“I le avea ai ma Tamaitai, Ua Tatou i Ai i se Usoga e Masani ona le Tautalagia i le Lalolagi Atoa,” Liahona, Tes. 2024.
I le avea ai ma Tamaitai, Ua Tatou i Ai i se Usoga e Masani ona le Tautalagia i le Lalolagi Atoa
Ua saunia e le Aualofa auala aoga e faataunuu ai le poloaiga a Iesu Keriso ia alolofa i o tatou tuaoi e pei o i tatou lava.
Tuafafine e Toatolu, saunia e Kathleen Peterson
Na aoao mai Peresitene Russell M. Nelson e faapea “ua faamanuiaina tamaitai i se tapasa tulaga ese o amioga mama” ma ua i ai i tamaitai “meaalofa faapitoa faaleagaga ma faanaunauga” e lagona ai manaoga faaletagata, e faamafanafana ai, aoao atu ai, ma faamalosia ai. E faalagolago o tatou nuu i tamaitai e faatino i o latou matafaioi tulaga ese o ni taitai, faiaoga, faafailele, fomai, ma e faatupuina le filemu.
I le avea ai ma tamaitai, ua tatou i ai i se usoga e masani ona le tautalagia i le lalolagi atoa. O tai ma vaitau o lo tatou paiolo ma le lautele o le ala tatou te tauave ma faafailele ai tagata, e fesootai ai i tatou e aunoa ma le tautatala i vaega e tavavae ai faaleaganuu ma papupuni o gagana.
Ua ou vaai i mea e fai e tamaitai pe a latou fesootai ma isi e ala i lo tatou usoga. Ua ou vaai i tamaitai o siitia e le tasi le isi i le lotolotoi o le mativa. Ua ou vaai i tamaitai o tausia, fafaga, ma faafailele fanau e le o ni a latou lava fanau. Ua ou vaai i tamaitai o tutu e puipuia isi mai le faatafunaga o taua. A ola e tusa ai ma ona tulaga maualuluga, e saunia e le Aualofa le auala aoga e faataunuu ai le poloaiga a Iesu Keriso ia alolofa i o tatou tuaoi e pei o i tatou lava.
Mo se faataitaiga, i le sefulu tausaga talu ai, i le taimi o le faaletonu o tagata sulufai i Europa, sa tuufaatasia ai e tagata o le Ekalesia o latou taimi, taleni, ma oa e fesoasoani ai i le toatele o tagata ua faaaunuua na lolofi atu i Europa. O a latou taumafaiga na fesoasoani e faaitiitia ai tulaga faigatā i nofoaga o tagata fai atu.
I Filipaina, sa popole tamaitai o le Au Paia o Aso e Gata Ai i le maualuga o le pasene o le le lava o meaai paleni i o latou nuu ma le auala na aafia ai o latou lava aiga. Na latou aoao atili e uiga i mafuaaga taatele o le lē lelei o meaai paleni ma ona aafiaga faataumaoi i le olaga atoa. Sa faia e Aualofa a uarota ma siteki ni suesuega o meaai paleni i fale o le Ekalesia mo aiga o tagata o le ekalesia ma o latou tuaoi ona aoao atu lea o matua e uiga i meaai paleni lelei. Sa latou faasino atu i latou o loo manaomia le fesoasoani i le tautua faafomai ma le alalafaga i le lotoifale o le a tuuina atu togafitiga.
Na oo mai le aafiaga o nei tamaitai a o latou galulue mo le lelei o aiga i o latou nuu. O loo faaauau pea ona faia le galuega aupito sili ona taua ma le aafiaga a tamaitai e latalata mai ia i tatou: pe a tatou tausia a tatou lava fanau, aoao se uo e faitau, talanoaina ma le onosai manaoga o se tuaoi matua, saunia se taumafataga mo e mamai, pe tagi faatasi ma se tuafafine o loo faavauvau.
Ou te taumafai ia avea ma soo o Iesu Keriso ma mulimuli i Lana faataitaiga i le auauna atu i isi. O lana aoaiga i aso taitasi o le aapa atu lea i taimi uma ia i latou o loo mafatia taitoatasi: i talanoaga patino ma le fafine Samaria ua tutulieseina i le vaieli (tagai Ioane 4); taofi e faamafanafana le fafine ma’i punatoto i le motu o tagata (tagai Luka 8:43–48); faamalolo faalilolilo le afafine laitiiti o Iairo (tagai Luka 8:51–55).
E ui o la’u galuega o loo i ai nei e aofia ai taumafaiga e faaleleia tulaga mo tamaitai ma tamaiti i le salafa o le lalolagi, ae ua ou iloaina o le tulaga manaomia aupito sili ona taua a Keriso mo a’u i le avea ai ma Ona soo o le iloa lea o manaoga o tagata taitoatasi o loo siomia ai au ma tali atu ma le onosai ma le alofa.
E lē mafai e faalapotopotoga ona aapa atu i tagata uma i le lalolagi, e tusa lava po o le a le lelei o le faatupeina o a latou polokalama, tusia lelei a latou aiaiga faavae, pe atiina ae lelei a latou fuafuaga faavaomalo. Ae e ala mai i lo tatou usoga i le lalolagi atoa, e mafai ai ona tatou aapa atu i agaga taitoatasi uma.
O ai e mafai ona e faaleleia ma le anoa lona olaga i le asō i se faatinoga o le agaalofa? Ou te uunaia outou e tutu mo sina taimi ma fesootai atu i lo tatou Tama Faalelagi, o le punavai aupito maualuga o musumusuga, ona faatalitali lea ma le filemu mo le taitaiga mai le Agaga Paia. Ou te valaaulia outou e tusi i lalo ma fai. Ou te faamoemoe o lena gaoioiga faigofie o le a fesoasoani ia te outou e iloa ai o lo tatou faamanuiaina silisili o le tatalaina lea o le mana o lo tatou usoga i le lalolagi atoa.