Saili ma Maua “le Faamoemoe e Lelei Silisi Atu”

Saunia e Mark A. Mathews

Ofisa o A’oga a le Ekalesia

E fesoasoani le faamoemoe ia i tatou e faatoilalo ai tofotofoga, tumau e oo i le iuga, ma maua ai le ola e faavavau.

o se tamaitai o loo tu i luga o se ala ma tilotilo atu i le malamalama o sau mai se faitotoa

Na valoia e le Alii o Iesu Keriso e faapea, i aso e gata ai “o le a faavaivaia loto o tagata” (Mataupu Faavae ma Feagaiga 45:26). Ua tatou vaaia lenei mea i se vaega ua faataunuuina e ala i le lotovaivai ma le faanoanoa lea ua mafatia ai lo tatou lalolagi, ma taitai atu ai i le salalau solo o le leai o se faamoemoe.

E ui i lea, e lei tuua i tatou e lo tatou Faaola e aunoa ma se auala e fetaiai ai ma lenei sasa o le faanoanoa. I le Tusi a Mamona, ua Ia faaali mai ai e ala mai i Ana perofeta le auala e mafai ona tatou maua ai “le faamoemoe lelei silisili atu” (Eteru 12:32) lea e fai “ma taula i [o tatou] agaga” (Eteru 12:4) i le lotolotoi o galu o le lotovaivai ma le leai o se faamoemoe.

O le a le faamoemoe?

I la tatou gagana i aso uma, e masani ona faaaogā le faamoemoe e faamatala ai manatu o moomooga. Mo se faataitaiga, “Ou te faamoemoe e le timu le aso.” Ae i le gagana o le talalelei, o le faamoemoe e le puupuu pe le mautonu. Nai lo lena, e “mautinoa, le maluelue, ma malosi.” O le faamoemoe “o moomooga mautinoa ma le naunau atu i faamanuiaga folafolaina o le amiotonu.” Mo se faataitaiga, na aoao mai le perofeta o Moronae e mafai “moni lava ona tatou faamoemoe mo se lalolagi sili atu ona lelei, ioe, se nofoaga lava i le aao taumatau o le Atua” (Eteru 12:4).

O le a le mea e ao ona tatou faamoemoe i ai?

E masani ona talanoa mai tusitusiga paia e uiga i le i ai o le faamoemoe mo le mea silisili o faamanuiaga folafolaina uma a le Atua: o le ola e faavavau i le malo selesitila o le Atua (tagai Mataupu Faavae ma Feagaiga 14:7). Na faataitaia e le perofeta o Mamona lenei mea ina ua ia aoao mai: “Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41).

E faapefea ona tatou maua ma atiina ae le faamoemoe?

I se faaupuga faigofie, “O le faamoemoe lea e sau mai le faatuatua” (Eteru 12:4). O se vaega o le talitonu ia Iesu Keriso o le faatuatuaina lea o folafolaga ua Ia faia ia i tatou. Talu ai e fesootai le faatuatua ma le faamoemoe, a o tuputupu ae lo tatou faatuatua i le Alii, e faapena foi lo tatou faamoemoe i le mauaina o Ana faamanuiaga folafolaina. O le taunuuga, o mea e atiina ae ai lo tatou faatuatua e atiina ae ai foi lo tatou faamoemoe.

Mo se faataitaiga, a o tatou faatinoina le faatuatua i le Alii e ala i le tatalo faamaoni, auai i le Ekalesia, aai ma feinu i le faamanatuga, tapuai i le malumalu, suesue i tusitusiga paia, utagia upu a perofeta soifua, tausia o poloaiga a le Atua, ma salamo i a tatou agasala, ua tatou valaaulia le Agaga Paia e faamautu le moni o nei mea. O lenei mea e faateleina ai lo tatou faamoemoe aua ua faamautinoa mai e le Agaga ia i tatou e moni le talalelei a Iesu Keriso ma o loo tatou ola faamaoni i Lana talalelei. I se isi faaupuga, o loo tatou tausia a tatou feagaiga o le talalelei ma o lea e mafai ai ona tatou talitonu i le mauaina o Ana faamanuiaga folafolaina.

E fesoasoani faapefea le faamoemoe ia i tatou?

A o tatou tausia ma le faamaoni a tatou feagaiga ma le Alii, e mafai ona tatou maua se faamautinoaga faaleagaga e ala i le Agaga Paia ua taliaina e le Tama Faalelagi a tatou taumafaiga ma o Ana folafolaga ia i tatou o le a iu lava ina faataunuuina uma. O lenei “susulu atoatoa o le faamoemoe” o le a tatou maua le ola e faavavau o le a fesoasoani ia i tatou e “tumau e oo i le iuga” i tofotofoga ma luitau a o tatou “fetaomi atu i luma ma le mausali ia Keriso” (2 Nifae 31:20). O lenei faamoemoe atoatoa o le ola e faavavau e fai “ma taula i agaga” o i latou o e mauaina, ma o le a latou “mautinoa ma mausali ai, ma faatumulia ai pea i galuega lelei e le aunoa” (Eteru 12:4).

E mafai ona oo mai lenei faamoemoe ia i tatou uma. A o tatou faamaoni i a tatou feagaiga o le papatisoga ma le malumalu, e mafai ona tatou maua le talitonuga atoatoa e faapea, po o le a lava le mea e tupu i le olaga, po o a lava luitau po o faafitauli tatou te feagai, o le a faataunuuina e le Alii ana folafolaga ia i tatou, e aofia ai le ola e faavavau i Lona afioaga. Ua i ai lo tatou faamoemoe mautinoa ia Keriso “i le ala ma le taimi a le Alii lava ia, e leai se faamanuiaga o le a taofia mai Lana Au Paia faamaoni.”