Domodra na Yalododonu Edaidai

Na iVola i Momani a Kauta Mai vei Au na Vakacegu

Mai vei Américo Chantre Fernandes, Cape Verde

Sa yaco meu kila ni iVola i Momani a gadrevi me veisautaka noqu bula ka kauti au vakavoleka vei Jisu Karisito.

Droini mai vei Allen Garns

Ena mua ni 2013, rau sa tekivu sikovi ganequ vakarua ena dua na macawa e rua na cauravou erau daramaka tiko na sote vulavula kei na tai. Au kila sara ni rau lako mai na dua na lotu. Vei au, a sega ni tiko ena noqu ituvatuva meu lewena edua na lotu, kau mani lewa meu kakua kina ni vosa vei rau.

Ena nodrau veisiko yadua, au a vakadeitaka meu kakua ni tiko e vale nirau yaco mai. Ia, e dua na ka vakatabakidua, au a raica rawa. Erau dau kauta voli ga e dua na ivola karakarawa. Au se bera vakadua ni bau raica e liu, ka vaka me matalia vei au.

Dua na siga ena rumu ni gade, a tekivu me tukuna vei au o ganequ me baleta na ivola. Vakasauri, rau sa yaco mai na cauravou e rua. E ka ni rarawa, niu a sega ni rawa ni vuni mai vei rau. Erau raici keirau vata kei na ivola karakarawa—na iVola i Momani—ka tekivu taroga se cava au kila baleti Jisu Karisito.

Niu rogoci rau na daukaulotu mai na siga oya, au qoroya na nodrau semata na nodrau veivakavulici ki na iVola i Momani. Sa yaco kina, me sega soti ni matalia vei au na ivola karakarawa.

Se tikoga vei au na vakatitiqa levu, ia sa tekivu meu wilika. Sa yaco meu kila ni iVola i Momani e sega ni dua na isosomi ni iVolatabu ia e gadrevi me veisautaka noqu bula ka kauti au vakavoleka vei Jisu Karisito. Au vulica ni iVola i Momani e yavutaki vua na iVakabula. Na kena ivakavuvuli e vukei au meu kila se o cei o Koya ka o cei na Tamada Vakalomalagi.

Sa vukei au vakatotolo na iVola i Momani meu tamata vinaka cake, edua na tisaipeli dina i Jisu Karisito. E vukei au talega meu vakavinakataka na ivakarau ni noqu vakasama niu sotava na bolebole e veisiga. Mai na veika au sa kila rawa ena noqu vulica, au kila ni vukei ira na tamata mera lako mai vei Karisito ka bulataka na kosipeli (raica na Moronai 10:32). E vakayaloqaqataki keda me da muria na ivakavuvuli i Karisito ka bulataka ena noda bula e veisiga. E solia vei keda na kila-ka ni da sa luvena tagane kei na yalewa na Kalou. E kauta mai na vakacegu.

Ni oti e vica na macawa noqu sota vata tiko kei rau na daukaulotu ka wilika na iVola i Momani, au a qai papitaiso. Au wasea na noqu ivakadinadina mai vuniyaloqu taucoko ni dina na iVola i Momani kei na kena wiliki e kauta mai na inuinui kei na rarama ena veigauna butobuto duadua, ka vukei keda me da vakila na loloma kei na veitaqomaki ni Turaga. Au vakavinavinaka ni tiko vei au ena noqu bula na iVola i Momani.