O Leo o le Au Paia o Aso e Gata Ai

E Leai se Kerisimasi i le Tausaga Lenei?

Saunia e James Nowa, Iuta, ISA

Ina ua ma fesili e uiga i le Kerisimasi, sa fai mai le tina sa faigata taimi ma o le a leai se mea a le aiga mo le Kerisimasi i lena tausaga.

O loo mafai lava ona ou vaai i le fale i lo’u mafaufau i lena aso malulu ma le puaoa o Tesema i Ilinoi, ISA. O lona taualuga sa i luga a’e o le eleele, ae o le tele o le fale sa i lalo ifo o le eleele. “Atonu, e leai se tasi e nofo ai iina,” sa ma ioe ai ma la’u soa.

Sa ma tu’itu’i. Ina ua mavae sina taimi, sa tatala mai faava laitiiti e se tamaitai le faitotoa. Sa ma ta’u atu ia te ia o i ma’ua o ni faifeautalai mai Le Ekalesia a Iesu Keriso o le Au Paia o Aso e Gata Ai ma e i ai sa ma savali taua mo ia. Sa faatuai o ia ae sa faataga i ma’ua i totonu.

Sa ia faatonuina i ma’ua e nonofo i luga o nofoa laupapa e lua ua maluelue. Sa tau le malamalama tele le potu. A o faamasani o’u mata i le malamalama, sa ou matauina ai o le fale e i ai se fola palapalā. E leai ni ata na tautau i luga o puipui. Na faafuasei lava ona omai ni tamaiti foliga faanoanoa se toafa o loo oofu i ofu lanu tasi.

E toe lua vaiaso oo i le Kerisimasi. O fea le pepe o Iesu i se faatanoa vao? O fea sa i ai teuteuga felanulanuai ma le laau Kerisimasi?

Ina ua uma ona ma tuuina atu la ma savali e uiga i le Toefuataiga, sa valaaulia i ma’ua e le tina e toe fo’i atu e talanoa i lona toalua. Ae ma te lei o ese, sa ma fesili e uiga i le Kerisimasi. Sa ia fai mai o se taimi faigata ma o le a leai se mea latou te maua mo le Kerisimasi i lena tausaga.

Ina ua ma o ese, sa ma talosaga atu ma la’u soa mo se fesoasoani mai tagata o le uarota i le lotoifale. Na sosoo ai ma se faatinoga sili o le alofa. Sa foai atu e tagata o le ekalesia meaai, lavalava, meataalo, ma se laau Kerisimasi e i ai teuga.

Sa ma toe foi atu i le aiga i ni nai aso mulimuli ane. Sa ma tu’itu’i, ma sa toe tatala mai faavaiti le faitotoa. “Manuia le Kerisimasi,” sa ma fai atu ai a o ma faafeiloaia le tama, tina, ma le fanau e toafa.

Sa ma aveina le laau, meaalofa, ma meaai i totonu o le fale. Sa foliga ofo le aiga. Sa matou faatuina le laau, tuu meaalofa i lalo, tuu meaai i luga o le laulau, ma olioli i se asiasiga puupuu. A o ma sauni e o ese, sa ou tilotilo atu i tamaiti. Sa iai ni ataata tele i o latou foliga.

Sa faaauau pea ona matou aoaoina le aiga, ma na iu lava ina latou auai i le Ekalesia. A o faamalamalamaina e le malamalama o le talalelei lo latou aiga, sa atiina ae e le tamā le faatuatua ma maua ai se vaaiga fou mo lona aiga. Sa ia maua se galuega e sili atu ona lelei. Sa faasolo ina vavalalata le aiga. E le’i umi ae latou siitia atu i se fale fou.

Ua silia ma le 60 tausaga mulimuli ane, ou te faafetai pea i le Alii mo le faatagaina o i ma’ua e faamanuia Lana fanau pele e toaono, ma faamanatu mai ia te a’u “aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40).