“O Le Meaalofa O Se Tasi Molimau ia Iesu Keriso,” Liahona, Tes. 2024.
Sau, Mulimuli Mai ia te A’u
Kerisimasi
O Le Meaalofa O se Tasi Molimau ia Iesu Keriso
O Iesu Keriso o le agaga o le Kerisimasi, o le malamalama o le Kerisimasi, ma le taulaiga o le Kerisimasi. O le Tusi a Mamona loo i ai i totonu o ona itulau le agaga, malamalama, ma le taulaiga o le Kerisimasi aua o loo aoao mai ai e uiga ia Iesu Keriso ma le auala e o mai ai ia te Ia. O auala nei e lua ua aoaoina ai i tatou e le Tusi a Mamona ina ia latalata atili atu ai ia te Ia.
O Le Meaalofa o Feagaiga
Ua tuuina mai e le Tusi a Mamona ia i tatou se malamalama loloto atu i le uiga o le i ai o se sootaga o le feagaiga ma le Atua (tagai, mo se faataitaiga, 1 Nifae 15:18; Mosaea 5:5; 18:13; 3 Nifae 20:26). O loo ta’ua i lona itulau autu o le faamoemoega o le Tusi a Mamona, faatasi ai ma isi, o le fesoasoani lea i le toe vaega o le aiga o Isaraelu “ia latou iloa feagaiga a le Alii, ua lelafoaiina ese i latou e faavavau.” Ua tuuina mai e le Tusi a Mamona ia i tatou le malamalama toefuataiina o le sootaga o le feagaiga e mafai ona tatou maua ma le Tama Faalelagi e ala mai ia Iesu Keriso ma Lana Togiola.
A o tatou osia ma tausia feagaiga paia e ala i le papatisoga ma i totonu o le malumalu, tatou te latalata atili atu ai i le Tama Faalelagi ma Iesu Keriso i se auala e fusia ai i tatou ia i La’ua, i se auala e mafai ona toe aumai ai i tatou ia i La’ua.
O Le Meaalofa o le Alofa
O la tatou suesuega o le Tusi a Mamona e fesoasoani tatou te malamalama ai o Iesu Keriso o le meaalofa silisili lea o le alofa (tagai 1 Nifae 11:16–23) ma e alofa o Ia ia i tatou taitoatasi.
Ina ua mavae Lona Toetu, na valaaulia e le Alii ia Sa Nifae ina ia “tutula’i ia ma o mai ia te a’u, ina ia outou tuu mai o outou lima i lo’u itu, ma ina ia outou tagotago foi i tulaga o fao i o’u lima ma o’u vae, ina ia outou iloa ai o A’u o le Atua o Isaraelu, ma le Atua o le lalolagi uma, ma sa fasiotia mo agasala a le lalolagi.
“… Ma sa latou faia lenei mea, i le o atu i luma taitoatasi” (3 Nifae 11:14–15).
Ua faaalia mai e nei fuaiupu ia i tatou o le finagalo o le Faaola mo i tatou uma, i soo se mea ma i tulaga uma, o le o mai lea ia te Ia, aoao e uiga ia te Ia, ma lagona Lona alofa. O Iesu, i Lona alofa e le gata, na ositaulagaina ma le naunautai o Ia lava e totogi le tau mo a tatou agasala, ma tuuina mai ia i tatou le avanoa e faamamaina ai, ia faaleleia ma le Atua, ma iu ai ina toe foi atu i le afioaga o le Atua (tagai Alema 34:13–17; Helamana 14:15–17; 3 Nifae 27:14–22).
E mafai ona tatou faaalia lo tatou agaga faafetai mo le meaalofa o le Tusi a Mamona e ala i le faitauina ma mulimuli i aoaoga a le Faaola. A o tatou faia faapea, tatou te taliaina le agaga moni o le Kerisimasi, ma aumaia le malamalama i o tatou olaga e le gata ia Tesema ae i le tausaga atoa.
Ata o le Tusi a Mamona i le gagana Georgia