O Leo o le Au Paia o Aso e Gata Ai

O le Faatusa Matagā o le Fanau mai [o Iesu]

Saunia e Dalinda Dolly McMullin, British Columbia, Kanata

Ina ua uma ona ou faatauina mai se Faatusa ua ta’e o le Fanau mai [o Iesu], sa ou maua se malamalamaaga sili atu i le taulaga a le Faaola mo a tatou agasala.

I tausaga ua mavae a o laiti la’u fanau, sa ou aveina i latou i a matou faatauga. A o matou i ai i fafo, sa matou maua ni seti taugofie o le Faatusa o le Fanau mai o Iesu, o se tasi o na seti sa i totonu o se tamai pusa. O lenei Faatusa o le Fanau mai o Iesu sa leaga le faiga, atonu o se ‘ele, ma sa na o le lima lava ona faatagata—Maria, Iosefa, se leoleo mamoe, se Makoi, ma se pepe o Iesu.

A o tatalaina e lo’u atalii le pusa, sa lala mai i fafo se fasi vaega ma pa’ū ai i le fola, ma ta’e lua ai. Ina ua uma ona faamafanafanaina lo’u atalii mo lana mea sese, sa ou mafaufau ia te au lava, “Ia, ou te matea o le a ou faatauina lena seti matagā o le faatusa o le Fanau mai [o Iesu].” Sa le o se Faatusa o le Fanau mai o Iesu e masani ona ou teuina ai lo’u fale, ae ona sa ta’e i lo’u atalii, sa ou faatauina ma ave i le fale.

O le taimi lava na momoe ai tamaiti, sa ou aveeseina mai fafo le seti laitiiti o le Faatusa o le Fanau mai o Iesu ma mafaufau e ti’ai ese. Sa laitiiti ma matagā i la’u vaai. Ae peitai, o le vaega na ta’e, o le pepe o Iesu. Sa le mafai ona ou tiaiesea le pepe o Iesu! O lea, sa ou kelu faatasi ai le fasi vaega ma faia sina vaega itiiti i lo matou fale i tausaga taitasi mulimuli ane mo lena tamai seti faatusa o le Fanau mai o Iesu.

I le tausaga ua te’a, a o ou tuuina vaega o faatusa o le Fanau mai o Iesu i ni fasi pepa e puipuia ai, sa ou toe tilotilo atu i le pepe o Iesu. Ona ou tilotilo atu lea i le pusa a o ou tuuina lena vaega i totonu. Sa ou matauina ou te lei aveesea lava le faailoga o le tau: $1.25. O le tau lena sa ou totogia e togiola ai le mea sese a lo’u atalii.

O lena manatu na ou tu ai ma mafaufau loloto i lo tatou Faaola. O mafaufauga e uiga ia Iesu Keriso na faatumulia ai lo’u mafaufau, ma sa ou mafaufau i le tau na Ia totogiina e togiola ai au mai au agasala. Oka se tau itiiti na ou totogia mo le mea sese a lo’u atalii e faatusatusa i Lana taulaga mo a’u agasala. Sa ou totogia le tau o le faatusa o le Fanau mai o Iesu mo lo’u atalii aua ou te alofa ia te ia, ma sa totogi e le Faaola le tau mo i tatou aua e alofa o Ia ia i tatou (tagai 1 Korinito 6:19–20).

E pei lava ona ou toe faaleleia le pepe ua faaleagaina o Iesu, e mafai foi e Ia ona toe faaleleia o tatou olaga ua nutimomoia. Sa ou mafaufau i lo’u lotofaafetai mo le Togiola a Iesu Keriso mo au ma fanau taitasi a le Atua, ma mo le faamoemoe e mafai ona tatou maua i lo tatou Faaola. O lena faatusa matagā o le Fanau mai o Iesu ua le toe matagā tele ia te a’u.