E Na o le Faaeletonika: Aoaoga a Taitai o le Ekalesia mai Ala o Faasalalauga Faaagafesootai
15 Meaalofa e Mafaufau i ai i Lenei Kerisimasi
Vaai po o a mea na aoao mai e perofeta soifua ma isi taitai o le Ekalesia i luga o ala o faasalalauga faaagafesootai e uiga i le Kerisimasi, meaalofa mai le Faaola, ma meaalofa e mafai ona tatou tuuina atu i le tasi ma le isi.
O Le Fanau Mai o Iesu, saunia e Brian Call
O le faafesuiai o meaalofa ma e pele e mafai ona avea o se tu masani malie i le taimi o le Kerisimasi. A o tatou auai i fiafiaga o le vaitau, e taua le faatumauina o lo tatou taulai atu i le mafuaaga moni tatou te faamanatuina ai: o lo tatou Faaola o Iesu Keriso. O le faia o lena mea, o le a tatou iloa ai o meaalofa faaleagaga ua tuuina mai ia i tatou e ala i le talalelei a Iesu Keriso e sili atu ona taua nai lo soo se meaalofa faalelalolagi.
Na aoao mai Peresitene Nelson:
“Se’i o tatou taulai atu i meaalofa e fa o meaalofa na foai mai e Iesu Keriso i tagata uma o loo loto e talia i latou.
“Muamua, na Ia foai mai ia te oe ma a’u se gafatia lē faatapulaaina ia alofa atu. Ua aofia i lena gafatia le alofa atu i e e le alofaina ma i latou e le gata e le alolofa ia te oe ae o loo sauaina oe i le taimi nei ma faaaogaina oe. …
“O se meaalofa lona lua ua ofo mai e le Faaola ia te oe o le gafatia e faamagalo atu ai. E ala i Lana Togiola e lē i’u, e mafai ai ona e faamagalo atu ia i latou o ē faatiga ia te oe ma ē atonu latou te lē taliaina lava le tali atu mo lo latou agaleaga ia te oe. …
“O se meaalofa lona tolu mai le Faaola o le salamo. …
“… O le salamo o se meaalofa ofoofogia. O se faagasologa e le tatau ona matatau i ai. O se meaalofa mo i tatou ia maua ma le olioli ma ia faaaoga—ia taliaina—i lea aso ma lea aso a o tatou saili atu ia avea atili e faapei o lo tatou Faaola. …
“O se meaalofa lona fa mai lo tatou Faaola o se folafolaga moni lava—o se folafolaga o le ola e faavavau. … O le ola e faavavau o le ituaiga ma le tulaga silisili o le olaga o loo soifua ai le Tama Faalelagi ma Lona Alo Pele. Pe a ofo mai e le Tama ia i tatou le ola e faavavau, o loo Ia fetalai mai i le aano atoa, ‘Afai tou te filifili e mulimuli i lo’u Atalii—afai o lou manao o le avea moni e faapei o Ia—ona oo mai lea o le taimi tou te ola ai e pei ona ma’ua ola ai ma pulefaamalumalu i lalolagi ma malo e pei ona ma’ua faia.’”
Ua faasoa mai e taitai o le Ekalesia ni savali e uiga i meaalofa tatou te maua mai le ola ai i le talalelei ma meaalofa e mafai ona tatou tuuina atu i le tasi ma le isi a o tatou taumafai ia avea ma soo sili atu o Iesu Keriso. Mafaufau i meaalofa na ta‘ua e Peresitene Nelson o loo i luga ma meaalofa nei:
Na Ia Tuuina Mai ia i Tatou le Meaalofa o se Faaola, o Lona Alo Atoatoa
“O le malamalama o se tasi o faailoga sili ona matagofie o le soifua mai o Iesu Keriso. O le faaali mai o le Mesia ua leva ona folafola mai na aumaia ai le malamalama i se lalolagi pogisa.
“E toatele outou e tatalo mo le malosi e onosaia ai tofotofoga ia e tofotofoina ai oe i mea e ono foliga mai ia te oe o le mea lea e gata ai lou mafai. E silafia e le Atua o tatou manaoga uma, e alofa o Ia ia i tatou, ma e leoleoina i tatou e Ia. Na Ia tuuina mai ia i tatou le meaalofa o se Faaola, o Lona Alo atoatoa. O Ia o le Malamalama o le Lalolagi ma o le punavai mautinoa o le faamafanafanaga, faamoemoe, filemu, ma le olioli.
“Ou te faailoa atu lo’u alofa ia te outou ma lo’u moomooga ia outou maua se vaitau fiafia o le Kerisimasi ma lagona le alofa ma le malamalama o Keriso—i lenei tausaga ma taimi uma.”
Peresitene Henry B. Eyring, Facebook, 15 Tes. 2023, facebook.com/henry.b.eyring.
Ia Tatou Manatua le Meaalofa Silisili ua Tuuina Mai
“Sei vagana ua tatou vaaia le uiga ma le olioli uma o le Kerisimasi—o le soifuaga atoa o Keriso, o Lana misiona loloto, o le iuga faapea foi ma le amataga—ona avea lea o le Kerisimasi ua na o se isi aso malolo mai le galuega ma meaai ma mea malie ma faafiafiaga.
“O le uiga moni—o le uiga tulaga ese, ma le olioli—o le soifua mai o Iesu Keriso sa le gata i na itula muamua i Peteleema ae o le a iloaina i le olaga o le a Ia ola ai ma i Lona maliu, i Lana taulaga togiola manumalo, ma i Lona Toetu manumalo mai le oti. O mea moni nei e avea ai le Kerisimasi ma mea e fiafia ai.
“O le tausaga lenei, ia tatou manatua le meaalofa silisili ua tuuina mai: o le Togiola ma le Toetu o le Alii o Iesu Keriso.”
Peresitene Jeffrey R. Holland, Facebook, 24 Tes., 2023 , facebook.com/jeffreyr.holland.
Ua Faamanuiaina i Tatou Uma i Meaalofa Tulaga Ese
“Ou te talisapaia le avanoa e fausia ai ma faatumauina ai sootaga ma i latou o isi faatuatuaga i atunuu i le salafa o le lalolagi. I le avea ai ma fanau a le Atua, ua faamanuiaina i tatou uma i meaalofa ma taleni tulaga ese e auauna atu ai i le lelei sili atu.”
Elder Dieter F. Uchtdorf, Facebook, 10 Nov. 2023 , facebook.com/dieterf.uchtdorf
Meaalofa e Lima e Mafai Ona Tatou Tuuina Atu i le Tasi ma le Isi
“[O faataitaiga nei o] meaalofa e lima e mafai ona tatou tuuina atu i le tasi ma le isi:
-
O le meaalofa o le faapalepale e ala i le teenaina o le ita
-
O le meaalofa o le taliaina e ala i le teenaina o le faatamaiaina o tagata uma ona o amioga a ni nai tagata
-
O le meaalofa o le malamalama e ala i le lē faamasinoina o isi i na o uiga i fafo
-
O le meaalofa o le faaaloalo ma le agalelei e ala i le teenaina o le tausalaina, taufaaleaga, ma le tautala faalealofa e uiga i isi e le au ma i tatou
-
O le meaalofa o le faalauteleina o le lalolagi e ala i le faaaloalo i tagata uma, aemaise lava i latou e eseese o latou manatu
“Na afio mai Iesu i le lalolagi o se pepe lotomaualalo ae o le Malamalama o le Lalolagi. Na afio mai o Ia e aumai le filemu, alofa, ma le olioli. O moli o loo siomia ai le nofoaga autu mo tagata asiasi mai i Uosigitone D.C. ua faatusa i Ana meaalofa maoae ma le Tama ia i tatou.”
Elder Dale G. Renlund, Facebook, 1 Tes., 2023, facebook.com/DaleGRenlund.
E Mafai Ona Tatou Maua le Meaalofa Faapelepele a Iesu Keriso o le Salamo
“O se tu masani o le Kerisimasi e sili ona fiafia i ai Gong o le faitau leotele lea o le ‘A Christmas Carol’ a Charles Dickens o se aiga.
“E masani ona ou mafaufau aisea, pe a tatou manatu ia Scrooge, tatou te mafaufau muamua ai i se toeaina itaitagofie, se tagata e aamu i le Kerisimasi faapea o se ‘mea’ole’?
“Aisea tatou te le aloa’ia atili ai le Scrooge fou? O le Scrooge fou, o le e foai atu ma le limafoai le togi o le pīpī aupito telē e avea o se faaofo o le Kerisimasi? O le Scrooge fou, o lē na toefaalelei ma si ona tei matafiafia o Feleti? O le Scrooge fou, o lē na si’ia le totogi o Bob Cratchit ma tausia Tiny Tim?
“Pe o i ai nisi o siomia ai i tatou, atonu o i tatou lava, o ē mafai ona avea o se tagata ese pe ana tuu lo tatou manatu o le a latou faapea ma faapea, pe lalau lo latou tagata tuai?
“E leai se tagata ma e leai se aiga e atoatoa. E tofu i tatou ma vaivaiga ma sese—mea tatou te moomoo ia lelei ona tatou faia. O le Kerisimasi lenei, atonu e mafai ona tatou talia—ma ofoina atu—meaalofa taua a Iesu Keriso o le suiga ma le salamo, o le faamagalo ma faagalo, i isi ma i tatou lava.
“Ina tatou faaleleia ia ma le tausaga ua te’a. Faate’a faalavefau faalelagona, o feteenaiga ma le feitaga’i, ua avea ma faasoesa i o tatou olaga. Ina tatou avatu ia i le tasi ma le isi itulelei fou tatou te mafaia nai lo le nopia’i i o tatou tapulaa ua tuana’i. Tatou tuu atu i le Scrooge fou ua i totonu o i tatou taitoatasi se avanoa e suia ai.”
Elder Gerrit W. Gong, Facebook, 10 Tes. , 2023, facebook.com/gerritw.gong.
Ua Tuuina Mai e le Atua ia i Tatou le Meaalofa o le Manatuaina
“A o e mafaufau i ‘meaalofa lelei’ tetele ma laiti ua oo mai i lou olaga, na faapefea ona e vaaia le aao o le Alii o laveaiina oe, faamalosia oe, ma tuuina atu ia te oe le toomaga?
“Ua aumaia e le Atua ia i tatou le meaalofa o le manatua ina ia aua ai nei galo ia i tatou Lē Foa’i, ia tatou lagonaina ai Lona alofa e le faatuaoia mo i tatou ma aoao ai e alofa atu ia te Ia. Ua apoapoai mai le perofeta anamua o Moronae ia tatou manatua ‘o meaalofa lelei uma e mai ia Keriso’ (Moronae 10:7). E tuuina mai e lo tatou Faaola ia meaalofa e le faapei ona aumai e le lalolagi—e le tumau, o se vaega, ma matafi ma mou atu i le aluga o taimi. Ua tuuina mai e Iesu Keriso meaalofa tumau.”
Sister Tracy Y. Browning, Facebook, 13 Tes., 2023, facebook.com/Primary2ndCounselor.