“Kunea na Veivakacegui ena Noda Veiwekani ni Veiyalayalati kei na Kalou,” Liaona, Sepi. 2024.

Kunea na Veivakacegui ena Noda Veiwekani ni Veiyalayalati kei na Kalou

Mai vei Sisita Kristin M. Yee

iKarua ni Daunivakasala ena Mataveiliutaki Raraba ni iSoqosoqo ni Veivukei

O Jisu Karisito sa ivurevure ni loloma savasava, veivakabulai, marau, kei na veivakacegui.

Na kunei ni veivakacegui ena noda veiwekani ni veiyalayalati kei na Kalou sa mai lewe tu ni noqu vakasama kei na yaloqu me dua na gauna. Me vaka e vakatavulica ka vakauqeti keda kina na parofita ni Turaga me da vulica na veika me baleta na veiyalayalati, valetabu, kei na kaukauwa ni matabete, e vakavuna meu vaqaqara, lomana, ka kanamagiti ena veidina veivakabulabulataki ka kovuti tu ena veiyalayalati.

A nakiti me keirau veitokani vata kei na Turaga ena dua na sala kaukauwa ena neirau veiyalayalati. E gadreva o Koya me tiko vata kei keda ena noda kauwai kei na noda vakatulewa. E sega ni gadrevi meda sokota taudua na bolebole, rarawa, lomataqaya, kei na momosi ni yalo ni noda bula. Ena tiko e yasada o Koya. A kaya o Koya, “Au na sega ni laivi kemudou mo dou luveniyali: au na lako mai vei kemudou” (Joni 14:18).

E vakamacalataka o Peresitedi Russell M. Nelson na ivakarau ni bula ni Kalou kei na Nona loloma cecere vei keda ena nona vakavulica ni “salatu ni veiyalayalati e sa baleta ga na noda veiwekani kei na Kalou.” A kaya: “Ni daru sa cakava e dua na veiyalayalati kei na Kalou, na nodaru veiwekani kei Koya sa yaco me voleka cake ni bera ni caka na veiyalayalati. Ia oqo eda sa vauci vata. Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka da na sega vakadua ni vakaotia na Nona dauvosota vakayalololoma vei keda. Oi keda yadua sa tiko na noda vanua digitaki ena uto ni Kalou. Sa tu Vua na vakanuinui cecere me baleti keda.”

Noqu iVurevure Cecere Duadua ni Vakacegu

Me vaka niu dua na sisita se bera ni vakawati, na veiwekani ni veiyalayalati ni loloma kei na veivosoti oqo kei na Tamaqu Vakalomalagi kei na iVakabula e vakayaco ka mana tiko ena noqu bula ka sa vaka tu mai kina ka sa noqu ivurevure cecere duadua ni veivakacegui kei na sautu. Veitalia na noda ituvaki ni bula vakawati se ituvaki ni bula, na Turaga e gadreva meda veitokani vata kei Koya ena dua na sala e mana—me da “duavata” (3 Nifai 19:23) vata kei Koya ena “ka kecega [eda] kitaka” (Alama 37:37). Nida tagi vua na Turaga meda tokoni “ka daulomana tiko ga e [lomada] na [Turaga] ka sega ni mudu” (Alama 37:36; vakaikuritaki), e rawa ni vakasinaiti na noda bula ena ivau ni veiyalayalati totoka oqo.

Ena vuku ni noda iVakabula, o Jisu Karisito, sa rawa nida ciqoma kina na veivakacegui nida sokota taudua na bolebole ni noda bula.

E tu kece vei keda na kauwai kei na veigagadre eso eda rawa ni vakila kina na galili. E kauwaitaka o Koya na veika eda kauwaitaka veitalia se levu se lalai. Au vakila na gadrevi ni Nona veivuke niu dau lomaleqataka na veika lalai sara mada ga me vaka edua ka dau tiko ga e yasaqu, kau vakatoka me “vakavinakataki ni vale.” Ni sega na watiqu me keirau veivakasalataki vata, au na leqataka duadua se o cei na konitaraki donu, ilavo vakayagataki e veirauti, biu cakacaka meu tiko e vale, ka dauniyautaka vinaka na noqu ilavo kei na noqu itikotiko. E a dua na siga qaqa vei au ena noa niu a vakavinakataka rawa na katuba ni noqu qarati! A rogoca na Turaga na noqu kauwai. E dina ga ni lailai ni vakatauvatani kei na ituvatuva lelevu eso, o Koya a sauma mai na noqu masu. A caka vacava? Mai vua edua na wekaqu yalovinaka, na veivuke ni Yalotabu, kei na dua na vidio ena YouTube, au a vakalougatataki meu kila na ka meu cakava meu vakavinakataka kina na katuba.

Kevaka e dau kauwaitaka na Turaga na veigagadre lalai, vakasamataka mada na Nona gadreva me vakalougatataki keda ka tokoni keda ena veika bibi cake ni lomada kei na yaloda, ka ra sega ni iwiliwili lailai: veivakacacani, veivakatotogani, veimaliwai dredre vakamatavuvale, mate kei na vakanuinui cala, bolebole ni ituvaki ni bulabula ni vakasama kei na yago, leqa vakailavo, kauwai eso vakaitubutubu, kauwai eso ni da qarava tiko na noda itubutubu, dredre e sotavi ena vakabauta yadua, na gone se watina e digitaka me kakua ni vakaitavi ena kosipeli.

Ena gauna ni rarawa kei na malumalumu ni bula, au dau vakararavi vakabibi ka tautauri matua ki na noqu veiyalayalati ni veiwekani kei na Kalou. Niu dau vakararavi ki na Nona veikauwaitaki loloma ka tovolea ena noqu vinaka taucoko meu vakatabuya na noqu bula Vua, sa dau vakarautaka o Koya na veivuke mai na Nona kaukauwa ni matabete ka sa noqu Dauveivakarautaki ena noqu gagadre vakayalo ka vakayago talega. Sa vakarautaka o koya na veivakacegui mai na rere, mai na nuiqawaqawa, mai na dokadoka, mai na ivalavala ca, mai na galili, ka vakakina mai na rarawa.

E vakavulica vakamatata ka veivakadeitaki o Peresitedi Nelson ni: “Kaukauwa vakalomalagi e isau ni maroroi veiyalayalati vata kei na Kalou—na kaukauwa me vaqaqacotaki keda meda tusaqata vakavinaka cake na noda veivakatovolei, veitemaki, kei na rarawa ni lomada.”

Ena vukui Jisu Karisito, sa rawa nida ciqoma na veivakacegui mai na noda sokota duadua na bolebole ni bula.

Sisita Yee kei na rua na marama e Micronesia ka ratou veisusu tiko vei ira na gone era sa biu tani mai vei ira na itubutubu.

Ira na Sisita “ena veiyanuyanu ni Wasawasa”

Niu vakananuma tiko na veivakalougatataki ni ivau ni veiyalayalati keirau sa cakava vata kei na Kalou, au vakananauma na noqu ilesilesi meu sikova na iWasewase ena Vualiku kei Esia.

A noqu na madigi meu gole ki na veiyanuyanu lalai e Chuuk mai Micronesia, rauta ni 1,500 na maile (2,400 na kilomita) ena tokalau cevaceva kei Japani. E rua na sisita e Weno, Chuuk, erau sa solia na nodrau bula me rau susugi ira cake na gone era sa biu tani mai vei ira na nodra itubutubu. Oi rau na sisita oqo erau vakila ni bibi me rau tuberi ira cake na gone oqo ena kosipeli. E dua vei rau na marama oqo e sega ni vakawati ka cakacaka tudei vakadaunivakasala ni koronivuli.

Au a wasea vei rau na itukutuku nei Peresitedi Nelson vei ira na marama ena Lotu, oya nio kemuni na marama oni lomani, gadrevi, ka talei.

Na marama dawai totoka ka susugi ira cake tiko na vugona e a tagi ka kaya ni a sega ni vakila ni taleitaki wale tiko ga oqo; a vaka e vakila o koya ni sa guilecavi. Ia a vakadinadinataka o koya ni vakila na loloma ni Kalou kei na nona kauwaitaki koya ena nona vosa na parofita ni sa ka “talei” vakaidina ka kila ni sa dina. A vakila o koya na loloma veivakabulai ni Kalou; a vakila ni vakacegui.

Na Turaga a kaya, “Dou sa sega beka ni kila ni koi au, na Turaga na nomudou Kalou, au sa buli ira na tamata kecega, kau sa nanumi ira era sa tiko ena veiyanuyanu ni wasawasa?” (2 Nifai 29:7).

O irau na marama oqo erau kilai vua na Tamadrau Vakalomalagi kei na nodrau iVakabula. Erau sega ni tiko duadua. Ka vakatalega kina o iko kei au ena noda vakatovolei kei na noda bolebole. A talai au na Turaga ena rauta na 8,500 na maile (13,700 na kilomita) ena waqavuka, sitima, motoka, kei na waqa me kauta na loloma kei na vakacegu ni Kalou ki vua na “dua” ena veiyanuyanu ni wasawasa. O koya gona ena kunei iko kei au o Koya ena nodaru dui yanuyanu ka daru na galili voli kina vata kei na kauwai kei na icolacola eda kauta voli e lomada. E tiko o Koya ka vakarau tu me veivakalougatataki, veituberi, ka veivakacegui vei keda.

“Au Rawa ni Lako Yani vei Iko”

A vakamacalataka ena dua na gauna o Peresitedi Gordon B. Hinckley (1910–2008) na veika a sotava e dua na tina gone veisere “ ka vitu na luvena ka ra sa yabaki 7 ki na 16. A kaya o koya ni dua na yakavi a gole ki tai ni gaunisala kadua me laki solia e dua na ka vua e dua na wekana.” Oqo na nona vosa ni nanuma lesu:

“Niu vuki meu lesu ki vale, au raica ni sa rarama levu tu na noqu vale. Au rawa ni rogoca na voqa ni domodratou na luvequ ena noqu curu mai katuba ena vica na miniti sa oti. Eratou kaya tiko mai: ‘Na, na cava na ivakayakavi?’ ‘E rawa ni o kauti au ki na valenivola?’ ‘Au vinakata eso na pepa kabi ena bogi nikua.’ Ena oca kei na dadaga, au rai yani ki vale ka raica ni waqa tu na cina ena kena veirumu yadua. Au vakasamataki iratou kece na gone eratou waraki au tu mai kina meu lako yani ka sotava na nodratou gagadre. Au vakila na bi ni noqu icolacola kau sa sega ni rawa ni colata.

“Au nanuma na noqu rai yani ena mata tagitagi ki lomalagi, kau kaya, ‘Isa Tamaqu, au sa na sega ni cakava rawa ena bogi nikua. Au sa rui oca vakalevu. Au na sega ni rawa ni sotava. Au sega ni rawa ni lako i vale ka laki qaravi iratou duadua na gone o ya. E rawa beka niu lako yani vei Kemuni ka laki tiko vata kei Kemuni me dua ga na bogi? …’

“Au a sega ni rogoca dina na vosa e saumi mai kina, ia au a rogoca ena noqu vakasama. A vakaoqo na kena i sau: ‘Sega, na luvequ, e sega ni rawa ni o lako mai vei au oqo. … Ia e rawa niu lako yani vei iko.’”

“Au rawa ni lako yani vei iko.” A lako mai vua o Koya, ka na lako mai vei iko kei au, me vaka ga na nona lako mai na iVakabula vua na yalewa ena ikeliwai na vanua ka oca voli kina ena veisiga ni nona bula (raica na Joni 4:3–42). A vakayaloqaqataki koya, vakavulici koya, vakaraitaka vua na Nona itutu vakamesaia, ka lomani koya ena gauna beka e sega ni dau lomani koya kina vakaikoya. Kivua na marama ena ikeliwai, kivua na tina ni gone e vitu, kivei iko kei au, sa tu vakarau o Jisu Karisito me solia na veivuke. Au vakadinadinataka ni rawa ni da ciqoma na veivakacegui mai na noda ivau ni veiyalayalati kei na Kalou dauloloma.

E rairai me vakataki au, o a masuta na veivuke mo kakua ni biu duadua tu ni sotavi eso na draki dredre ni bula ni vakasama, bula vakayago, ka vakayalo tale ga. Na draki dredre ni tubu vakaoqo e biuta tu mai na ka au vakatoka me “ivakatakilakila vakayalo” e yaloda. Ia au vakadinadinataka ni a laveti au o Koya, ka na laveti iko tale ga. E ceuti iko tu o Koya ena qeteqete ni Ligana (raica na Aisea 49:16; 1 Nifai 21:16). A tu e keri o Koya ena nomu saga mo “yalododonu ena butobuto.” E se sega ni laivi au o Koya, ka na sega talega ni laivi iko. Kau na lomani Koya me tawamudu ena vuku ni ka oya.

Kemuni na taciqu kei na ganequ lomani, na ivurevure ni loloma savasava, veivakabulai, marau, kei na veivakacegui ena kunei vei Jisu Karisito. Au vakadinadinataka ni o Jisu Karisito na dau veivakacegui.

E gadreva o Koya me qaravi iko, vakalougatataki iko ka vosoti iko. A lako mai o Koya ena inaki sara ga oqo, me vakarautaka vei iko na veivakacegui e gadrevi-vakalevu ka o vakasaqara tiko. Sai Koya na Dauveivueti kei vuravura, kau vakadinadinataka ni bula tiko o Koya ka lomani iko.

Mai na dua na vosa ena Koniferedi ni Marama ena Brigham Young University ena 3 ni Me, 2023.