“Russell M. Nelson: Juon Rikanaan n̄an Raan Kein Ad,” Liaona, Jept. 2024.
Russell M. Nelson: Juon Rikanaan n̄an Raan Kein Ad
Kin juon rikanaan eo n̄an tōl kōj ilo raan kein āliktata , jej lukun jet armej ro rejeram̧m̧an.
Būreejtōn Russell M. Nelson ej iak iakwe armej ro ālkin juon nokon ilo Singapore ilo Nobōm̧ba 20, 2019.
Ke juon rikōm̧m̧an intōrpiu ekar kōraate Kabun̄ eo an Jisōs Kraist im Armej ro Rekwojarjar ilo Raan-ko Āliktata āinwōt “juon kabun̄ tōl jān ļōļļap ro,” Būreejtōn Gordon B. Hinckley (1910–2008) ekar uwaak, Ta ejjab em̧m̧an ke n̄an wōr juon em̧m̧aan ekekemo̧o̧j ilo jeban ke, juon em̧m̧aan in ekajet em̧m̧an me ejjab m̧akūtkūt kōn jabdewōt kōto in katak?”
Būreejtōn Russell M. Nelson, eo erūtto tata rikanaan emour n̄an jerbal ilo tōre in bōk eddo in, ej juon em̧m̧an ekekemo̧o̧j. E enaaj tōpar 100 iio ko dettan ilo Jeptōmba 9, 2024. E ej juon ritōl ekōppaļpaļ an meanwōd im kanooj jouj, ewōr an kōttōpar im ewemourur, em̧m̧an im māletlet.
Ij iakwe Būreejtōn Nelson. Kōmro kar m̧ōttā ium̧win 60 iiō ko im Rijjilōk ippān doon ium̧win 40 iiō ko. Jān Jānwōde in 2018 eo, ikar jeraam̧m̧an n̄an jerbal ium̧win tōl eo an an ilo Būreejtōnji eo Kein Kajuon an Kabun̄ in.
Kar kūr n̄an tōl Kabun̄ eo kōjepļaaktok an Jisōs Kraist im erom an rūkaki etoojlo̧k, Būreejtōn Nelson ejeļā Rilo̧mo̧o̧r eo, eo ej rikanaan eo an. Jān eļōn̄ iiō ko in mour im katak, e ekar wejepedik ilo jerbal eo etijem̧ļo̧k ie im jerbal an ritariņae. Ippān baam̧le eo an eļap, e ekar juon ritōl eo ej iakwe im weļo̧k. Jān kūr ko an ilo Kabun̄ in, ekoba iiō ko jiljino remootļo̧k āinwōt rikanaan an Irooj, ekar juon m̧ōņōkjān ritōl ilo Kabun̄ eo kōjepļaaktok an Irooj.
Jān elōn̄ iiō ko in an mour, Būreejtōn Nelson ekar katak im kōjerbal ki ko n̄an lem̧ōņōņō ilo mour in im ilo mour eo ej itok—ta eo ekar ņa etan “katak ko repen.”
Ekar katakin kōj bwe jej aikuj “jej kōņaan jino kōn ta eo jenej erom̧.”
E ej iakwe m̧weo im̧ōn Irooj. Ilo iiō ko an āinwōt Būreejtōn an Kabun̄ in, ekar kōjjeļā kōn 153 tampeļ ko rekāāl—enan̄n jimettan in oran total in 335 tampeļ ko an Kabun̄ in me em̧ōj kar kalōki, rej ekkal wōt, ak em̧ōj kar kōjjeļā kaki ilo tōre in iien bōk eddo in.
Ekar katakin kōj bwe ad ekkal aolep tampeļ ko ad ej n̄an lukkuun kepaaktok tampeļ eo, im kōjeraam̧m̧an ko an bujen ko an tampeļ, n̄an ajri ro nejin Anij. En̄in ej karōk eo an Anij.
Būreejtōn Nelson ekar katakin, “Ikar maron̄ ekkatak bwe karōk eo an Jemedwōj Ilan̄ n̄an kōj ej kabwilōn̄lōn̄, bwe ta eo jej kōm̧m̧ane ilo mour in eļap tokjeņ, im bwe Pinmuur eo an Rilo̧mo̧o̧r ej men eo ej kōm̧m̧an an karōk eo an Jemed pidodo.” Meļeļe kōn karōk jab in, ekar ba, “ebōk mennin ittiņo̧ an mour im men ko ejjeļo̧k ad jeļā kaki kōn ilju im jekļaj. Ej kōtļo̧k ad wōj kajjojo kāālet ewi wāween ad naaj mour ioon laļ in im ia eo jenaaj mour ie n̄an indeeo.”
Āinwōt Armej ro Rekwojarjar ilo Raan-ko Āliktata, em̧ool jej armej ro rejeraam̧m̧an kōn tōl jān rijerbal ettā eo an Irooj, Būreejtōn Nelson, eo ekar wujlepļo̧k n̄an kōpooj laļ in n̄an Itok eo Kein Kajuon an ad Rilo̧mo̧o̧r im Ripinmuur, Jisōs Kraist. Kōm̧m̧an bwe jen aolep wōnm̧aanļo̧k wōt n̄an jar kake, kam̧o̧ol kōn, rie, im kam̧m̧oolol Anij kōn rikanaan eo ad—Būreejtōn Russell M. Nelson.