E Aumaia e le Faatuatua ia Vavega

O leEteru 12 ma le Moronae 7 o loo talanoaina ai faamanuiaga e mafai ona oo mai i o tatou olaga pe a tatou faatinoina le faatuatua ia Iesu Keriso. O loo faasoa mai i le Eteru 12 ni faataitaiga o i latou o e na galulue ma le mana o le faatuatua. Mo se faataitaiga:

“Faauta, o le faatuatua o Alema ma Amoleka na mafua ai ona solo le falepuipui i le eleele.

Faauta, o le faatuatua o Nifae ma Liae na faia ai le liuga i luga o sa Lamana …

“Faauta, o le faatuatua o Amona ma ona uso na faia ai se vavega tele lava i totonu o sa Lamanā.

“Ioe, ma e oo ia i latou uma o e na faia vavega sa latou faia i le faatuatua” (Eteru 12:13–16).

O faamanuiaga o le faatuatua e le faatapulaaina i alii ma tamaitai i tusitusiga paia—o le faatinoina o faatinoga i le faatuatua e faamanuiaina ai i tatou i aso nei. O faataitaiga lata mai nei o le faatuatua:

E ala i le Faatuatua, na Faasoa Atu ai e se Tagata o le Ekalesia i Korea i Saute le Talalelei i le Faitau Afe o Tagata

O Hwang Keun Ok o se tasi o le Au Paia o Aso e Gata Ai sa faigaluega i se nofoaga o tamaiti matuaoti i Korea i Saute i le vaitau o le 1960. Ina ua iloa e i latou na lagolagoina le nofoaga o tamaiti matuaoti o Sister Hwang o se tagata o le Ekalesia, sa latou tuuina atu ia te ia se filifiliga: tuua le Ekalesia pe faamavae mai lana galuega. Sa faamavae o ia. I le lima tausaga mulimuli ane, na ia tatalaina ai se fale fou mo teineiti i Seoul. I le galulue faatasi ai ma faifeautalai o le Au Paia o Aso e Gata Ai, sa latou faia ai ni konaseti i le atunuu atoa lea na fesoasoani e faasalalau atu ai le talalelei i le faitau afe o tagata.

Malumalu o Freiberg Siamani

E ala i le Faatuatua, na Maua ai e Tagata o le Ekalesia i Siamani Sasae se Malumalu

A o asiasi atu i Siamani Sasae faakomunisi i le 1968, sa folafola atu ai e Peresitene Thomas S. Monson, o lē sa avea ma se tasi o le Korama a Aposetolo e Toasefululua, i le Au Paia, “Afai o le a outou tumau faamaoni ma faatuatua i poloaiga a le Atua, o faamanuiaga uma lava e olioli ai soo se tagata o le Ekalesia i soo se isi lava atunuu o le a fai mo outou.” I lena taimi, o le malumalu e sili ona latalata i ai sa i Suitiselani, ae o Siamani Sasae sa i lalo o le pulega malosi a le malo. Sa masani ona teena visa a tagata o le Ekalesia e malaga atu ai iina.

Sa fautuaina e Peresitene Spencer W. Kimball ia Henry Burkhardt, le peresitene o le misiona a le Ekalesia i Dresden, ina ia faauo atu i taitai Faakomunisi i le atunuu. E ui lava sa faigata lenei mea, ae sa ia galue i le faatuatua. Sa anapopogi ma tatalo tagata o le ekalesia, ma sa atiina ae e Henry ni faauoga ma le toatele o taitai o le malo ma sa masani ona talosaga atu mo tagata o le Ekalesia ina ia faatagaina e malaga i le malumalu. I le 1978, ina ua ia toe talosaga atu, sa fai mai se tasi o taitai, “Aisea tou te le fausia ai se malumalu iinei?”

Ua uma le faatalitali umi, ma sa fausia e le Ekalesia se malumalu i Freiberg, Siamani, lea na faapaiaina i le 1985 e Peresitene Gordon B. Hinckley.

Tagata o le Ekalesia i se faigalotu i Toga, Me 2019

O le Faatuatua, na Faalogologo ai Tagata o le Ekalesia i Toga i le Perofeta i le Timuga

Sa asiasi atu Peresitene Russell M. Nelson ma lona faletua o Sister Wendy Nelson i Atumotu o le Pasefika i le 2019 i se vaitaimi o timuga tetele. Na toe manatua mulimuli ane e Peresitene Nelson:

“Sa anapopogi tagata o le au paia ma tatalo ina ia puipuia a latou sauniga na faia i fafo mai timuga.

I Samoa, Fiti, ma Tahiti, o le taimi lava na amata ai sauniga, na uma ai foi timuga. Ae i Toga, sa le’i taofia timuga. Ae o le Au Paia faatuatua e 13,000 na vave atu i ni itula muamua ia maua se nofoa, sa faatalitali ma le onosai i le toulu mamafa o timuga, ona nonofo ai lava lea i le sauniga atoa e lua itula i le sūsū.

Sa matou vaaia le faatuatua malosi i lona faatinoga i tagata taitoatasi o ia motu—o le lava o le faatuatua e taofi ai le timu, ma le faatuatua e onosai ai le lē muta o le timu.