Pe E te Talitonu ia Keriso ma Mea e Mafai ona Ia Fesoasoani ia te Oe e Fai?

Saunia e Lavinia Fonnesbeck

E nofo le tusitala i Angola.

O le talitonu ia Iesu Keriso o le tasi lea o mea. Ae o le talitonu i mea e mafai ona Ia fesoasoani ia i tatou e ausia o se mataupu e matuai ese lava.

o le Faaola o loo tu ma le la o loo susulu i Ona fofoga

Sa 14 o’u tausaga i le taimi na maliu ai lo’u t-inamatua. I le taimi lea, o le faanoanoa sa le o se mea e ese ia te au. Sa ou fia iloa po o fea o i ai o ia ma pe o le a ou toe vaai ia te ia. Sa manaomia ona ou iloa le auala e faatoilalo ai le tiga sa ou lagonaina. Mo le lua tausaga, sa mamafa nei fesili i lo’u mafaufau.

I se tasi aso, sa valaaulia ai e lo’u tama ia faifeautalai i lo matou fale, ma sa latou aoaoina au e uiga i le talalelei toefuataiina. Sa latou aoaoina au i le auala e maua ai le mana faamalolo o le Togiola a Iesu Keriso. O a latou aoaoga o le ata o le faaolataga na ulufale mai i lo’u loto ma le malosi ma taliina ai au fesili. O nei tali na aumaia ai le filemu sa ou sailia.

O lo’u latalata atili atu ia Iesu Keriso, o le tele foi lena o lo’u manao e faasoa atu mea sa ou aoaoina e uiga ia te Ia! Sa laitiiti tele le Ekalesia i Angola, ma sa le mafai ona ou faatali e fesoasoani ia tuputupu ae e ala i le ta’u atu i tagata o mea sa ou iloa. E ui lava o a’u taumafaiga e faasoa atu le talalelei sa le o taimi uma na lelei ai le taliaina, ae sa faaauau pea ona ou taumafai. Ma na iu lava ina faatupulaia lo’u manao e faasoa atu le fiafia, faamoemoe, ma le filemu o le talalelei.

Sa ou filifili e auauna atu i se misiona ma faasoa atu mea sa i lo’u loto.

Pe Mafai Moni Ona Ou Maua le Faatuatua?

Sa valaauina au i le Misiona a Ghana Accra, e tautala i le Igilisi nai lo le gagana Potukale o lo’u atunuu moni. Sa ou popole tele i le aoaoina o le Igilisi! Sa ou le talitonu o le a ou tautala i se gagana e le mafai ona ou tautala ai.

Ae i le taimi o la matou vasega muamua i le NAF, sa tusia ai e lo’u faiaoga upu “Talitonu i ai” i luga o le laupapa—o lona uiga talitonu e mafai ona tatou faia mea uma faatasi ma Keriso (tagai Filipi 4:13).

Sa ou talitonu i lenei mea, ae ou te lei manatu na faalauteleina ai lo’u tomai e aoao ai se gagana fou i le na o le ono vaiaso. Ou te le’i iloa pe faapefea ona ou faia se mea e foliga mai e matua le mafai lava!

Ina ua maea lena aso muamua o le vasega, sa ou tootuli i le tatalo i lo’u potu. Sa ou ta’u atu i le Tama Faalelagi o le a ou faatuatuaina o Ia, ma e ui lava ou te le’i mautinoa lo’u tomai e aoao ai le Igilisi, ae o le a ou galue i le faatuatua i le tele ou te mafaia. Sa ou fai atu ia te Ia o le a ou filifili e talitonu, faatasi ai ma le fesoasoani a le Faaola e mafai ona ou faia lenei mea.

Ma a o faagasolo vaiaso, sa ou lagonaina le lemu ae mautinoa, sa ou lagonaina lo’u aoaoina o lenei gagana faigata.

O se vavega lava.

Filifili e Talitonu

Talu mai lo’u aoao e uiga ia Iesu Keriso, sa ou talitonu pea ia te Ia. Ae o le talitonu i mea e mafai ona fesoasoani mai ai o Ia ma le Tama Faalelagi ia i tatou e ausia, o se mea e ese mai ma o se mea sa tatau ona ou galue i ai. A aunoa ma le faatuatua, e mafai ona foliga vavega e pei o ni mea na tutupu fua. Ae a o ou filifili e faatuatua ia Keriso ma tuufaatasia lena mea ma a’u taumafaiga e aoao, sa ou lagonaina o Ia o faalauteleina ou tomai ma gafatia.

Na aoao mai Peresitene Russell M. Nelson, “E oo mai vavega e tusa ai ma lo outou faatuatua i le Alii. E tutotonu i lena faatuatua o le faalagolago i Lona finagalo ma Lana taimi—faapefea ma po o afea o le a Ia faamanuiaina ai oe i se fesoasoaniga faavavega o loo e manaomiaina. Ua na o lou lētalitonu o le a taofia le Atua mai le faamanuiaina o oe i vavega e aveese ai mauga mai lou olaga.”

Afai e mafai ona ou faasoa atu se mea se tasi mai la’u tala, o le mea lenei: Talitonu i ai. E le na ona mafai ona e aoaoina se gagana fou pe tuua foi lou nofoaga toafimalie e auauna atu ai i se misiona pe maua foi le lototele e faia ai le mea e te iloa e sa’o e tusa lava pe leai se tasi e siomia oe e ioe i ai.

Ia talitonu o Iesu Keriso o lo tatou Faaola ma a tatou faatuatuaina o Ia, e mafai ona tatou ausia mea e foliga mai e le mafai.