Eda Vakadinadinataka na Noda Parofita Bula

Turaga Keitou Vuabale, Parofita mai Veivuke.

Au kila ni o Peresitedi Russell M. Nelson e parofita ni Kalou, kau vakavinavinaka ni dau vosa vua na Kalou. Na nona lomani keda o Peresitedi Nelson sa dua na ivakaraitaki ni loloma ni Kalou. Au lomani Peresitedi Nelson. Na yalayala eso e cavuta sa mai vua na Kalou.

Justine Hinautan, Yatu Filipaini

E vakatavulici au o Peresitedi Nelson ni ka bibi duadua nikua sai koya me da digitaka na Karisito ena noda vakamareqeta ka rokova na veiyalayalati.

Ryan Hulme, Niu Siladi

Au sa vakavinavinaka vakalevu vua na parofita, o Russell M. Nelson. Au vakadinadinataka ni o koya e dua na tamata ka kacivi koya na Kalou me tuberi keda ka vaqaqacotaki keda ena veisiga e muri oqo. Kevaka eda muria na nona ivakasala, ena vinaka na ka kecega.

Nelson Almeida, Cabo Verde

Vinaka vakalevu, Peresitedi Nelson, mai na boto ni yaloi keimami ena kena soli mai na vosa ni vuku mai vua na Tamada Vakalomalagi. Me vakalougatataki kemuni na Kalou, na neimami parofita lomani!

Brenda Boyle, Sikoteladi

Vinaka vakalevu, Peresitedi Nelson, na nomuni ivakavuvuli veivakauqeti ka veilaveti. Keimami lomani iko.

Thuong Putheary, Cambodia

Au sa vakavinavinakataka vakalevu na loloma kei na veivakararamataki e solia o Peresitedi Nelson me vaka ni parofita. Na nona vosa me baleta na valetabu a vakauqeti au meu taura na noqu edaumeni, na nona lotu vei ira na itabagone qase cake e vakananuma vei au meu kila na kequi vakatakilakila taumada niu luve ni Kalou, kei na nona tutaka na vakasoqoni Isireli ka sa veiseyaki tu e sa ulutaga tudei tu ena neitou matavuvale kei na neitou tabanalevu. Ka bibi duadua, ni sa vukei au o koya meu toro voleka vua na noqu iVakabula.

Grace Burt, Amerika

Au sa vakananuma vakatitobu na nona ivakavuvuli na noda parofita lomani, o Russell M. Nelson. Sa vakauqeta na noqu bula na Nona ivakavuvuli. Na nona vosa vakaparofita sa vakauqeti au meu toso tikoga ki liu ka bulataka vakataucoko na kosipeli ena vuravura veilecayaki ka veisaqasaqa oqo. Au vakila niu taqomaki niu kila ni tiko e dua na noda parofita ena noda gauna oqo ka dau vakamasuti keda me tiko vei keda na yalo vakacegu, me levei kina na veileti kei ira na noda icaba. Au vakamareqeta na nona ivakavuvuli cecere.

Ana Montoya, Honduras

E dei na noqu ivakadinadina ni o Peresitedi Russell M. Nelson e parofita ni Kalou ena iotioti ni gauna. A noqu na madigi meu vakadinadinataka vakavoleka sara na nona yalomalumalumu, nona rawarawa, kei na loloma e vakila me baleti ira na tamata. Sa dina sara, sai koya na tamata digitaki me liutaka na matanitu ni Kalou e vuravura ena gauna duatani oqo. Au sa rogoca ka muria na nona ivakasala, ka sa tuberi au meu bulataka e dua na bula dodonu ka tusaqata na bolebole ni bula oqo. Au vakila na loloma levu vei Peresitedi Nelson, kau kila na nona cau cecere ki na toroi cake ni matanitu ni Kalou kei na vakasoqoni vata nei Isireli mai na nona veivakauqeti kei na kacivaki ni tara valetabu e vuravura raraba.

David G. Fernandes, Brazil

Ena ika 24 ni Okosita, 2019, a vosa vaka-Sipeni na parofita ka vakasalataki keimami me baleta na muri ni ivakaro ni Turaga. Au vakila vakaukauwa sara na loloma i Jisu Karisito ena nona sasaga na parofita me vulica na neimami vosa. Au kila ni mai vua na parofita bula, na Kalou ena dau veivakayaloqaqataki, veidusimaki, veitaqomaki, veituberi, ka vakalougatataki keda kina.

Saúl Alfredo Rojas de León, Guatemala