“Na Parofita e Tuberi Keda vei Jisu Karisito,” Liaona, Sepi. 2024.
Na Parofita E Tuberi Keda vei Jisu Karisito
Na parofita e kila na sala baleta ni kilai Jisu Karisito, sai koya “na sala, na vu ni dina, kei na vu ni bula” (Joni 14:6).
Seeking the One [Vaqara na Dua], mai vei Liz Lemon Swindle, rawa me na kua ni lavetaki
Dua na siga au a vakasigalevu tiko ena valenikana ena Vale ni Veiqaravi ni Lotu kei na tolu na noqu itokani ena Vitusagavulu. Ni keitou kana tiko, a gole mai ki na neitou teveli o Peresitedi Russell M. Nelson vata kei na kena bilo supu ka kaya, “ E rawa beka meu tomani kemudou?”
“E rawa saraga, Peresitedi!” keitou a sauma vata yani. O cei ena sega ni vinakata me vakasigalevu vata kei na parofita?
Ni keitou kana tiko, a wasea o Peresitedi Nelson e vica na ka a sotava ena vuqa na matanitu sa sikova oti ka tukuni ira na tamata era sa vakauqeti koya. E sa yalovinaka dina, vuku, ka lomasoli.
Ni oti na neitou vakasigalevu, au a vuki vei Peresitedi Nelson ka kaya, “Peresitedi, au sega ni kila se au na dabe vata tale kei iko ena dua na teveli ena dua na gauna totolo mai oqo. Ia ena yakavi nikua, au na raici na watiqu kei iratou na luvequ ka tukuna vei iratou niu a vakasigalevu vata kei na parofita. Au kila ni ratou na tarogi au, ‘Na cava a tukuna vei iko o koya mo tukuna vei keitou?’ Peresitedi, na cava o na vinakata meu tukuna vei watiqu kei iratou na luvequ?’
A raici au me dua na gauna o Peresitedi Nelson. Au a maqusa sara meu rogoca na veika me na tukuna! “E tiko ga vei au e tolu na vosa meu tukuna vei iko,” a kaya o koya. “Tukuna ki na nomu matavuvale niu a kaya, ‘Talairawarawa ki na ivakaro.’”
Eda sa rogoca taucoko na ivakasala oqo mai vei Peresitedi Nelson, ia ena gauna oya, au vakila e dua na ivakadinadina kaukauwa, ni o Peresitedi Nelson e parofita dina. Au vakavinavinaka vua, kei na mua ni siga oya au a tukuna ki na noqu matavuvale na veika a yaco. Eratou a qai cakava emuri na luvei keirau na sitika ni “Talairawarawa ki na iVunau” ka vakabiri ira ena neitou kato ni waililiwa kei na iloilo me vakananumi keitou ena veika a tukuna o Peresitedi Nelson.
Mai na gauna oya, au dau vakananuma vakatitobu na ivakasala nei Peresitedi Nelson. Nida muria na ivunau, eda vakaraitaka na noda lomana na Tamada Vakalomalagi kei na iVakabula. Eda toro voleka yani vei Rau ka tiko ga ena Nodrau loloma. (Raica na Joni 14:21; 15:10.)
Na veika au sotava oqo kei na parofita sa vakadeitaka vei au e dua na dina bibi vakayalo. Me vaka era dau lagata na noda Lalai, “Muria na parofita; ni kila na sala.” E kila dina na sala! E kila na parofita na sala baleta ni kila o koya na iVakabula, sai koya “na sala, na vu ni dina, kei na vu ni bula” (Joni 14:6). Nida muria na parofita, eda sa tuberi tiko vei Jisu Karisito.
Nodra iTavi Tabu na Parofita
E solia na Turaga e dua na itavi bibi ka tabu kivei ira na parofita ena gauna e liu ka vakakina ena noda siga. Eda wilika ena ivolanikalou ni “e dina ena sega ni vakayacora edua na ka na Turaga ko Jiova, ena vakaraitaka mada na nona vosa vuni vei ira na nona italatala na parofita” (Josefa Simici iVakadewa, Emosi 3:7 [ena Emosi 3:7, ivakamacala e ra a]).
Ena ivola i Isikeli, eda vulica e levu cake na ka me baleta na veika e gadrevi vei ira na parofita. A kaya na Turaga vua na parofita o Isikeli, “Au sa lesi iko [mo] nodra ivakatawa na mataqali i Isireli; o koya oqo mo rogoca kina na vosa sa tau mai na gusuqu, ka mo vakasalataki ira mai vei au” (Isikeli 33:7).
O ira na parofita, me vaka na ivakatawa ena vale cecere, sa nodra ivakaro bibi mera gusu ni Turaga ka vakaraitaka na veika sa vakatakila vei ira o Koya. E gadrevi ira na nona parofita na Turaga mera tamata vakabauta, tamata dina, ka sega ni rere.
Droini kei Samuela na Leimanaiti mai vei Dan Burr
Me ivakaraitaki, o Samuela na Leimanaiti, a vakaraitaka na nona yalodina taucoko vei Jisu Karisito ena nona tucake tu ena dua na lalaga ka tukuna vei ira na Nifaiti na veika sa biuta ki lomana na Turaga (raica na Ilamani 13:4).
“Io sa mai tukuna vei au na agilosi ni Turaga, ka kauta mai ki yaloqu na itukutuku rekitaki oqo. Ka raica, au sa talai mai meu tukuna vei kemuni mo ni kila tale ga na itukutuku rekitaki oqo; ia raica ko ni sa sega ni via rogoci au” (Ilamani 13:7).
Sa ka vakasakiti vei au ni a vakadinadinataka vakadoudou o Samuela na dina—ena gauna mada ga era “vakaviriki koya kina ena vatu ko ira na Nifaiti … ka … vakavanai koya ena dakaititi ni tucake tu mai na dela ni bai” (Ilamani 16:2). Eda raica na doudou oqo vei ira na parofita, daurairai, kei na dauvakatakila nikua.
Cakava me Vanua Vinaka Cake na Vuravura
Ena dua na gauna sega soti ni dede sa oti, au a sotava e dua na veiwatini ena dua na koniferedi ni iteki mai Nashville, Tennessee, e Amerika. O yalewa a lewe ni Lotu tu ena nona bula taucoko. O tagane a sega ni lewenilotu.
Erau a lako mai vei au, ka kaya mai o tagane, “Au sa vakarau tu meu papitaiso.”
Au a marau niu rogoca oya! Au a tarogi koya, “Na cava sa veisau?”
A tukuna vei au o koya, “Ena noqu rogoca na itukutuku nei Peresitedi Nelson ena koniferedi raraba, a tarai au sara vakalevu. Au kila ni o koya edua na parofita. Au sa rawata e dua na ivakadinadina, ka oqo au sa vakarau meu papitaiso.”
Au kila talega e dua na marama e Cape Coast, Ghana, ka a vakarorogo yani ki na koniferedi raraba. Se bera vakadua ni bau rogoca Na Lotu i Jisu Karisito ni Yalododonu Edaidai, ia a yaco me galeleta na ka a raica ka rogoca mai vei ira na parofita, daurairai, ka dauvakatakila. Ni oti o ya, a vakasaqara o koya na Lotu. A kunea e dua na valenilotu ka sota kei rau na daukaulotu. E muri a qai papitaiso o koya. Ena dua na gauna wale toka ga qo, a vakauta mai vei au o koya na kena iyaloyalo ena valetabu me ciqoma na nona edaumeni.
Na rua na gauna oqo e vakaraitaka na kaukauwa ni nona itukutuku na parofita ki vuravura! Kevaka mera rogoca kece na tamata na nona itukutuku, ko vuravura ena tiko sautu. Eda na raica vakatabakidua na veika e bibi duadua, oka kina na tarai cake ni dua na veiwekani kei na Tamada Vakalomalagi kei na Luvena, o Jisu Karisito, kei na tarai cake ni matavuvale kaukauwa, ka tawamudu. Eda na yaco meda tamata vinaka duadua baleta ni da na muria na rua na ivunau cecere: lomana na Kalou ka lomana na wekada (raica na Maciu 22:37–39). Eda na vakabulabulataki Saioni, e dua na matatamata ka qaqa kina na loloma, kei na duavata, ka vakaraitaki kina na yalo ni bula vakatisaipeli (raica na Vunau kei na Veiyalayalati 82:14).
Nida muria na parofita, e rawa nida yalodei ni da sa cakava tiko na ka e vinakata na Kalou me da cakava baleta ni parofita e muria—ka vukei keda me da muri—Jisu Karisito. Ena vuku i Jisu Karisito, sa vakaibalebale kina na veika kece ena bula. “E rawa nida vakila na reki se cava ga e yaco tiko—se sega ni yaco tiko—ena noda bula.” Ena noda muria na parofita, eda na rawata vakaidina me cakava na vuravura me dua na vanua vinaka cake.
Kunea na Veivakalougatataki Yalataki
Ena gauna era a vakasavi tani kina na Yalododonu mai Kirtland, Ohio, eratou a nuitaki Oliva Qareija kina na Mataveiliutaki Taumada me volitaka na nodra iyau na Yalododonu ka sauma na dinau ni Lotu. O Oliva, e dua na tamata wale ka a mataboko ena vuku ni batabata, a ciqoma na itavi veibolei oqo baleta ni a kerei koya o Josefa Simici na Parofita kei ira na iliuliu tale eso. A gumatua o Oliva ena vuqa na veika dredre, ka vakamareqeta na Turaga na nona solibula kei na sasaga.
“Au nanumi Oliva Qareija na noqu tamata,” a kaya na Turaga. “Raica, au sa kaya vakaidina vua, ena dau nanumi ka vakatabui tu na yacana, mai na itabatamata ki na itabatamata me sega ni mudu ka sega ni mudu, sa kaya na Turaga. …
“… Ia kevaka sa guce ena qai gumatua tale, ni na ka tabu cake vei au na nona solibula mai na veika e rawata” (Vunau kei na Veiyalayalati 117:12–13).
O Oliva kei na watina, o Lydia, erau a tokona na parofita, ka qai kila na Turaga ni a cakava na nona vinaka taucoko o Oliva ka dina ga ni a sega ni dau rawata rawa ena veigauna taucoko. Na Turaga a vakaliuca cake na yaga ni nona sasaga mai na nona rawa ka.
Ena noqu kaulotu ka vakakina nikua, au sega ni nanuma rawa na noqu rogoca e vuqa na ka me baleti Oliva Qareija, ia e cavuti na yacana ena ivolanikalou baleta ni a talairawarawa ki na veidusimaki ni parofita ka ciqoma na veivakalougatataki yalataki eso—na yacana sa ivakananumi tabu tu. Eda vulica mai vei Oliva Qareija ni dina ga ni veidusimaki e lako mai na dua na ivurevure vakalou (mai vei ira na parofita), e sega ni vakadeitaka edua na salatu malumu e sega kina na bolebole, ia na yalayala era sa vakadeitaki tu (raica na Alama 37:17).
Ena vakacava beka na noda bula ke ra sega na parofita? Na parofita bula ka Peresitedi ni Lotu e matataka tiko e dua na sala dodonu ni veitaratara mai vua na Kalou vei ira na Nona tamata ka sai koya duadua ga na tamata e vuravura e ciqoma na ivakatakila me dusimaka na Lotu taucoko. E vakarautaka talega o koya na ivakatakila tomani tikoga mai vua na Kalou me vukei keda meda sokota na bolebole ni noda gauna oqo. Nida muria na ivakasala ni parofita, eda na rawa ni kunea na vakacegu, reki, kei na veidusimaki ena noda bula nida segata meda vakataki Jisu Karisito vakalevu cake. (Raica na Vunau kei na Veiyalayalati 21:4–6.)
Meda qai ciqoma na nodra ivakavuvuli kei na ivakaraitaki na parofita ni gauna oqo, nida kila nira sa iyaya ni cakacaka ena liga ni Kalou ka ra tuberi keda yani ki na veivakalougatataki tawamudu. Au lomani ira kau masulaki ira. Au vakavinavinaka niu kila ni ra sa ceguvi ka veivuke me liutaki keda kei na noda matavuvale vua na noda iVakabula, o Jisu Karisito.