O Leo o le Au Paia o Aso e Gata Ai

O se Loto Fou

Saunia e Tamara Harris, Pule o le Tautua a le Taitai o Fesootaiga a le Militeli a le Ekalesia

O le nofoaga mulimuli sa ou manao ou te i ai i le Afiafi o le Kerisimasi o le falepuipui o le militeli.

I se tasi Afiafi na sosoo ma le Kerisimasi a o matou nonofo i Filipaina, sa vave ona sau lo’u tamā i le fale mai lana galuega o se failotu i le Nofoaga o le Fuavaalele i Clark.

“Ei, Tam,” na ia fai mai ai, “Ou te manaomia oe e fai kuki ma faataitai pese Kerisimasi i lau kitara. Ma le isi, ia ao mai foi ni mea mo teuga o le Fanau Mai o Iesu. O le a tatou faaaluina le afiafi i le falepuipui.”

Sa tumau pea lo’u le fiafia i o’u matua ona o le siitia atu o lo matou aiga i le salafa o le lalolagi. O le mea mulimuli lava sa ou manao e fai o le faaaluina lea o le Afiafi e sosoo ma le Kerisimasi i se falepuipui o le militeli. Sa ou faitio ae sa leai se aogā.

Ina ua matou ulufale atu i le falepuipui, sa taitai atu i matou i se potu gaogao o loo i ai ni nofoa ma se laulau. E lei umi ae tatala mai se faitotoa, ma sa valaaulia ma le fiafia e lo’u tamā se vaega o alii na nonoa ma loka o latou lima i totonu o le potu.

Ona matou usuina lea o pese Kerisimasi, toe faatino le Luka 2, ma fiafia i meaai māmā sa fai i le fale—o mea lava ia semanu matou te faia i le fale. Ae e i ai le mea na tulaga ese ai.

Na faamaluluina lo’u loto talavou i lena po a o ou molimauina le lotofaafetai faatauvaa o na alii pele. O se tasi o i latou e faatatau i le matou faatinoina o le Fanau mai o Iesu, sa fesili mai, “E mafai foi ona ou i ai?” Sa mananao foi isi e auai. E lei umi, ae faalauiloa mai e isi “agelu” le fanau mai faapitoa o le Faaola.

Sa le’i i ai na pagota i le mea sa latou mananao e i ai, ma sa ou i ai i se atunuu ou te le’i manao e i ai. Ae sa ou iloaina sa vaaia, iloaina, ma alofagia i matou e lo matou Faaola, o lē sa i ai foi i se nofoaga sa Ia saili ma le lotomaualalo e aveesea mai ai (taga i le Luka 22:42). I lo’u loto e 16 tausaga, sa ou iloa ai e le o tuua na o au.

Sa lē na o na alii na solo o latou loimata i lena Afiafi na sosoo ma le Kerisimasi. O le mea na tupu na suia ai olaga i lena afiafi e le o la matou faamanatuina o le Kerisimasi ae o le mana o Keriso e siitia ma faamalolo ai.

Ua toeitiiti atoa le 50 tausaga talu mai lena Afiafi na sosoo ma le Kerisimasi, ae o loo tumau pea ona avea ma se manatuaga paia. O la’u meaalofa sili ona faapitoa, e le’i faamoemoeina, ma mamalu o le Kerisimasi o se loto fou. Na suia mea uma mo a’u ina ua mavae lena.

Sa ou taliaina le olaga i Filipaina, faia ni uo fou, maua ni auala e auauna atu ai, ma filifili ia ou fiafia—o mea uma lava ona o le molimau na ou maua e uiga ia Iesu Keriso ma Lona alofa mamana i lena Afiafi na soso ma le Kerisimasi i le falepuipui.

Ou te iloa e mafai e lo tatou Faaola ona aveesea noataga mai o tatou mafaufau ma o tatou loto pe a tatou o mai ia te Ia. O Ia o la tatou meaalofa silisili.