O Le Meaalofa o le Alofa Mamā

Saunia e Elder Takashi Wada

O Le Au Fitugafulu

O le alofa mamā o Keriso e mafai ona suia ai o tatou olaga a o tatou sailia lenei meaalofa taua.

Ua valaauliaina i tatou ina ia avea e faapei o lo tatou Faaola, o Iesu Keriso. Sa Ia saunoa mai: “O lea, o a ituaiga o tagata e tatau ona outou i ai? E moni, ou te fai atu ia te outou, e pei lava o A’u nei” (3 Nifae 27:27 A o tatou taumafai ia avea atili e faapei o Ia, e tatau ona tatou sailia le alofa mamā e oo lava i taimi sili ona luitauina.

O Moronae, le perofeta mulimuli o sa Nifae, sa ola i taua “matua matautia” ma sa molimauina le faatafunaga atoa o lona nuu. Faatasi ai ma ona fili o loo tautino mai e faaumatia i latou uma o e o le a le faafitia Iesu Keriso, sa fealuai solo na o Moronae “mo le saogalemu o [lona] lava ola” (Moronae 1:2–3).

I lenei tulaga matautia, na tusia ai e Moronae “ni nai faaopoopo itiiti,” ma le faamoemoe o le a “aogā … i se aso i le lumanai” (Moronae 1:4). Sa ia faaaofia ai “upu a [lona] tama o Mamona,” o le na aoao mai e faapea “e tatau ona tatou maua le alofa mamā; aua afai e leai [se] alofa mamā o se mea noa [i tatou].” “O le alofa mamā o le alofa le ponā lea o Keriso,” na faaauau ai le tala a Mamona, “ma e tumau e faavavau” (Moronae 7:1, 44, 47).

E tatau ona tatou “tatalo atu i le Tamā ma le malosi atoa o le loto, ina ia faatumulia [tatou] i lenei alofa, lea ua ia faae’e mai i luga o i latou uma o e o soo moni o lona Alo, o Iesu Keriso” (Moronae 7:48).

I le avea ai ma se isi molimau ia Iesu Keriso, o loo molimau ma le matagofie mai ai le Tusi a Mamona i le alofa mamā o Keriso ma aoao mai ai le auala e mafai ona tatou maua ai le meaalofa o le alofa mamā i o tatou olaga.

O le Alofa o Keriso mo i Tatou

Mai aoaoga a Mamona, ua tatou aoao ai o le alofa mamā e le mavavaeeseina le fesootai atu i le Faaola. O le faailoaga silisili o le alofa mamā o le alofa lea e sau mai ia Iesu Keriso e ala i Lana taulaga togiola.

I le talanoa atu i le Faaola, na faapea atu ai Moronae:

“Ou te manatua na e fetalai mai ua e alofa i le lalolagi e oo lava i le tuuina ifo o lou soifua mo le lalolagi. …

“Ma o lenei ua ou iloa o lenei alofa ua ia te oe … o le alofa mamā lea” (Eteru 12:33–34).

I le amataga o Lana galuega i le Tusi a Mamona, na valaaulia ai e le Faaola toetu tagata e o mai ma tagotago i le faailoga i Lona itu ma tulaga o fao i Ona lima ma vae ina ia latou iloa ai o Ia ma mea na Ia faia ona o le alofa mama mo le lalolagi atoa (tagai 3 Nifae 11:14–15).

E le uma le alofa o Keriso. Na aoao mai Mamona e tatau ona tatou “pipiimau ai i le alofa mamā, le mea ua silisili i mea uma” (Moronae 7:46). Ua faamautinoa mai e Peresitene Jeffrey R. Holland, o le Sui Peresitene o le Korama a Aposetolo e Toasefululua, ia i tatou e faapea “e na o le alofa mamā o Keriso o le a lagolagoina i tatou. O le alofa o Keriso e faapalepale, ma e agalelei. O le alofa o Keriso e le faafefeteina pe faigofie ona faaita. E na o lona alofa mama lava e mafai ai e ia—ma i tatou—ona tauaveina mea uma, talitonu i mea uma, faamoemoe i mea uma, ma onosaia mea uma. [Tagai i le Moronae 7:45.]”

O se tasi o auala tatou te maua ai lenei meaalofa o le alofa mamā o le mulimuli lea i aoaoga a le Faaola ia “salamo … ma o mai ia te a’u, ma ia papatisoina i lo’u igoa, ma faatuatua mai ia te au, ina ia faaolaina outou” (Moronae 7:34).

O Lo Tatou Alofa mo Keriso

Ina ua uma ona faalogo i le tupu o Peniamina o saunoa e uiga ia Iesu Keriso, sa oo ona tagata i “se liuga tele … i [o latou] loto” ma sa “le toe i ai so matou manao e fai mea leaga, ae ia faia mea lelei e le aunoa” (Mosaea 5:2).

O lenei suiga, e na o Iesu Keriso ma Lana Togiola e mafai ai, ua fatuina ai i totonu ia i tatou se loto ua faatumulia i le alofa mo Keriso. O lenei alofa e sili atu nai lo na o le talisapaia, alofa, po o le faamemelo. Afai tatou te alolofa moni ia Keriso, o le a tatou tuuina atu o tatou loto atoa ia te Ia.

Ina ua faalogo le tama o le Tupu o Lamonae i le talalelei, sa manao o ia ia maua le Agaga ma ia maua le ola e faavavau. “Faauta, ua fai mai o ia, o le a ou tuu atu mea uma ua ou maua, ioe, o le a ou lafoa’i i lo’u malo, ina ia mafai ona ou maua lenei olioli tele” (Alema 22:15). I le tatalo, sa ia ta’u atu ai i le Alii, “O le a ou lafoa’i ese a’u agasala uma ina ia ou iloa oe” (Alema 22:18).

O isi i le Tusi a Mamona na faaalia lenei alofa mo Keriso. O Aneti-Nifae-Liae na “tuu i lalo auupega o lo latou fouvale” (Alema 23:13) ma tanumia i latou “loloto … i le eleele” (Alema 24:17). Sa latou osifeagaiga o le a latou “le toe faaaogaina [a latou] auupega,” ma “nai lo le faamaligiina o le toto o o latou uso, o le a latou tuuina atu o latou lava ola” (Alema 24:18). Sa matua’i liua atoatoa i latou ma e latou te “le’i pa’ū’ū ese lava” (Alema 23:6).

Tatou te faaalia lo tatou alolofa mo Keriso e ala i le tausia o Ana poloaiga, mauaina o sauniga o le faaolataga ma le faaeaga, osia ma faamamaluina feagaiga, ma ola o ni Ona soo. O lo tatou alofa mo Ia e uunaia ai mea uma tatou te faia.

O Le Samaria Agalelei, saunia e Walter Rane

O Lo Tatou Alofa o le Tasi i le Isi

E le gata i le lagonaina o le alofa mai ia Keriso ma mo Keriso, e tatau foi ona tatou taumafai ia i ai le alofa mamā, po o le alofa faaKeriso, mo le tasi ma le isi.

Sa tatalo Enosa i le ao atoa ma le po mo se faamagaloga o ana agasala. Ina ua uma ona faamagaloina ma faatumulia o ia i le alofa o le Faaola, sa ia sasaa atu lona agaga atoa i le tatalo mo lona nuu—ma ona fili (tagai Enosa 1:4–12). I le faatumulia ai i le alofa mamā, sa mananao foi atalii o Mosaea “ia tala’i atu le faaolataga i tagata uma, aua sa le mafai ona latou talia le fano o le agaga o soo se tagata” (Mosaea 28:3).

O le alofa mama e siitia ai le auala tatou te vaai ai ma taulimaina ai isi. Na aoao mai Peresitene Russell M. Nelson e faapea: “O le alofa mamā e uuna’ia ai i tatou e “tauave avega a le tasi’ [Mosaea 18:8] nai lo le faafaupu’e o avega i luga o le tasi. O le alofa mamā o Keriso e mafai ai ona tatou ‘tutu o ni molimau o le Atua i taimi uma ma i mea uma’ [Mosaea 18:91] --aemaise i tulaga popolevale.”

Ina ua saisai e uso o Nifae ona lima ma vae i maea, ma le faamoemoe e tuua o ia e oti i le vao, sa tatalo Nifae mo se fesoasoani ma sa laveaiina o ia e le Alii (tagai 1 Nifae 7:16–18). Nai lo le sailia o le tauimasui i ona uso, e pei ona faia e le tagata faaletino, na faataitaia e Nifae le auala e “faapalepale” ai le alofa mama (Moronae 7:45) e ala i le “faamagalo ma le alofa i ia te i latou i mea uma sa la faia” (tagai 1 Nifae 7:21).

Afai e maua e tagata uma le meaalofa o le alofa mamā, o le a tatou iloaina mea na oo i tagata o le Tusi a Mamona ina ua uma ona asiasi atu le Faaola ia i latou, aoaoina i latou, ma faatuina Lana Ekalesia i totonu o i latou: “Sa leai se finauga … ona o le alofa o le Atua sa mau i [o latou] loto” (4 Nifae 1:15).

O Se Meaalofa Sili Ona Taua

Ina ua faalogo Nifae o tautala lona tamā e uiga i lana faaaliga vaaia o le laau o le ola, sa fai mai Nifae sa “manao … ina ia mafai ona ou vaai, ma faalogo, ma iloa e uiga i ia mea, i le mana o le Agaga Paia” (1 Nifae 10:17). Sa faamanuiaina Nifae e aoao atili e uiga i le alofa mamā ina ua ia vaai i le laau o le ola, lea e faatusa i le alofa o le Atua—“o le mea lea ua silisili atu ona manaomia i mea uma” ma “le silisili ona olioli i le agaga” (1 Nifae 11: 22, 23).

Na tusia mulimuli ane e Nifae:

“E tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20; faaopoopo le faamamafa).

E i ai se aso o le a tatou tutu ai i luma o le Faaola. I lena aso, afai ua tatou maua se vaaiga sa’o i Ona uiga, amioga, ma le matafaioi o lo tatou Togiola, “o le a tatou faapei o ia, ona o le a tatou vaai ia te ia e pei ona i ai o ia” (Moronae 7:48). Na oo le uso o Iareto i lenei mea a o tu o ia i luma o Iesu Keriso, o le na fetalai mai, “Ou te le’i faaalia a’u lava i se tagata … , ona e leai se tagata sa talitonu mai ia te a’u e pei ona e talitonu mai. Pe ua e vaai ea ua foafoaina oe i lo’u lava faatusa?” (Eteru 3:15).

Ona o Iesu Keriso, “e mafai ona tatou maua lenei faamoemoe; ina ia mafai ona faamamaina i tatou e pei lava ona mamā o ia” (Moronae 7:48). E le mafai ona tatou ausia na o i tatou lenei mea. Ua tuuina mai ia i tatou le alofa mamā o se meaalofa mai ia te Ia, ma afai e “maua i tatou ua i ai i le aso gataaga, o le a lelei ia i [tatou]” (Moronae 7:47).

Ou te molimau atu o le meaalofa o le alofa mamā ua i ai le mana e suia ai le olaga o le tagata pe afai tatou te faatagaina. Tau ina ia tatou tatalo ma le malosi atoa o o tatou loto ina ia maua le alofa mama o le Faaola mo i tatou, tuputupu ae i lo tatou alofa mo Ia, ma, i le avea ai ma Ona soo moni, faasoa atu lenei meaalofa sili ona taua i isi.