me gole ki lotu, au a vakavakarau talega meu lako ki lotu. A raici au mai o koya ka taroga, “Na cava o cakava tiko?” Au sauma yani, “Au na lako vata kei iko ki lotu.” A rai yani vei luvei keirau yalewa ka kaya, “Vakarau vakatotolo! Edaru sega ni vinakata me veisautaka o koya na nona nanuma!”

Ka, keitou sa mani lako. Baleta niu a vakila na Yalo Tabu mai vei ira na tamata ena lotu, era sa tiki bibi sara ni noqu saumaki mai. Ni oti oya, rau a gole mai ki na neitou vale na daukaulotu. Erau a veivakauqeti dina, na ivakavuvuli erau a wasea a totoka dina vei au, ka a vakasinaita na yaloqu na Yalotabu (raica na Moronai 10:4–5).

Niu sikovi tukaqu meu tukuna vua na veika au sa kunea, e a sega ni marau. Ia au a kila ni dodonu meu muria na lomaqu.

Au a lewena na Lotu, ka sega ni dede keirau sa vauci vata kei Gina ena valetabu. A vauci vei keirau na luvei keirau yalewa, ka sa tu oqo e tolu tale na luvei keirau ka ratou a sucu ena loma ni veiyalayalati.

E a taura e 10 na yabaki me rokova kina o noqu acheii na veika eda vakabauta ena Lotu. Ena nona taurivola ena koronivuli torocake na luvequ tagane, a kaya kina vei ira na tamata kecega ena vosa vaka Navajo, “Au marautaka na matavuvale oqo. Au tokona na veika eratou vakabauta. Era kila vakaidina na luvedrau na ivakarau ni masu.”

Oi au duadua ga na lewe ni Lotu ena isema ni noqu matavuvale, ia au kila ni ra ciqoma ni sa ka dina na noqu saumaki mai, ka ra raica na vinaka sa kauta mai na kosipeli vei watiqu, o iratou na luvei keirau, kei au.