Liaona
Meu na Vakaqaqacotaka Vakacava na Noqu iVakadinadina me baleta na Parofita?
Sepiteba 2024

“Meu na Vaqaqacotaka Vakacava na Noqu iVakadinadina me baleta na Parofita?,” Liaona, Sepi. 2024.

Lako Mai, Mo Muri Au

Ilamani 7–16

Meu na Vakaqaqacotaka Vakacava na Noqu iVakadinadina me baleta na Parofita?

Na koniferedi raraba e rawa ni vukei keda meda vaqaqacotaka na noda ivakadinadina baleti ira na parofita bula.

E vosa tiko o Peresitedi Russell M. Nelson ena itutu ni vunau

Ena ivola i Ilamani, na parofita o Samuela na Leimanaiti e vakadinadinataki Jisu Karisito ka soli ivakaro kei na veisureti vei ira na Nifaiti (raica na Ilamani 13–14). Ena noda gauna oqo sa noda talega na madigi meda vakarorogo ki na ivakaro ka soli mai ena gauna donu mai vua na noda parofita kei ira na iliuliu ni Lotu tale eso. Na rogoci ni nodra veisureti e vukei keda meda muria na salatu ni veiyalayalati.

Na koniferedi raraba e sa dua na gauna vinaka me rogoci kina na nodra vosa na noda iliuliu veivakauqeti ka toro voleka yani vei Jisu Karisito. Oqo eso na sala o rawa ni vakasamataka mo vakayagataka kina na koniferedi raraba me vakavinakataka na nomu vakadinadinataki ira na parofita bula:

  1. Ni bera na koniferedi raraba, vakasamataka vakatitobu ena masumasu na vuna e bibi kina vei iko me dua na parofita. Vakasamataka mo masulaka mo ciqoma na veivakadeitaki mai vua na Yalotabu ni Peresitedi ni Lotu ena gauna oqo e parofita ni Kalou, daurairai, ka dauvakatakila e vuravura nikua. “Na kena kilai ena ivakatakila ni tiko edua na parofita bula e vuravura e veisautaka na ka kecega.”

  2. Vakadikeva na kena ibalebale mera tokoni ka laveligataki na parofita kei ira na Vakaitutu Raraba. Ena soqoni ena yakavi ni Vakarauwai, vakaitavi ena nodra tokoni ena nodra veikacivi.

    laveta tiko na tagane na ligana imatau ena Vale ni Koniferedi ena laveliga ni veitokoni

  3. “Ia ena kaukauwa ni Yalo Tabu dou na kila kina na dina ni veika kecega” (Moronai 10:5). Ni o vakarorogo ki na itukutuku mai vei ira na iliuliu ni Lotu, vakarorogo matua ki na Yalotabu ni vakadinadinataka tiko ni dina na nodra vosa.

  4. E dua na nona itavi bibi na parofita o ya me vakadinadinataki Jisu Karisito ka vakavulici keda meda “rai vua na Luve ni Kalou ena vakabauta” (raica na Ilamani 8:13–16). Ena rawa mo vola na veika e vakavulica na parofita kei ira tale era vosa me baleta na iVakabula.

  5. Ena vukuna [Peresitedi Russell M. Nelson] eda sa ciqoma e vuqa na veisureti kei na yalayala ni veivakalougatataki lagilagi kevaka e eda cakava me usutu ni noda bula na iVakabula.” Sa rawa mo cakava edua na lisi ni nona veisureti na parofita kei ira tale era a vosa ena koniferedi. Dau railesuva na lisi oya me vukei iko mo sasaga mo vakataki Karisito vakalevu cake.

  6. Nanuma tiko na veisureti nei Peresitedi Nelson: “Au vakamasuti kemuni mo ni vulica na itukutuku ni koniferedi oqo vakawasoma–e veigauna–ena loma ni vula ono mai oqo.” Nio vakarogoca se wilika tale na itukutuku, makataka na veika e lauti iko.

  7. E sureti keda o Peresitedi Nelson meda “vakasaqara ka namaka na cakamana.” Ni o talairawarawa ki na nona ivakasala na parofita ka veisautaka na nomu bula, raica vakamatua na veivakalougatataki o ciqoma kei na cakamana o raica (raica na Ilamani 16:4–5).

Ni o muria na veikalawa oqo me vakatorocaketaka na nomu ivakadinadina me baleta e dua na parofita, daurairai, ka dauvakatakila, tautauri mai na nomu vakabauti Jisu Karisito kei na Tamada Vakalomalagi dauloloma. Na Kalou sa soli ira na parofita vei keda ena loloma me dusimaki keda lesu Vua—o ira na parofita era cakacaka vaka Nona gusunivosa mera vakatakila na Nona lewa ki vuravura. (Raica na Vunau kei na Veiyalayalati 1:38; 21:5–6.) Kevaka eda digitaka meda muria na nodra ivakasala na Nona italai, eda sa digitaka tiko meda muri Koya.