“Savali faatasi ma Tagata Fou o le Ekalesia i le Malaga o le Avea ma Soo,” Liahona, Tes. 2024.
Savavali faatasi ma Tagata Fou o le Ekalesia i le Malaga o le Avea ma Soo
E manaomia e tagata fou o le ekalesia ni uo i le Ekalesia, avanoa mo auaunaga, ma le faafaileleina i le afioga a le Atua.
O se molimau, fou ua faatupulaia e manaomia ai le faafaileleina ma le onosai pe a agai mai tagata liliu mai i se lalolagi o uo masani ma aafiaga i faiga fou o tapuaiga ma fonotaga faaleaganuu i Le Ekalesia a Iesu Keriso o le Au Paia o Aso e Gata Ai.
O nei tagata fou e o mai mai ituaiga olaga eseese e talia le talalelei toefuataiina a Iesu Keriso. Latou te manaomia le taitaiga ma le faauoga ina ia tuputupu ae ai i Lona malamalama. “O i tatou o e o loo i ai i vaega eseese i le malaga umi o le avea ma soo e tatau ona faaloaloa atu se lima mafanafana o le faaaumea i a tatou uo fou, talia i latou i le mea o loo latou i ai, ma fesoasoani, alolofa, ma faaaofia ai i latou i o tatou olaga,” na aoao mai ai Elder Ulisses Soares o le Korama a Aposetolo e Toasefululua.
O le fesoasoani atu i tagata fou ia omai i le lafu e manaomia ai le nofouta, iloa, ma o nisi taimi o le manatunatuga faaletagata lava ia. “Ou te talitonu e mafai ona tatou faia ni mea e sili atu ona lelei ma e tatau ona sili atu ona lelei i le faafeiloaia o uo fou i le Ekalesia,” o le tala lea a Elder Soares. “Ou te valaaulia outou ia iloiloina mea e mafai ona tatou faia ia opomau ma taliaina atili ai, ma aoga ia i latou.”
“Sa ou i ai i se aganuu fou e tumu i upu ma tu ma aga masani fou. Sa ou lagonaina le pei o se tagata ese i le tele o talanoaga ma fesiligia lo’u taua.”
Amy Faragher, o loo faaalia faatasi ma lana tane o Nathan, ma le la fanau
Faaali le Naunau Moni
Na iloa e Amy Faragher e moni le Ekalesia i le taimi lava na ia laa atu ai i le faitotoa o le falelotu. “Sa le mafai ona ou faafitia le molimau na ou maua mai le Agaga Paia,” o lana tala lea, “o lea na ou filifili ai e papatiso.”
Pe tusa ma le tausaga talu ona auai i le Ekalesia o se tagata e 19 tausaga, na ia maua ai se valaauga e auauna atu i le Aualofa. I le tausaga mulimuli ane, sa valaauina ai o ia e avea ma peresitene o le Aualofa o lana uarota o talavou nofofua matutua. “O na aafiaga na matuai faatamaoaigaina ai lo’u olaga,” o lana tala lea. “Sa ou i ai uma i totonu.”
O le auauna atu i lenei valaauga o se tagata fou o le Ekalesia sa i ai ona luitau. “Sa ou i ai i se aganuu fou e tumu i upu ma tu ma aga masani fou,” o lana tala lea. “Sa ou lagonaina le pei o se tagata ese i le tele o talanoaga ma fesiligia lo’u taua o se tagata o le ekalesia.”
E ui lava i faigata, sa talia o ia e tagata o le Ekalesia ma lima mafanafana ma le fiafia, e pei o se tasi o uso na talosagaina e avea a’u ma ana uo. “O na fegalegaleaiga na faafaigofieina ai le luitau o le aoaoina o se olaga fou,” o le tala lea a Sister Faragher. “Sa ou lagonaina o a’u o se vaega o se nuu. E lei faamasinoina au e tagata o le uarota ona o le le malamalama i aganuu po o aoaoga faavae a le Ekalesia.”
E lima tausaga talu ona auai i le Ekalesia, ae faaipoipo o ia. Sa nonofo o ia ma lona toalua i uarota eseese i le aluga o tausaga. O se tasi o vaega faapitoa o le taliaina o lona aafiaga liliu mai, ma valaaulia foi o ia e faasoa mai lana tala o se tasi o se vaega i se gaoioiga a le uarota.
I isi uarota sa ia auai ai, sa naunau lava Amy e auai ae sa le’i lagonaina le faa-auai o ia. Sa amata ona ia masalosalo i lona tulaga i le Ekalesia. “E i ai taimi, sa le mafai ai ona tatalia le tuuatoatasi,” na ia manatua ai. “Sa faaauau pea ona ou auai i le sauniga faamanatuga ma faataunuu lo’u valaauga i le vasega pepe ae sa ou mafatia i se tulaga maualuga o le popole.”
Ina ua le fua mai ana taumafaiga e saili le lagolago mai lana uarota i se taimi faigata, sa ia sailia se fautuaga mai lona peresitene o le siteki. A o talanoa atu o ia ia te ia i se tasi taimi, sa ia faailoa atu le tiga o lona loto. Sa vave ona ia tali mai ma talosaga atu e fia faalogo atili i ai. Sa la talanoa umi ma tautino atu e feiloai e lē aunoa. “Sa matuai fiafia lava le peresitene o le siteki ma faalogo i mea uma sa ou fai atu ai,” sa ia manatua ai. “O ia le tagata muamua na fesiligia le fesili faigata e uiga i le mea na tupu.”
O lana fonotaga ma le peresitene o le siteki ma le mauaina o isi fautuaga faapolofesa na fesoasoani ia te ia e lagona ai le alofa o le Tama Faalelagi, o se laasaga taua i lona faamalologa. “Na suia mea uma mo au. Ua ou maua lo’u nofoaga,” o lana tala lea. “Ua ou aoaoina e le manaomia ona ou maasiasi i le avea ai ma se tagata liliu mai.”
“E taua mo taitai le faailoaina ma le tausia o tagata fou o le ekalesia,” o lana fautua mai lea. “Fai atu fesili faigata ma aoao pe o a mai moni lava. O se valaauga po o se tiutetauave e fetaui ma le gafatia o le tagata fou e taua foi i le talitonuga o se tagata fou. E le o se avega mamafa le auauna atu, e pei ona talitonu ai nisi taitai.”
Sa maua talu ai nei e Amy se faailoga o le matuaofaiva i le fautuaina o le soifua maloloina faalemafaufau, ma sa ia taitaia ni mafutaga faaleaoaoga a le siteki e uiga i le soifua maloloina faalemafaufau ma fesoasoani i le polokalama o le toe faaleleia o vaisu a le Ekalesia.
“Ua manaomia i tatou e Keriso e ave lo tatou satauro ma mulimuli ia te Ia. Mo nisi o tagata fou, e manaomia ona latou lafoaia a latou uo. E manaomia ona latou lafoaia o latou mausa. Latou te lafoaia le tele o mea ina ia mafai ona latou liliuina se itulau fou, ma latou te manaomia le tele o le lagolago—o nisi taimi e oo lava i se ataata ma se faatalofa agalelei.”
Ka Bo Chan, o loo faaalia faatasi ma lona faletua o Maila, ma le la fanau
O se Avanoa e Auauna ai i Isi
Sa fanau Ka Bo Chan i Hong Kong ma siitia atu i le Iunaite Setete a o talavou. Sa ia aoao e uiga i le Ekalesia a o talavou mai se tasi sa la potu faatasi i le kolisi a o suesueina musika i Portland, Oregon. Sa fiafia o ia i upumoni o le talalelei, ma sa papatisoina ma faamauina o ia. E le’i umi ae lele atu o ia i Estonia e faaauau ana a’oga.
Sa faamaonia le faigata o le mauaina o le Ekalesia i Esetonia. Na faasolosolo malie lava, ona o le leai o se fesootaiga ma tagata o le ekalesia ma le faatapulaaina o le malamalama i tatalo ma tusitusiga paia, na faamaluluina ai lona faatuatua.
I le taimi lea, sa ia feiloai ai ia Maila, o se tamaitai talavou i le aoga. “Sa susulu mea uma e uiga ia te ia,” o lana tala lea. Sa amata ona nofo o ia i ona tafatafa, ma e lei umi ae avea i laua ma ni uo.
O Maila e le o se tagata o le Ekalesia ma sa le masani i lotu. Ae a o faaauau pea le la mafutaga, sa ia fai mai afai e faaipoipo o ia, o le a faia mo le faavavau.
I le taimi o ana suesuega, sa lagona ai e Ka Bo se toso faaleagaga e toe foi atu ai i le lotu ma saili le paranesi i lona eria. O le gaoioiga muamua lava sa la auai ai ma Maila o se pati Kerisimasi a le paranesi. Sa ia lagonaina le faaletonu o le gaoioiga ma sa tuua ai se uunaiga leaga, o lea sa ia tautino atu ai e le toe foi mai lava. Ae sa faaauau pea ona auai Ka Bo i le lotu.
I se tasi taeao o le tautotogo, sa ta’u atu ai e Maila ia Ka Bo e tatau ona ia filifili i le va o ia ma le Ekalesia. E aunoa ma le tau faafefefefe, sa ia fai mai e manaomia e ia le Ekalesia ma uunaia o ia e auai faatasi ma ia.
O lana tali tuusao na mafua ai ona ia mafaufau pe o i ai se mea o misi ia te ia; na faamaluluina ona lagona, ma sa malie o ia e toe auai. O le Aso Sa na sosoo ai, sa vave ona faafeiloaia o ia i le ataata o se tuafafine faifeautalai. Sa ia lagona le tosina atu ia te ia, e pei ua leva ona avea i laua ma uo. Na mou atu ona popolega, ma na papatisoina o ia ma faamauina i le lua vaiaso mulimuli ane.
Sa le’i malamalama Ka Bo ma Maila i le tulaga o tusitusiga paia ma faiga masani o le talalelei, ma sa leai se mea i lo la aafiaga i la laua tapuaiga fou sa masani ai, e oo lava i musika. Ae sa la’ua auai i le lotu ma taumafai e aoao le talalelei.
Ina ua siitia atu faifeautalai, sa le’i iloa lelei e Maila ia tagata o le ekalesia ma sa lagona le le mautonu i tulaga fou, e pei o le Aualofa, lea sa ia mafaufau ai i se tasi taimi pe ua sese lona nofoaga. E lei umi ae lagona e le au epikopo le musuia e valaau atu ia te ia e taina le piano i le Peraimeri. “O le taina o le piano na ou maua ai se nofoaga ma se faamoemoega,” o lana tala lea.
Na iloa e Mari ma Jorma o le a la tetee atu i aganuu ma tu ma aga masani a Finelani ina ua la auai i le Ekalesia. Ae na suia lo latou ala i le olaga ma e le’i toe tepa lava i tua.
Fafagaina i le Afioga Lelei a le Atua.
Ua iloa e Mari ma Jorma Alakoski le ala o le liua. I tausaga talu ona auai i le Ekalesia i lo latou atunuu moni o Finelani, sa latou auauna atu ai i ni tulaga eseese, e aofia ai le valaauga o Mari o se tina fesoasoani o le malumalu ma le valaauga o Jorma e avea ma fesoasoani i le uluai au peresitene o le malumalu o le Malumalu o Helsinki Finelani.
Ae e pei o le toatele o tagata liliu mai, sa tatau ona latou tau mo lo latou faatuatua. Ina ua feiloai faifeautalai ia i laua, sa le faigofie ona oo mai se molimau ia Mari e pei ona sa oo i lona toalua. I le taimi muamua, sa le fiafia o ia i le Tusi a Mamona ma tulei ese e ala i le pai atu i ai i se mea itiiti e mafai ai i le na o le tumutumu o se tamatamailima.
Mulimuli ane, ina ua ia vaaia loimata o tafe ifo i alafau o lana tane a o faitauina e ia le Tusi a Mamona, sa mafaufau o ia ia te ia lava, “Afai e matua pai atu lenei tusi ia te ia, atonu e taua tele.”
Sa faasolosolo malie ona faamaluluina lona tetee, ma sa amata ai lana sailiga mo le upumoni. Mulimuli ane, sa maligi foi ona loimata pe a faitauina le Tusi a Mamona.
Na iloa e Mari ma Jorma o le a la tetee atu i aganuu ma tu ma aga masani ina ua la auai i le Ekalesia. Ae na faafuasei lava ona suia le ala o le olaga ma e le’i toe tepa lava i tua. “Na aumaia e le Ekalesia le faamalieina tele i o matou olaga. Na toetoe lava a ou manatu ua lelei tele mea uma e le mafai ona moni. Sa taliaina i matou ma le agalelei i le faapotopotoga,” o le tala lea a Mari.
“E tele mea fou na faafuasei ona oo mai i o matou olaga,” o lana tala lea. O Aso Sa sa le o toe avea ma taimi avanoa ae sa tumu i sauniga a le Ekalesia, lea sa faia faatolu i le aso Sapati atoa i lena taimi. “O lenei mea na manaomia ai le faia o ofu o tamaiti mo sauniga taitasi ma le taimi e aai ma momoe ai.”
O aso uma o le vaiaso e manaomia ai se taimi mo gaoioiga ma fonotaga e faatatau i le talalelei, pe o afiafi faaleaiga, Aualofa, po o le Peraimeri. “I le Aso Toonai, sa matou saunia ai meaai ma lavalava mo le Aso Sa,” o le tala lea a Mari.
E lei faia e le au Alakoski se faasilasilaga maoae ina ua latou auai i le Ekalesia, ae na faasolosolo malie lava ona iloa e o latou aiga ma uo. “E le o tagata uma na malamalama i la matou faaiuga,” o le faamatalaga lea a Mari. “Sa le toe talanoa mai ni nai uo ia i matou. Ae o se tau itiiti lena e totogi ai mea taua uma na oo mai i o matou olaga. E leai se mea ma se tasi e mafai ona uunaia i tatou e lafoai le Ekalesia. O lo’u tama, ina ua uma ona ia iloa lo matou liua, sa ia foia soo se feeseeseaiga ina ua ia fai mai, ‘Tuu atu ia i latou e faia mea latou te manatu e tatau ai. O i latou o ni tagata matutua. Ua latou iloa le mea latou te mananao e fai.’”
Mulimuli ane, na mananao le ulugalii ia faamauina. Sa latou fuafua, ositaulaga, ma malaga i le pasi mo aso e lua ma le po e tasi i le vaa e ui atu i Suetena ma Siamani. Na iu lava ina latou taunuu i le Malumalu o Bern Suitiselani, lea na o le pau lea o le malumalu i Europa i lena taimi.
O le au Alakoski o se faataitaiga o i latou o e mauaina se molimau o le talalelei ma agai i luma, e pei lava o Nifae, e le‘i muai iloaina mea uma ae mulimuli i le Agaga (tagai 1 Nifae 4:6). Sa latou faaaogaina faailoilo mai uso a tagata o le ekalesia e aoao ai le aoaoga faavae ma le auala e faaaoga ai le talalelei i o latou olaga. A latou le iloa se mea, latou te suesue pe fesili atu mo nisi taitaiga.
Fautuaga mai se Aposetolo
“Ua leva ona aoaoina i tatou i auala e mafai ona tatou fesoasoani atu ai i a tatou uo fou ia lagonaina le talileleia ma le alofaina i le Ekalesia toefuataiina a Iesu Keriso. Latou te manaomia ni mea se tolu ina ia mafai ona latou tumau malolosi ma faamaoni i o latou olaga atoa,” na aoao mai ai Elder Soares, ma toe taua ai fautuaga mai ia Peresitene Gordon B. Hinckley (1910–2008).
“Muamua, latou te manaomia ni uso ma ni tuafafine i le Ekalesia o ē naunau atu ma le faamaoni ia i latou, o ni uo moni ma faamaoni o ē mafai ona latou liliu atu pea i ai, o ē o le a savavali i o latou autafa, ma o ē o le a taliina a latou fesili,” na faaauau ai Elder Soares.
“Lua, e manaomia e uo fou se tofiga—o se avanoa e auauna atu ai i isi. … O se faagasologa e mafai ai e lo tatou faatuatua ona tuputupu a’e malosi atili. …
“Tolu, o uo fou e tatau ona ‘tausia i le afioga lelei a le Atua’ [Moronae 6:4]. E mafai ona tatou fesoasoani ia te i latou ia fiafia ma faamasani i tusitusiga paia a o tatou faitauina ma talanoaina aoaoga faatasi ma i latou, tuuina atu anotusi i tala ma faamalamalama atu i ai upu faigata.”
O le fesoasoani i tagata fou o le ekalesia e aumaia ai faamanuiaga faaleagaga ma faaletino i tagata liliu mai ma tagata o le ekalesia i le olaga atoa. E faamalosia ai le Ekalesia i le tele o auala. “E aumai e a tatou uo fou ni taleni mai le Atua, fiafiaga, ma le lelei i totonu o i latou,” na aoao mai ai Elder Soares. “O lo latou naunautai mo le talalelei e mafai ona pipisi solo, lea e fesoasoani ai ia i tatou e toe faaolaola a tatou lava molimau. Latou te aumaia foi ni vaaiga fou i lo tatou malamalamaaga i le olaga ma le talalelei.”