Liahona
15 Mafuaaga e Faaauau ai Pea ona Faitau le Tusi a Mamona i Aso Uma
Tesema 2024

E Na’o le Faatekinolosi

15 Mafuaaga e Faaauau ai Pea ona Faitau le Tusi a Mamona i Aso Uma

Saunia e Stan Thomasson

Vaai pe e te ioe i la’u lisi, pe sili atu foi, ia iloa lau lava lisi!

lima o loo uuina tusitusiga paia

Ou te faitauina le faitau selau o tusi i tausaga taitasi i le tele o ituaiga. O le tusi e sili ona faia se aafiaga ma e sili ona ou fiafia i ai o le Tusi a Mamona: O Se Tasi Molimau ia Iesu Keriso.

Sa le’i faapena i taimi uma. Sa i ai se taimi sa ou lagonaina ai sa ou iloaina tala uma ma sa ou alualu i luma i tala atu o mea e mafai ona ofoina mai e le tusi. Sa ou le toe faitauina le tusi ae faatau mai le tele o isi [tusi] e uiga i aoaoga faavae ma faatulagaga o le Tusi a Mamona. Ae peitai, o le taimi lava na mou atu ai lo’u fiailoa faaleatamai, na ou iloa ai ua maaleale ma ua mafu la’u molimau. Sa alu ese atu la’u molimau mai lo’u loto i le na o lo’u ulu, ma sa ou le iloaina le mea sa ou iloa loloto i lo’u loto.

I se tasi aso, na ou faalogo o aoao mai e Peresitene Russell M. Nelson lenei upumoni, “E tatau ona tatou lagona, loloto i le ‘vaega totonugalemu’ o o tatou loto [tagai Alema 13:27], o le Tusi a Mamona e manino lava o le afioga a le Atua. E tatau ona tatou lagonaina le o’oo’o lea tatou te le mananao ai lava e ola i se aso e aunoa ma le tusi.” E le o Peresitene Nelson le perofeta muamua lea na ta’u mai ia i tatou e faitau le Tusi a Mamona i aso uma. Ae sa matuai mamana lava lena lauga ma sa talanoa sa’o mai ia te au. Sa ou manao ma manaomia le mana na faamatalaina e Peresitene Nelson, ma sa sili atu lo’u manao nai lo se isi lava mea e faamalolo ai la’u molimau galala.

E le mafai ona ou mafaufauina ou te alu i se aso e aunoa ma le Tusi a Mamona. O ana upu ua avea ma a’u upu a o ou feagai ma luitau pe fesoasoani i isi i a latou luitau. Sa ou tuufaatasia mafuaaga e faitau ai le Tusi a Mamona i aso uma ma sa ou faasoaina atu talu ai nei la’u 50 pito i luga i lo’u toalua. Sa matuai ofo lava o ia i le taimi muamua. Ae a o ou faasoaina atu la’u lisi, sa ia faaopoopoina mai ma le naunautai nisi mafuaaga. O le taimi nei ua silia ma le 70 ma faitauina pea.

O lenei tusi o se meaalofa ofoofogia moni lava. O se taiala ma se faaaliga o le alofa o le Atua, ua tuuina mai i o tatou aso e faafetaiaia ai faatosinaga a le fili. O le faitauina ma le faafouina i aso taitasi o a tatou molimau, tatou te faatupulaia ai lo tatou faatuatua e faatino ai ona aoaoga ma vaai pe faapefea ona laveaiina i tatou e Iesu Keriso ma i latou o loo siomia i tatou. E mafai moni lava e se tagata ona latalata atili atu i le Atua e ala i le faitauina o lenei tusi ma mulimuli i ona aoaoga nai lo le faitauina o se isi lava tusi (tagai i le folasaga o le Tusi a Mamona).

E ui lava ua toeitiiti uma ona tatou suesueina le Tusi a Mamona o se vaega o le Sau, Mulimuli Mai ia te A’u, i le tausaga lenei, ae ua valaaulia i tatou e faaauau pea ona suesue i ona upumoni i o tatou olaga atoa. O mafuaaga nei e 15 ou te faaauau ai pea ona suesue i le Tusi a Mamona i aso uma. Vaai pe e te ioe i la’u lisi, pe sili atu foi, ia iloa lau lava lisi!

Ou te suesue i le Tusi a Mamona ina ia mafai ona ou:

  1. Maua se molimau ia Iesu Keriso (tagai Moronae 10:5–7; 2 Nifae 33:10–11).

  2. Faaaoga punaoa sili ona aoga e latalata atili ai i le Atua ma Iesu Keriso (tagai i le folasaga o le Tusi a Mamona).

  3. Aoao pe faapefea ona “faatatauina tusitusiga paia uma ia te [au]” (1 Nifae 19:23; tagai foi i le fuaiupu 24).

  4. Maua le malosi e faatoilalo ai ma onosaia faigata (tagai Mosaea 29:20).

  5. Faalogo i le siufofoga o le Alii ma aoao pe faapefea ona Ia fetalai mai ia i tatou taitoatasi (tagai Iakopo 7:5; Enosa 1).

  6. Faamalosia lo’u faatuatua e ala i le manatuaina e le aunoa o le “agalelei ma le alofa tunoa” o le Atua (Moronae 8:3).

  7. Vaai pe na faapefea ona vaai perofeta anamua i o tatou aso ma faaaoga lapataiga na latou tuuina mai (tagai 1 Nifae 13:40).

  8. Ia malamalama o le alofa mutimutivale o Keriso e oo mai e ala i le salamo ma se loto faamaluluina (tagai Alema 12:34).

  9. Ia lagona o loo talanoa sao mai perofeta anamua ia te au e uiga i o’u luitau (tagai Mamona 8:35).

  10. Taulai atu lo’u olaga i le manatuaina o avanoa o le tala lelei a Keriso ma le mautinoa o folafolaga o le talalelei (tagai Mosaea 2:41).

  11. Ia maua le olioli ma le mamalu e le mafai ona faaupuina (tagai Alema 26:16).

  12. Atiina ae le tomai e ole atu ai ma faamoemoe i tali i tatalo (tagai i le 2 Nifae 4:35; Mosaea 4:21; 3 Nifae 27:28; Eteru 3:2).

  13. Ia iloa le saolotoga o le “taitaiina e le Agaga” (1 Nifae 4:6; tagai foi Eteru 2:6)

  14. Ia iloa le manao ma le malosi e aveese ai mea faalavefau leaga mai lo’u olaga (tagai i le 2 Nifae 1:13–14).

  15. Ia malamalama o le avea ma se soo lotomaualalo o Keriso e mafai ona taofia ai i tatou mai le taitaiseseina (tagai i le 2 Nifae 28:14).

Na sa’o lava Peresitene Nelson! O le Tusi a Mamona e i ai se mana faavavega. Afai e te le talitonu mai ia te au, faataitai lau lava suesuega i upu a Peresitene Nelson. O le aafiaga ia te au ua matua mautinoa lava ma ua ou tautino atu ai e faitau ma mafaufau loloto i le Tusi a Mamona i aso uma mo lo’u olaga atoa.

Ua avea nei ma se soa ma se uo faapelepele. Ua ou aoaoina e tele atu mea o i ai i le Tusi a Mamona nai lo mea o loo tusia i le itulau. E i ai fuaiupu e oo mai i lo’u mafaufau o ni tali tuusao ia i mea ou te manaomia, i lena lava taimi, mo au lava ia ma i latou ou te alofa i ai. E mautinoa lava o la’u molimau faapea o le tausia o lenei tautinoga e faaalu se taimi i aso taitasi mo le Atua, e ala i le faitauina o lenei tusi, na fesoasoani ia te au e toe faamumu ai le afi o la’u molimau. Ua ou toe iloa lelei le upumoni o le talalelei, ma ua ou matua fiafia lava i mea o le a sosoo ai o le a ou aoaoina.