“O Iesu Keriso o le Punavai o le ‘Ola,’ ‘Lelei,’ ma le ‘Faamoemoe Sili Ona Lelei,’” Liahona, Tes. 2024.
OIesu Keriso o le Punavai o le “Ola,” “Lelei,” ma le “Faamoemoe Sili Ona Lelei”
I lenei vaitau faapitoa o le faamanatuina o le fanau mai o le pepe i Peteleema, tau ina ia tatou manatua pea na afio mai Iesu Keriso i le lalolagi e avea ma o tatou Faaola ma Togiola.
O Le Fanau Mai [o Keriso], saunia e Sharlotte Andrus
O le Aposetolo o Peteru ma perofeta o le Tusi a Mamona o Iakopo ma Moronae ua faamamafaina le meaalofa faaleagaga o le faamoemoe ia Keriso i ni auala aoaoina e talitutusa.
Mo se faataitaiga, na folafola mai e Peteru, “Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola i le toe tu mai o Iesu Keriso nai e ua oti” (1 Peteru 1:3; faaopoopo le faamamafa). Faamolemole ia matau le faaaogaina o le upu “ola” e faamatala ai le “faamoemoe.”
Na folafola mai e Iakopo, “O le mea lea, uso pele e, ia outou faalelei ma ia e ala i le togiola a Keriso, lona Atalii Pele e Toatasi, ma ona mafai ai lea ona outou maua o se toetu, e tusa ma le mana o le toetu ua ia Keriso, ma tuu atu ai outou i le Atua o ni faapolopolo o Keriso, ua faatuatua, ma ua maua se faamoemoe lelei o le mamalu ia te ia ae lei faaali mai e ia o ia lava i le tino” (Iakopo 4:11; faaopoopo le faamamafa). Faamolemole ia matau le faaaogaina o le upu “lelei” e faamatala ai le “faamoemoe.”
Ua faamatala mai foi e Moronae, “Ma ou te manatua foi na e fetalai mai ua uma ona e saunia se nofoaga mo tagata, ioe, i totonu lava o maota o lou Tamā, lea e mafai ai e le tagata ona maua o le faamoemoe lelei silisili; o le mea lea e ao i le tagata ona faamoemoe; po ua le mafai ona ia maua se tofi i le nofoaga ua e saunia”(Eteru 12:32; faaopoopo le faamamafa). Faamolemole ia matau le faaaogaina o le upu “silisili” e faamatala ai le “faamoemoe.”
O le a le Faamoemoe ia Keriso?
O le meaalofa faaleagaga o le faamoemoe ia Keriso o le faamoemoe fiafia lea o le ola e faavavau e ala i “galuega, ma le alofa mutimutivale, ma le alofa tunoa o le Mesia Paia” (2 Nifae 2:8) ma se manao malosi mo faamanuiaga folafolaina o le amiotonu. O le faaupuga “ola,” “lelei,” ma le “lelei silisili” i nei fuaiupu ua fautuaina mai ai se faamautinoaga faateleina ma le malosi o le Toetu ma le ola e faavavau e ala i le faatuatua ia Iesu Keriso.
Ua faamalamalama mai e le perofeta o Mamona:
“O lenei foi, o’u uso pele e, ou te fia tautala atu ia te outou e uiga i le faamoemoe. E mafai faapefea ona outou maua o le faatuatua, vagana ai ua ia te outou le faamoemoe?
“Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.
“O le mea lea, afai ua i ai i se tagata le faatuatua e tatau ona i ai ia te ia le faamoemoe; aua a aunoa ma le faatuatua e le mafai ona i ai se faamoemoe” (Moronae 7:40–42).
O Le Fuafuaga o le Fiafia a le Tama
O le faamoemoe ia Keriso e ola, lelei, ma sili atu ona lelei e amata i le malamalama o loo soifua le Atua le Tama Faavavau. O Ia o lo tatou Tama, ma o i tatou o Ana fanau faaleagaga. O i tatou moni lava o atalii ma afafine agaga o le Atua ma ua maua mai ia te Ia uiga paia.
O le Tama o le mataisau o le fuafuaga o le fiafia (tagai Aperaamo 3:22–28). I le avea ai ma atalii ma afafine agaga o le Atua, sa tatou “taliaina Lana fuafuaga lea e mafai ai e Lana fanau ona maua se tino faitino ma maua ai aafiaga faalelalolagi ina ia alualu ai i luma seia tau atu i le faaatoatoaga ma oo ai ina iloa lo latou taunuuga paia o ni suli o le ola e faavavau.” I tusitusiga paia, tatou te aoao ai: “Ua i ai i le Tama se tino o aano ma ivi e mafai ona pa’i i ai e pei o le tagata; ua faapea foi le Alo” (Mataupu Faavae ma Feagaiga 130:22). O lea la, o le mauaina o tino faaletino e taua i le faagasologa o le alualu i luma agai i lo tatou taunuuga paia.
O i tatou o tagata e itulua. O o tatou agaga, o le vaega e faavavau o i tatou, ua faaofuina i tino faaletino ia e mafai ona oo atu i manaoga ma fiafiaga o le olaga faaletino. O le fuafuaga o le fiafia a le Tama ua mamanuina e tuuina mai ai le taitaiga mo Ana fanau, e fesoasoani ia i latou e toe foi saogalemu atu ai ia te Ia ma tino toetu, faaeaina, ma maua faamanuiaga o le olioli ma le fiafia e faavavau.
O le Tamaitiiti Keriso, saunia e Sharlotte Andrus
O le Matafaioi Faaola a Iesu Keriso i le Fuafuaga a le Tama
O Iesu Keriso o le Alo Pele e Toatasi o le Atua le Tama e Faavavau. Na afio mai o Ia i le lalolagi e fai le finagalo o Lona Tama (tagai i le 3 Nifae 27:13). O Iesu Keriso o le toatasi na faauuina e le Tama e fai ma Ona sui patino i mea uma e faatatau i le faaolataga o tagata. O Ia o lo tatou Faaola ma le Togiola aua na Ia faatoilaloina uma le oti ma le agasala.
Na vavalo Alema i le nuu o Kitiona e uiga i le galuega faaola a le Mesia:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu e faapea, o le a ia ave i ona luga tiga ma ma’i o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumulia ona lagona i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ai ma o latou vaivaiga.
“O lenei ua silafia e le Agaga mea uma; ae ui i lea, e mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana lavea’iina” (Alema 7:11–13).
O le muai mataupu faavae o le talalelei o le faatuatua i le Alii o Iesu Keriso. O le faatuatua moni e taulai atu i le Faaola ma mafai ai ona tatou faalagolago ia te Ia ma maua le talitonuga atoatoa i Lona mana e laveai ai i tatou mai le oti, faamamaina i tatou mai agasala, ma faamanuiaina i tatou i le malosi e sili atu nai lo o tatou lava malosi.
Na molimau mai Moronae, “Ma ona o le togiolaina o tagata, lea na oo mai e ala ia Iesu Keriso, ua toe aumai ai i latou i luma o le Alii; ioe, o le ala lenei ua togiolaina ai tagata uma, ona o le maliu o Keriso ua aumai ai le toetutu, lea ua aumai ai le togiolaina mai se moe e le gata, le moe lea o le a fafagu mai ai tagata uma lava e le mana o le Atua pe a ilia le pu; ma o le a latou tutulai mai, o e maualalalo ma e silisili, ma o le a tutulai uma i luma o lana pa faamasino, ua togiolaina ma ua tatala mai lenei fusi faavavau o le oti, le oti lea e faaletino” (Mamona 9:13).
Ou te molimau atu na motusia e le Faaola noataga o le oti. Sa toetu o Ia, o loo soifua o Ia, ma ua na o Ia lava le punavai o le ola, lelei, ma le faamoemoe lelei silisili.
O Se Taula i le Agaga
Na aoao mai le perofeta o Eteru, “O le mea lea, soo se tasi e talitonu i le Atua e mafai lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua” (Eteru 12:4; faaopoopo le faamamafa).
I lenei vaitau faapitoa o le faamanatuina o le soifua mai o le pepe i Peteleema, tau ina ia tatou manatua pea na afio mai Iesu Keriso i le lalolagi e avea ma o tatou Faaola ma Togiola. Ua Ia ofoina mai ia i tatou meaalofa faaleagaga e le mafaatauina o le ola, malamalama, faafouina, alofa, filemu, vaaiga, olioli, ma le faamoemoe.
Ou te valaaulia outou ia saili ma le talafeagai mo le meaalofa faaleagaga o le faamoemoe i le Faaola e ala i le suesueina o aoaoga ma molimau a perofeta anamua ma aso nei e faatatau i Lana taulaga togiola ma le Toetu moni. A o outou faia lena mea, ou te folafola atu o le a faamalosia la outou molimau i le paia o le Togiola, o le a faalolotoina lo outou liua ia te Ia, o le a faateleina lo outou manao ma le naunautaiga e tu o se molimau lototoa ia te Ia, ma o le a faamanuiaina outou i se taula i o outou agaga—e oo lava i le ola, lelei, ma le faamoemoe sili atu ona lelei.
Faatasi ai ma Aposetolo o e na molimau atu ia te Ia i le tele o tausaga, ou te tautino atu ma le olioli la’u molimau o Iesu Keriso o le Alo soifua o le Atua soifua. O Ia o lo tatou Togiola toetu ma se tino mamalu, ma le tino e mafai ona pa’i atu i ai o aano ma ivi. Ma ona o le togiola ma le faaleleiga ma le Atua lea ua mafai e le Alii ona faia mo tagata uma, e mafai ai ona tatou maua le faamautinoaga faaleagaga ma se faamoemoe ola, lelei, ma sili atu ona lelei “e faaolaina uma i Keriso” (1 Korinito 15:22).