“Na Avea o Matou Tauiviga ma o Matou Faamanuiaga,” Liahona, Tes. 2024.
O Atatosi o le Faatuatua
Na Avea o Matou Tauiviga ma o Matou Faamanuiaga
E ui lava i o matou puapuaga i taimi faigata i Kenya, ae sa tuuina mai e le Alii le alofa mutimutivale ia i matou i se fuataga tele.
Ata pu’e mai faaaloaloga a le tusitala
O nisi taimi e mafai ona lē mautonu ai le olaga i Nairobi, le laumua o Kenya i Aferika i Sasa’e. Ae i le avea ai ma fanau a se pule o le falegaosimea o le vasega tulagalua, sa tele mea sa matou aai ai ma o’u tei e toalua ma se fale e i ai mea uma sa matou manaomia.
Peitai, o le faiga palota i le 2008 na vave ai ona faaleagaina o matou olaga lelei, ma faateteleina ai le vevesi o le atunuu. Sa feoai solo tagata faatupu faalavelave i magaala ma faoa ia pisinisi. A o alu e faigaluega, sa manaomia e lo’u tamā se leoleo faafeao.
Mo le saogalemu, na matou tuua le aai ma siitia atu i se fale sa fausia e lo matou tamā i le 450 km (280 maila) le mamao, i Busia, Kenya. Ae e oo lava iina, sa loka o matou faitotoa.
E aunoa ma se fesili, o le taimi o le Kerisimasi i le 2009 o le taimi sili lea ona faigata. O aso uma lava i lena vaitau, sa matou fefefe ai mo o matou ola. Sa lalafi tagata i fafo o lo matou fale, sa naunau ma sauni e gaoi. Sa savavali mai se vaega o tagata sauā iā i matou ma ni sapelu. Sa masani ona matou fefefe e tatala le faitotoa. Ua ou talitonu o tatalo a lo’u tina faatuatua na faasaoina ai i matou.
O le taimi lena, ua leai se galuega a lo’u tamā. Na le’i umi ae uma meaai. O le matou meaai o le Kerisimasi i lena tausaga sa tutusa lava ma laulaau faapuna na fati mai laau o pi na totoina e lo’u tina. E ui lava i o matou puapuaga, ae sa tu mausali lo’u tamā, e ui ina sa ia lagonaina foi le tiga tele.
Sa lofituina i matou i le fefe ma toetoe lava a leai se faamoemoe. “Aisea na tupu ai lenei mea?” sa matou fesili ifo ai ia i matou lava. “Aisea ua tatou feagai ai ma na faigata ina ua faatoa auai i Le Ekalesia a Iesu Keriso o le Au Paia o Aso e Gata Ai?”
Alofa Mutimutivale Maoae
I se tasi afiafi, sa lototele ai ni faifeautalai matutua se toalua o e na iloaina o matou tulaga matautia i le eria e aumai ia i matou se savali o le filemu. Sa faalototeleina i matou a’o la tauloto mai le molimau a Nifae ma le folafolaga i le 1 Nifae 1:20: “O le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai.”
Sa matou talitonu iai.
Sa fesoasoani faifeautalai ia i matou ia malamalama e tusa lava po o a o matou puapuaga, sa faamoemoe le Alii ia matou ola pea ma le faamaoni. Ou te manatua lelei lava le filemu ma le mafanafana na lofituina ai a’u i lena po. Sa sili atu lo’u iloaina, nai lo se isi lava taimi muamua, sa silafia i matou e le Alii ma lo matou tulaga pagatia. O lena po, ma i taimi faigata mulimuli ane, sa ou iloa ai e matagofie Lona alofa mutimutivale.
Ina ua oo mai le taimi mo au e auauna atu ai i se misiona, sa ou lagonaina se manao e faamanuia tagata i Uganda tuaoi i le talalelei, ae sa ou manao foi e aoao tagata i Zimbabwe, le aiga o le faifeautalai na papatisoina au.
Sa ou tatalo, ae i lo’u loto, sa ou le iloaina se auala e mafai ona ou auauna atu ai i ni atunuu se lua e vavamamao. E lei umi, ae maua lo’u valaauga i Zimbabwe, ae a o ou i ai i le nofoaga autu mo le aoaoina o faifeautalai i Johannesburg, Aferika i Saute, sa faatuai la’u visa. Sa toe tofia a’u i Uganda, lea sa ou auauna ai mo le valu masina ae ou te lei mauaina le faamaoniga o le visa mo Zimbabwe.
“Ua i ai i le Alii Ona ala faalilolilo,” sa ou mafaufau ai ia te au lava.
O lo’u eria muamua i Zimbabwe o Chikanga Mutare. I le naunau ai e sue le aiga o le faifeautalai na papatisoina au, sa ma suesueina ai le tusi eria ma la’u soa. E tele igoa e tutusa ma le igoa o lona aiga. Sa ma tatalo, faia la ma filifiliga sili i le mea e o i ai, ma taumafai e o i fafo.
I le faitotoa muamua sa ma tu’itu’i atu ai, sa ma maua ai le aiga o la’u faifeautalai. Sa vave lava lo matou olioli. Sa ma fetagisi ma fusi e pei o se aiga. A o ou matamata faasolosolo i ata o le tusiata o le aiga, sa ou mauaina ata o lo’u aiga i lo matou papatisoga.
“Sa Matou Lagonaina le Lagi”
Sa ou toe foi i le fale ina ua maea la’u misiona ma iloa ai e lei faaleleia tulaga mo lo’u aiga. Sa leai lava se galuega a lo’u tamā. Sa valaaulia au e ni tausoga se toalua e nonofo faatasi ma i laua i Kibera—o le eria aupito sili ona faigata i Nairobi. O iina, na ou fatuina ai se nofoaga e ta’ua o le aiga.
Sa pulea e kegi ia Kibera, ae sa ou taumamao lava mai eria sa tumu i solitulafono. Sa ou lagona le leai o se mea e tatau ona ou faia, ae sa fesoasoani o’u tausoga e puipuia a’u, ma faamautinoa ua iloa e isi o a’u o se tagata lotu ma e tatau ona faaaloalogia.
O meaai i nuu maotua e tutusa lava ma le vai ma le paluga sukalati e fai ai se mea e pei o se konati. Sa ou filifili e ai i le po. O taeao uma lava, ou te ala ai ma le fiaai. I le lotu, sa ou faia le mea sili ou te mafaia e ataata ai ma fiafia ina ia le iloa ai e tagata o le ekalesia lo’u fiaai.
I le taimi lea, sa ou auauna atu ai o se peresitene o le korama a toeaina i le Paranesi a Langata ma auai i le aoga pe a mafai. I aoauli o Aso Sa, sa ma savavali ai ma le peresitene o le paranesi e asiasi i tagata o le ekalesia, ma le iloaina o o matou ofutino papae ua avea ai i matou ma taulaiga faigofie e kegi. Ae sa ma lagonaina le lagi a o ma auauna atu i isi, ma sa leoleoina i maua e o’u tausoga a o matou savavali i auala pefu.
E ui lava i taimi faigata, o le tala lea a Uso Omondi, “faatasi ai ma le tatalo, sa ou lagonaina le lagolagoina ma sa le’i leiloa ai lo’u faamoemoe. Na tauia lena faamoemoe.”
Tauia le Faamoemoe
O se taimi faigata lenei, ae o le tatalo, sa ou lagona ai le lagolagoina ma sa le’i leiloa ai lo’u faamoemoe. Na tauia lenā faamoemoe.
I sina taimi mulimuli ane, na ou maua ai se avanoa mo se faatalanoaga mo se galuega. Sa ou tauva mo le galuega e faasaga i le anoanoai o isi o e sa sili atu ona agavaa i faailoga ma tusipasi. Ae sa ou i ai i se misiona, ma sa ou maua le faatuatua ma le mautinoa o le a faamanuiaina au e le Alii. Sa ou faia se tatalo ona ou savali lea i luma o se vaega e faia le iloiloga.
I le faaiuga o la’u faatalanoaga, sa ou faapea atu, “O afea ou te amata ai?” I le lua vaiaso mulimuli ane, o a’u o se tasi o le toalua na faafaigaluegaina. E lei umi ae ou iloaina au lava o se tagata faatau sili, lea na tatalaina ai faitotoa mo le alualu i luma, e aofia ai se valaau mai se taitai pule sili e auai i lana kamupani tele. O le asō, ua ou maua ai le faamanuiaga o le avea ma se tane ma se tamā ma auauna atu o se epikopo o le Uarota a Langata.
“O le asō, ua ou maua ai le faamanuiaga o le avea ma se tane ma se tamā ma auauna atu o se epikopo.”
Ou te toe tepa i tua i le Kerisimasi o le 2009 ma tauiviga na sosoo ai o se lesona e manatua pea—o se taimi na avea ai o matou tauiviga ma o matou faamanuiaga ma tuuina mai ai e le Alii le alofa mutimutivale agalelei ia i matou i se fuataga tele ona o lo matou faatuatua.